Jã 4 - BIBLE MBAÏ 1980

Jeju kï dekïdë kï Samarit

¹ Parisïg oon hoi Jeju kad aw kï ngéndoog ngãi ho, ða deg baptem tøi kï lo Jã ngeða baptem ho.

² Na rota, i Jeju hã ða deg baptem al, na ngéndoog loa la ðan deg baptem ye.

³ Lon Jeju oo dø takel Parisïg titbe ye, þai døning Judet, tel aw Galilet gog.

⁴ Na kad aw tee Galilet, sumba kad ndah døning Samari gang.

⁵ Aw tee þe madt kï døning Samarit kï tøa i Sikar, nderrbe kï kad ndøøt'n Jakob ad ngonïn Jojep.

⁶ Nõbe bulo man lo Jojep ða tit nõ maði nu, kør ndia asï Jeju nakï, ad ndï ber ta bulo mant'n non, kï kàd kï ða dan þet ad i midi.

⁷ Dekïdë mad kï Samarit ðe ga mant, na Jeju ela an: Adïm mant m'ãi.

⁸ Kaglot'n non, ngéndoog loa awïn kam þet kï'n ndugon nyasa.

⁹ Dekïdë'n non el Jeju an: Î Juip ale? Ye titbãi hã i køm man kãi mî'n mî de kï Samarit a? Dekïdë'n non elta titbe kïta juipg høn nooj kï deg kï Samarit dø nyat mad al.

¹⁰ Jeju tura an: Neni i ger kadkari lo Luwah, na i ger de'n ða køøi man a ne, ni îla a i ndïjea man kãi ye, na î a adi man kumkajir.

¹¹ Dekïdë ela an: Bïraþe, kini goto jiit, kamla bulo wo kïþing, ye titbãi a i gan man kumkajir'n hã i ða i eltaa nõ a?

¹² Î ye, î kïbo tøi kaaj Jakob'n adj bulo man'n ðan, î kïþe kï døn ãi mana kï nganïn kï þut nyakulg lon nõ yo?

¹³ Jeju tura an: Dekïðen a ãi man bulo'n ðan a ne, kïnda a õa gog tø.

¹⁴ Na dekïðen a ãi man'n m'a m'ada a ne, kïnda a õa gog al bat, na man'n m'a m'ada a tel man kï þa kamat tit mankïþa nü bulbul be, na a ada kumkajir kï mbãkïnõt.

¹⁵ Dekïdë el an: Bïraþe adïm man'n i ndï eltaa nõ kadkïnda õm gog al, kad m'tel m'ðe m'ga man al ta.

¹⁶ Jeju ela an: Aw i kun ngawi, na i ðen sia.

¹⁷ Dekïdë tura an: Ngawm goto, Na Jeju ela an: Elta kï rota la an: Ngawi goto ye;

¹⁸ Kïtø i taa ngawg kete asï mi, na dekïdïngã'n i ndï sia tajigla ye, i ngawi al, ad i ta kï rota la el ye.

¹⁹ Taa ne, dekïdë ela an: Bïraþe, m'ger, î ngekelta kï ta Luwaht.

²⁰ Kaaj Samariag øsïn død nõ Luwaht dø mbalt'n ðan, na în Juipg elïn anan: Lon sumba kad deg øsïn død nõ Luwaht tit i Jerusalem.

²¹ Jeju tura an: Dekïdë oo dø ta lom maj. Kaglo mad a ðe nõ, a øsïn død ber nõ Luwaht dø mbalbot'n ðan, ke Jerusalemt al.

²² În Samariag i gerïn nya'n i ndï øsïn døsï ber nõat nõ al, na jî Juipg taa ne, kï ger nya'n kï ndï j'øsï døj ber nõat nõ. Kïtø ngekaj deg a tee ko kï girr Juipgt.

²³ Na kaglo ndï ðe nõ, tajigla ðe woi, i kaglo'n, ngékøsïdød ber nõ Luwaht kï Bøw a øsïn død ber kam Ndilt, kï kam rotat, kïta ngékøsïdødber nõ Luwaht kï jeje titbe, nõ la Bøw ndï sahd kad øsïn død ber nõat ye.

²⁴ Luwah i Ndil, ad maj kad ngékøsïdødber nõat, kï øsïn død ber nõat kam Ndilt kï kam rotat.

²⁵ Dekïdë ela an: M'ger kad Mesi: Ad i Krist a ðe, na lon a ðe woi a ne, a ørrj girr nyag tube.

²⁶ Jeju tura an: mî'n m'ða m'eli ta la mî Krist ye.

²⁷ Kaglot'n non ngéndoog lo Jeju tel ðen, na oona ða elta kï dekïdë ad ta yad. Na de mad kï ndïjea ta an: ði i gee roat a? A ke kïtøði i ða elta kï dekïdë'n ðan goto?

²⁸ Taa ne, dekïdë nya þir man lon nõbe, na tel aw kam þet el deg an:

²⁹ I ðen oon de mad ða ta bulo mant nõ, dam kïlag tube'n m'ða ye, de'n non i Krist ale?

³⁰ Tala deg kïjan butbut kam þet kï tïga awïn ro Jejut.

³¹ Kaglot'n non, ngéndoog lo Jeju ndeena kad sanya, elïna anan: I sanya ngon sî.

³² Na Jeju turd an: M'aw kï nyasa mad la, kad m'sa, na i gerïn al.

³³ Go tat 'nten, ngéndoog loa ndïjen na ta kïnadt anan: De mad ðe kï nyasa ada a?

³⁴ Jeju eld an nyasam laten: Kï m'ðago ndigt lo ngelam, kï m'tøl kon kïla loa tø.

³⁵ I ndï anan nãi nah søø kamla þal a ndø ale? Oon maj m'ndï m'elsï, unïn kumsï kï dõ oon ne ndøøg. Nyako tut asï ja woi.

³⁶ Ngeja nyako ndï taa nyabajin, na ndï mbõ nyako kïta kumkajir kï mbãkïnõt, titbe ngeduw nyako kï ngeja nyako ndï ðan ronel nat.

³⁷ Kïtø ta'n terrta el ten ye, i rota: De mad ða duw nya, na kïmad ða ja.

³⁸ M'lasï m'ad i jan nyako kam ndøøt kï i ðan kïla tit ørïn al, madg la ørïn kamt kete ye, na în i þan maj kï kand kørd.

³⁹ Samariag ngãibe kï kam þet'n non adïn kamd Jeju kïta ta'n dekïdë eld an: Dam nya ðam tube.

⁴⁰ Titbe lon Samariag ðen ro Jejut ye, ndïjena kad ndï sed, na Jeju ndï kam þet'n non ndø joo.

⁴¹ Samari madg ngãibe adïn kamd Jeju kïta tag'n Jeju î kïþe eld.

⁴² Na tel elïn dekïdë'n non anan: Tajigla j'ad kamj Jeju kïta ta'n i elj nõ al, na kïta jî kïþe j'oo dø ta loa kï mbij, na kï ger kad î ngekaj deg kï døningt jeje.

Jeju yoot ngon kooj ngekïla kïbo lo ngékõþeg

⁴³ Go ndøt kï joo'n ða Samarit, Jeju þai nõbe aw døning Galilet;

⁴⁴ kïta Jeju kï døn manaj kete woi an: Ngekelta kï ta Luwaht a ngah køsïgon þekoojïnt al.

⁴⁵ Lon aw tee Galilet ye, deg høna kï rodt maj maj, kïta în kaa ne awïn lo ða nah Pakït Jerusalem; ad oon nyag tube'n Jeju ðat nõ.

⁴⁶ Jeju tel aw Kanaat døning Galilet, ad i lot'n mbel mant ad tel kasïnduu; de mad ndï þebo Kapernawmt nõ, i ngeðakïla lo ngekõþeg, ngona kïdïngã i mõi.

⁴⁷ Lon oo hoi Jeju kad þai døning Judet aw døning Galilet ye, aw roat, ndïjea kï aw Kapernawmt kï yoot ngonïn kïdïngã'n to ta koit.

⁴⁸ Jeju ela an: Asïn kad kamsï Luwah al; îla oon nyakøjg kï nya madg kï yaya al.

⁴⁹ Ngekïla lo ngékõþeg tura an: Bïraþe aw kam kujt lom kete kamtã la kad ngonïm oi.

⁵⁰ Jeju ela an: Aw þe loi ngoni yoot woi. Ngekïla lo ngékõþeg adkamïn ta'n Jeju ela nõ, ad tel ndï aw þe.

⁵¹ I dø ðobt þaitø la ngan ngékïlag loa lan ta, na elïna anan: Ngoni yoot woi.

⁵² Na ndïjed døkàd kï bãî ro ngonïn ton soot a? La turïna anan: Tagbe lokïsøle la, døga tørrïn jîn roat ye.

⁵³ Nõbe la, bøw ngon gerïn kad i døkàd'n Jeju elïn'n ta an: Ngoni yoot woi. Na î kï ngékïþe lon adïn kamd Jeju.

⁵⁴ 'Nten la, i nyakøj kï ya kõjoo'n Jeju ða lon þain døning Judet aw døning Galilet ye.