Hebreg 6 - BIBLE MBAÏ 1980

¹ Kïtø 'nten, ad j'awïn kï ketekete kad kï ndoon nyandoo lo deg kï tøg gangg na kï ndïn kï ta man dø nyandoot kïdasa kï øj dø Krist al. Ja kï ndah girr nyandoo mad kï kij gog al: Ad i nyandoo kad deg tørrïn ndid dø majalt, kï nyan kïlaðag kï a teen koi, na kï adïn kamd Luwah,

² kï ndoo man dø nyandoo kïdasa tit baptemg, kï ji kï ndah dø degt, kï þai ngékoig, kï takïgang kï tokïnõt lo Luwah.

³ Ad kï j'awïn kï kete. Tajigla, îla Luwah ndig a ne, j'a kï ða titbe.

⁴ Kïtø 'nten deg'n son kam majalt ye ta lod titbãi? Îgïn non adïn kunj lo Luwah unj dødt nja kïða woi, ødïn kadkari kï dørãt tadt, na telïnd ngégana dø Ndil kïkunjðangt ho,

⁵ ødïn ta lo Luwah tadt oon maja, gerïn tøgg kï kaglot'n a ðe.

⁶ Kamla gog got tuson kam nyaðat kï majal ye. I rot al kad tel tørrïn ndid gog tø. Kïtø ndï gan Ngon Luwah kagdosït ga kï kij, adïn Ngon Luwah tel nya rosøl kï to kï tïga wakïsï takum degt tube.

⁷ Lon ndii ed døningt kï nja nat nat be, ad døning ãi man maj, na nyako ndu tit maj ad ngéndøøg a ne, Luwah a njang dø døning'n non,

⁸ na îla døning'n non þa kon'g kï ngarg a ne, maja goto, ad Luwah a ndøla, døngoia i laa horr.

⁹ Na ngétar, j'elta titbe kaa ne, j'aw kï kamkïsokïber døsït kïta kï ger kad i ndulon go ðob kïmaj, în hã ndï tee sesï kajt.

¹⁰ Kïtø Luwah i ngeðanya kïro, kama a oi dø kørt'n i ndï ørïn kam kïlat loa al, kï tar'n i ndï øjïn kïtatøa, kï ða'n i ndï i ðan kï deg kïjaþat lo Luwah, na i ndï i ðan sed kï ketekete þaitø ye kam Luwah a oi dø al bat.

¹¹ Jî kï ndig ngãibe kad dekïðen kusït tîron kat mbã døboia kïtakad nya'n i ndahn kamsï døt ye, i ngahn.

¹² Maj kad în ngérokoi siw al, na kï în ngéndaj deg'n adïn kamd Luwah ho, în ngendïdøt kï ngãi ho. Deg kï titbe la a ngahn nyag'n Luwah un kø'n kï n'ad'd ye.

Kunkø lo Luwah'n un ad deg ye, to kï ðubag

¹³ I gerïn maði lon Luwah un kø'n ad Abraham ye, un kø'n kï yokïnda. De mad kïbo tøi Luwah kad Luwah nda yo nõat goto. Na Luwah un køn kï yokïnda dan dø'n î kïþe.

¹⁴ El an: M'a m'njang døi kï rotag, m'a m'ad ngakaig bïlan kï døtdøt.

¹⁵ Titbe tø la Abraham høn tøgïnbá kï ndïdøt kïngãi, ad ngah nya'n Luwah un køn an n'a n'ada nõ.

¹⁶ Lon deg unïn kød kï yokïnda a ne, a ndan yo kam tø det'n i kïbo tøid. Yokïnda lod'n non la, ndï øsï go kunkø lod, kad gangïn ne ta kïmaj lod kïðen

¹⁷ Kï Abraham kaa ne, Luwah ða titbe. Girrdeg loa a ngahn nya'n Luwah unïn køn ad'd. Luwah ndig kad gerïn þet kïta takøjg lon i kï dum mbel. Kïtø 'nten la unïn køn dasa, kamla nda yo got ye.

¹⁸ Kunkø kï yokïnda în nyag kï dum mbel. Kunkø kï yokïnda lo Luwah takïbal goto kamt. Kïtø jî kï ngah lo yaro kam Luwaht, kï ngah tøg kad kï høn roj bá kad kï ngah nya'n Luwah unïn køn adj.

¹⁹ Ndahkamdøt a høj jøgum kad kï ða bijïr nõ Luwaht, tit'n gøltoo a høn too lo kïðabe. Kïtø 'nten la, kub ganglo kïjaþat teen tan nõjt, kad j'and lot kï keme în hã Luwah i tit.

²⁰ Jeju and kam lot'n non kete nojt kïta tel bïra ngejamosï kadkari kï mbãkïnõt kïgo ðobt lo Melkisedek.