Hebreg 13 - BIBLE MBAÏ 1980

Ðob ða nya kï nel Luwah

¹ Ot nyan ta tarna. Kïtø i nya kïmaj kad ngankõna kam Krist't tarïn na.

² Ot kadïn kamsï oi dø ða mbah. Kïtø deg madg go ða mbaht høn ne malaikag kï rodt kïkanj ger.

³ I gaan dø ngankõsïgt'n în kam dangãit tit'n dangãig nat sed be. I gaan kamsï dø ngankõsïgt'n deg ndï ðand majal tit'n ndï ðan sesï majal ye be ho.

⁴ Sumba kad taana i nya køsïgon kusït tube. Maj kad ngaw kï nën ngomïn rod kïkanj yerr kïta na. Kïtø Luwah a gangta dø ngeða kayat kï dekïdïngãg kï ngésah dekïdëg kï dekïdëg kï ngéðangaw tø.

⁵ Ot kadïn ða ta nar dum døsï kï tøi kam nyaðasït. Adïn kamsï sokïber dø nyat'n i ndïn ne kam jisït. Kïtø Luwah î kïþe el an: M'a m'nyàgoi al bat, m'a m'nyài al bat tø ho.

⁶ Kïtø 'nten la, j'asï kelïn ta 'nten kï kamkïsokïber j'an: Bïraþe i ngeðasem m'a m'þool nya mad al, de kï asï ða sem nya mad goto.

⁷ I gaan dø degt kï maði'n în ngékørsï ta ðob, îgïn ulsïn kï ta lo Luwah. I gaan dø ðob nyaðadt kï dø koit'n oin. I ndajïn kadkam lod.

⁸ Jeju Krist ndï lo ndïnt kïkanj mbel, tagbe, kï þone kï mbãkïnõt.

⁹ Ot nyan ta ðob kadïn nyandoog kïdangdang kï kijg üsïn mut. Maj kad kamkë lo Luwah ad tøg dekïðen ngarkamat, na kï i kïtakul mberkïndag dø nyasat al, kïta mberkïndag kï titbe ðan kï deg kï ngétel rod gootal.

¹⁰ J'aw kï dingïr kadkari janyamosï løj nõ, în juipg kï ngéðakïlaþer kam kujkub-londït asïn kad san nya døt al.

¹¹ Kïtø bïra ngejanyamosï kadkari lo juipg un mosï dãg'n jan kød ðen kam lot kïjaþat kïtø majal kï ða, na lan dãro dãgï'n non horrt gid þet.

¹² Kïtø 'nten la, Jeju daiyo'n gid þet kï Jerusalem kïtakad n'tel deg kïjaþat kïtakul mosïn kï køsï døn.

¹³ Kïtø 'nten ad kï teen kï roat gid þet, kï ngahn rosøl kï kïða'n non în Jeju ngah.

¹⁴ Døningt ne, j'aw kï þe loj kï a ða lo ðant al, na ndï kï sahn go þe mad kï ndï ðe.

¹⁵ Kïtø 'nten tø, ad kï lan kadkari j'adïn Luwah kïta Jeju Krist kïkanj nyata. Ad kï ndubïn tøa kï ta kï tajt.

¹⁶ Na ot kadïn kamsï oi dø ða kïna dø nya geegt lo na. Kïtø kadkari kï titbe kï lan adïn Luwah ye, i nya kï nela dum.

¹⁷ I telïn rosï go ngékørrsï ta ðobt, i lan døsï girr tøgt lod. Kïtø ngékørrsï ta ðob ndï ndan kumd gosït. În kïþeg a ørrïn girr kïla ðad nõ Luwaht. Îla i telïn rosï go tat lod a ne, a ðan kïla lod kï ronel, îla i ðan titbe al a ne, kamkil a ðad, na maja a goto kïtatøsï.

¹⁸ I høn kelta kï Luwah kïtaj. Jî kï ger þet kamj høj kï ta dø nya madt al, kï ndig kad nya ðaj i kïmaj kïndøgndøg.

¹⁹ M'ndï køsï kï rotîm kad i ðan nya 'nten kïtakad Luwah tel sem kï rosït gog kanangbe.

Kelta kï Luwah

²⁰ Luwah tee kï Bïraþe loj Jeju ku ngékoigt. Jeju i ngengom batg kïbo, kïta mosï koia ða ad kunkø kï tokïnõt to kïðubagt tø.

²¹ Kï Luwah kï Ngekad deg lapia adsï nya kïmaj kïðen kïtakad i ðan ne go ndigt loa. Kï Luwah ða kïla kïðen kï nelïn kamjt kïtakul Jeju Krist. Køsïgon kï dø Jeju Krist't mbã koght lo kohg.

Døboi tag

²² Ngankom m'ndï køsï kad i ndïn døt sem, kad oon dø takøj lom'n m'øjsï, kïta ta'n m'ndang m'adsï kam maktubt 'nten i ta kï tëbe.

²³ M'ad i gerïn hoi ngõnkõj Timote în ørrïna dangãit. Îla ðe romt nderrbe a ne, m'a m'aw sia nat kad m'oosï.

²⁴ I ðan lapia ngékørsï ta ðob admïn kï deg kïjaþat lo Luwah. Ngankõjg kï døning Italit ðasïn lapia tube.

²⁵ Kï majkurr lo Luwah i nat sesï tube.