Ejai 5 - BIBLE MBAÏ 1980

Terrta dø ndøø nduut

¹ M'a m'øsï pa kïta ngetar lom, ad i pa lo ngetar lom kïdø ndøø nduut loa: Ngetar lom aw kï ndøø nduu dø doorlot kïmaj ngãi.

² Ndøø lo, tørr mbalg, hø nduu kïmaj tit, ða kuj ngomlo kïngal tit, ða lo þa nduu kamt, nda kamïnt kad n'ngah kand kïmaj, na and kand nduu kïmajal.

³ Tajigla in ngéndï Jerusalem kï deg kï Juda, kï i gangïn ta mbïnajt kï ndøø nduu lom.

⁴ Nya mad nãi nõ kad m'ða kam ndøø nduut lom in m'ða, al þaitø a? M'nda kammt kad tee kï kand nduu kïmaj, na tee kï kand nduu kïmajal kïtøði a?

⁵ Tajigla m'a m'øjsï nya'n þet m'a m'ða kï ndøø nduu lom. M'a m'ða ba m'tørr kïnga loa, kad nyag san. M'a m'ða burrolo ndogbørrat, na a þana kï njad.

⁶ M'a m'tela got ndøøt, kad a jan takõna ke ndøøn kama al. Kõn kï ngarr a þan tit. M'a m'øg kilndii kad man a ed døt al tø.

⁷ Kïtø ndøø nduu lo Bïraþe Ngekoosïg i ngékïþe lo Israel; deg kï Juda tø in nya kï hø kï nela. Ndï ngoo takïgang kïgoðobat, na i mosï kï kü kø. Ndï ngoo nyaða kïdenesew, na i tõn ðusïðusï.

Nya kï to a so dø ngéðamajalgt

⁸ Beto lo ngeða kuj kadnat nat, kï ngéla ndøø kad nat, mbã lo mad kï to kari goto. Na a ndïn kïkïðad døningt 'nten.

⁹ Bïraþe Ngekoosïg elta mbimt, Kï yo kïnda an: Rota kujg ngãibe a telïn gootþe; kuj kïbobo kï kïmajmaj, de a ndït al.

¹⁰ Ndøø nduu hektar mïta adïn man nduu litïr dømi al. De'n duw geme kilo þu a tet kilo kïlah koon.

¹¹ Beto lo îgïn þain kïsî ritit, sahn go nyakãi kï kong, ndïn ta kãi kasït mbã ndø, kasïnduu ðad ad rod tïngabil.

¹² Kïndeh kï kïndeh ngo, kï kød, kï tow, kï kasïnduu adïnd ronel kam ða nahgt lod. Turïn go kïlaða Bïraþe al, oon kïlaða jia al tø.

¹³ Kïtø 'nten la deg lom awïn ne þert kïta nyager al. Þoo ndï tøl kïbog lod Koosïg lod kïnda man ðad ad kød tut kãrïm.

¹⁴ Kïtø 'nten la hoolþe, a tee tan, na a laa yalïm, kï kïse ronel kï yekïtyekït.

¹⁵ Titbe Bïraþe a lan dø de kïber. Ngégaþuro a lan død kï ber.

¹⁶ Bïraþe Ngekoosïg i kï tøi kïdõ kïtakul takïgang kïgoðobat loa, na Luwah Ngekunjðang a øj ron kïkunjðang kïtakul nyaða kïdenesew.

¹⁷ Ngan batg a san nya nõbe tit lokuldt be, na nyakulg kï to mbulmbul a san nya gootlot kïtuj.

¹⁸ Beto lo deg'n dønd lo ðagootalt lod kï kïlla takïbal godt, a ndørïn majal kï kïlla pusï godt tø.

¹⁹ Deg'n non anan: Ada ða kïla lon kanang ad j'oo, ad takøj lo Ngekunjðang kï Israel ndøt kïrojt nderrbe kad kï gera.

²⁰ Beto lo îgïn ndï kunïn majal maj, na kunïn nya kï majal, maj mbelïn til kï kunj na kunj mbelïna kï til, nya katbang gan ne goot nya kïnel, na nya kïnel gan ne goot nya kï katbang tø.

²¹ Beto lo ngékoo rod ngéterrt. Oo a anan, n'in ngégoosï tø.

²² Beto lo deg kïngang lo kãi kasït kï kong; na þan tøg bur nyakãi kïngang nat.

²³ Ndï ørrïn ta dø de kï ngeðamajalt kïta kadkari, na øgïn nya lo de kï ta goto døat logangtat.

²⁴ Kïtø 'nten, tit'n horr õn bulmu na mu kïtut so løt dan horrt, titbe tø ngïrad tel nya kïndum, hutd tø þai tit bu be, kïta mbetïn ta nyandoo lo Bïraþe Ngekoosïg, kïdin ta lo Ngekunjðang kïnge Israel.

²⁵ Kïtø 'nten Bïraþe þawong kï deg lon, la jin kïdødt, kad n'ndad, mbalbog yeen, ad dønind to ðobt tit þirþit be. Be kaa wong loa oi al, jia ða kïdõ þaitø.

²⁶ Bïraþe un drapo kïdõ kïta kunïn koosï ngéðøøg'n in sãi. A kund kï ngol kad ðen ko døngoi døningt na. Ðen kanangbe kï ro kï to pelpel.

²⁷ De mad kudt kï kør ðaa, ke ga njan nyat goto, de mad kï të þi ke to þi goto, de mad kï ndardøþoa tut, ke kïlla sa loa gang goto tø.

²⁸ Kïrãg lod tube at pepep, jid i dø gãt lod, kïngotinja sïndag lod kongkong tit mbal be, na nja pusïg lod tit nélbarwãi be.

²⁹ Ko lod i ko lo tubo, ko tit ngan tubo, a jan ðøø na a høn nya, unïn tadt awïn ne, de mad kï ta tadt goto.

³⁰ Ndøt'n non kah ngéðøøg a ko tit bahbo kï ko be. Lon de oo døning'n non, lo i til kï kamkil. Kunj a tel lo kï diw kïtakul kilndii.