Deteronom 29 - BIBLE MBAÏ 1980

Moij tøsï ndool Israelag

¹ 'Nten la în tag lo kunkø'n Bïraþe nda mbera Moij kad un kï Israelag kam døning Moabt, go kunkøt kï un sed mbal Horebt.

² Moij kun Israelag tube na eld an: Oon nyag tube'n Bïraþe ða kï Paraõ kï þerg loa kï døning loa tube takumsï kam døning Ejipt't.

³ Nyanág kïbobo kï nyakøjg kï nyag kï yaya kïbobo'n non, îgïn oon kï kumsï,

⁴ na mbã Bïraþe adsï ngarkam kad i gerïn ne girr nya, awïn kï mbi kad oon ne dø ta al.

⁵ M'ørrsï ta ðob kam dïlalot asï þal døsøø, na kubg losï ngisï al, sa kï njasït riyo al ho.

⁶ I san bïnã al ho, i ãin kasïnduu, ke kasï kï ong al kïtakad i gerïn ne kad mî Bïraþe Luwah losï.

⁷ Kamla i ðen kam lot'n ðan, na Siõ ngar kï Hesbon kï Og ngar kï Basan teen ðøøn sej, na tetðøø,

⁸ kï taa døning lod j'ad Rubeniag kï Gadiag kï nusï girr Manase nyandubat.

Majkurr a ðe go telrogotat

⁹ Kïtø 'nten i ngomïn go tag lo kunkø 'nten, i høn ðagoot kïtakad maj urrsï dø kïlaðasït tube.

¹⁰ Kamla Moij el an: Þone, în tube i ðan nõ Bïraþe Luwaht losï, in kï bïradø girrkoojg losï kï kïbog losï kï mbaiþeg losï kï dekïdïngãg lo Israel tube.

¹¹ Ngansïg kï nësïg kï mbah kï ndï kam londït loi, ngega kir loi kï ngeto man loi,

¹² kad and kam kunkøt lo Bïraþe Luwah loi'n, in un adi kï yokïnda þone,

¹³ kad n'ndai þone kad î girrdeg lon, na nî kï døn, nî Luwah loi tit'n ndan yo ad bøwig Abraham, Isaak kï Jakab.

¹⁴ I kïtasï kïðabe hã m'unïn køm m'ad kï yokïnda al.

¹⁵ Na i nat kï de'n ða nat sej þone al, kï de'n ða sej nõ Bïraþe Luwaht þone tø.

Ndakøj a ðe go ðagootat al

¹⁶ I gerïn tit'n kï ndïn Ejipt't tit'n kï tøin ku girrdeg'n i ndan døningg lod i gangïn.

¹⁷ Oon nyag kïyerr lod'n ðan kï kag kï mbal kï nar arjã kï nar ør kam þegt lod.

¹⁸ Oon go rosï maj, na þeta dekïdïngã ke dekïdë, ke girrnooj, ke girrkooj mad kusït ngarkama nyàgo Bïraþe luwah loj kø, na aw ða þer lo yog lo girrdeg'n non. Ot kadïn ngïr kag kï tee kï wong kï kand kï katbang þa kusït

¹⁹ ad de mad oo dø tag lo kunkø kï yokïnda 'nten î kï døn hit ron kamïnt an: Ke neni m'ndia kïgo kammt kï kongkong kaa m'a m'ngah lapia.

²⁰ Bïraþe a nyàgo majal lo de'n non al, na sa wong kï jang lo Bïraþe a su luilui dø det'n non, ndølg tube'n ndangïn taa kam maktub 'nten a son døat, Bïraþe a tøl tøa kø girr dørãt.

²¹ Bïraþe a ørr de'n non ta dang ku girr Israelagt, kad nya kïto ðaa kïgo ndølgt tube lo kunkø kï ndang kam maktub mberkïnda 'nten.

²² Ngaka kï a ðen, ngansïg kï a þai gosït kï mbah kï a ðe ko døningt kï sãi, lon oon yokoosï kï døningt kï mõig'n Bïraþe ndan deg kï døningt'n ðan, lon oon døning kïtaagbe kï supïr kïkat,

²³ got horrt duwïn nyako tit al, ndøøn nya mad kam al, mu mad þa tit al, nuj tit Sodom kï Gomorr. Adma kï Seboim'n Bïraþe nujd kï wong lon kï gøl søkïr.

²⁴ Ã girrdeg tube a elïn anan: Kïtøði Bïraþe a ðan nya kïtitbe kï døning'n ðan a? Girr wong kï tïngabil kïbobe 'nten i ði a?

²⁵ Deg a turïn anan: Kïtø nyan go kunkø lo Bïraþe Luwah lo bøwdg'n un sed'd lon teen sed døning Ejipt't kïtïga.

²⁶ Kïtø awïn ðan þer lo yog, øsïn død ber nõdt tø, yog'n gerïnd al, Bïraþe adïnd al tø,

²⁷ na Bïraþe net deg'n ðan døningt lod kø kï wong kïtalsøkïr kï kïtïngabil, lad kø døningt kïðang tit'n ndï oon ne þone.

²⁸ Nya kïmund i lo Bïraþe Luwah loj, na nyag kï tee dø i lo nganjg mbãkïnõt kad kï hø ðagoot tagt tube lo mberkïnda 'nten.