Esdras 7 - BIBLE MBAÏ 1980

¹ Go nyagt 'nten, kaglo kõþe lo Artaserses ngar kï Persï, de mad i nõ tøa i Esdras.

² I ngon Seraja, ngon Ajaria, ngon Hilkija.

³ Ngon Salum, ngon Sadok, ngon Ahitub.

⁴ Ngon Ngongon Jerahia, ngon Uji, ngon Buki.

⁵ Ngon Abisuwa, ngon Pines, ngon Eleajar, ngon Aarõ kï bïra ngejanyamosï kadkari.

⁶ Esdras taa ne þai Babilont, i de kï ndoo maktub ngãi, kamla ger kør girr maktub mberkïnda lo Moij maj ngãi, mberkïnda'n Bïraþe Luwah lo Israel ad'd maði nu, na tit'n ji Bïraþe Luwah loa i døat ye, nyag tube'n ndïje ngar a ne, ngar a ða ada.

⁷ Israelag madg, ad i ngéjamosï kï Lebiag kï ngékøsïpag kï ngéngom tabitg kï ngéðakïla kam kujt kïjaþat ðen Jerusalem kam þalt kïkõtanãimïta lo ngar Artaserses.

⁸ Esdras tee Jerusalem kam naht kïmi, kam þalt kï kõ tanãimïta lo kõþe lo ngar.

⁹ Kïtø ndø kïdasa lo nah kïdasa la þai Babilont so ðobo ye, na kam ndøt kïdasa lo nah kïkõmi la tee Jerusalemt kïta ji Luwah loa i døat.

¹⁰ Kïtø Esdras nda kamïnt kï'n nderr girr mberkïnda lo Bïraþe kï'n ngomïn goa, kï'n ndoo Israelag Komãdïmãg kï mberkïndag tø.

Mberkïnda lo Artaserses kïta Esdras

¹¹ 'Nten i ta lo Artaserses kï ngar'n ndang kam maktub ad Esdras, ngéjanyamosï kï ngendoo maktub, ngéger girr nyag kï kam Komãdïmãgt lo Bïraþe kï mberkïndag.

¹² Artaserses ngar lo ngarg kï ro Esdras ngejanyamosï kï ngendoo maktub, ngeger mberkïndag lo Luwah kï Ngedørã. Tajigla

¹³ oo, mberkïnda lom laten: Israelag kï ndïn kam kõþet lom, ngéjanyamosï kï Lebiag lod, dekïðen'n kï kama ndig kaw Jerusalemt gog a ne, i nyàa ad aw nat sei.

¹⁴ Ngar kï Ngékøjtag loa tanãimïta lan kïta ndïje ta dø Judat kï Jerusalem kïgo mberkïndat lo Luwah kï to jiit.

¹⁵ Nar arjã kï ør kï ngar kï ngékøjtag loa adïn Luwah lo Israel kï kamndig, a øi awïn adïn Luwah'n londia i Jerusalem,

¹⁶ nat kï nar arjã kï l'ør tube'n a i ngah kam nusï døning kï Babilont tube, ad i kadkarig kï deg kï ngéjanyamosï adïn kï kamndig kïta kuj lo Luwah lod Jerusalem.

¹⁷ Nar 'nten ta i ndugon bøw mangg kï bal bïnyag kï bal batg kï nduj kï nyakãig, i lad dø dïn gï kadkarit kï kuju lo Luwah loi Jerusalem.

¹⁸ Ta kï dø ndeg nar l'ør kï nar arjã taa ne, î kï madkïlaig a i ðan ne kïla kïgo ndigt lo Luwah losï.

¹⁹ Ta kï dø jog'n tøøn adïn kïta ðan kïlaþer lo Luwah taa ne, a i nda nõ Luwaht kï Jerusalem.

²⁰ Nya kïðen'n i gee kïta kuj lo Luwah, na i ngah ðob kïta ðan a ne, nya'n non a i ngah kam kuj ngom nyamajt lo ngar.

²¹ Mî ngar Artaserses, m'ndamber ngékoogo nyamajg tube kam nusï døning kï gid bah Eprat't m'an: Nya kïðen kï Esdras, ngejanyamosï, kï ngendoo maktub, ngeger mberkïndag lo Luwah kï Ngedørã a ndïjesï a ne, a i ðan tentenbe,

²² a adïna mbã asï talent kï nar arjã kï køya asï kïlo dub mïta, kïlo geme dub mïta, man nduu litïr dub mïta, yib litïr dub mïta, na kat taa ne kï kaj mbøj.

²³ Nya kïðen kï Luwah kï Ngedørã nda mbera, sumba kad i kï ða tentenbe kïta kuj lo Luwah kï Ngedørã, na þeta þawong dø kõþet lo ngar kï ngana.

²⁴ J'ad i gerïn maj kad de taa lambo, ke tirr dø nya, ke taa lambo lo de'n ndï tøi ðobo, ji ngéjanyamosït, ke Lebiag, ke ngékøsïpag, ke ngéngom tabitg, ke ngéðakïla kam kujt lo Luwah'n ðan.

²⁵ Na î Esdras, kïgo terrt lo Luwah kï to kamit, a i nda ngégangtag kïbo kï kïdug kïtakad gangïn ta ku degt kï ndïn kam nusï døningt kï gid bah Eprat't kïtaagbe. A în deg kï ngéger mberkïndag lo Luwah loi, na îgïn gerïn al a ne, i ndood.

²⁶ Na dekïðen n'ngom go mberkïnda lo Luwah loi al ke mberkïnda lo ngar al tø a ne, a i gangïn ta døat kanangbe, ke koi, ke tuþana kø, ke køi nyag loa, ke lana dangait.

Esdras ndub Bïraþe

²⁷ Køsïgon kïdø Bïraþe Luwaht lo bøwjg'n nda ta kïtitbe kam ngart kad ða nyag kïmajmaj kujt lo Bïraþe kï Jerusalem,

²⁸ na øjïm kamkë lon nõ ngart kï ngékøjtag loa kï mbaiþeg kïbobo tube. Kïtø 'nten m'ngahn tøg kïta ji Bïraþe Luwah lom i dømt, na m'kaw kïbo madg ku Israelagt kad awïn nat sem.