2 Timote 4 - BIBLE MBAÏ 1980

I la mber ta

¹ Nya'n m'ndï m'ndai mbera kï tøgïm nõ Luwaht, kï nõ Jeju Krist'tn a ðe gangta dø ngékumkajirgt kï ngékoi lon a teen høi kï kõþe lon la ten:

² Kï i la mber ta lo Luwah, i høtøgibá kam kïla la mber tat 'nten kam kaglot kïmaj kï kaglo kïmajal. Sumba kad deg gerïn ðagoot al lod, i ndángd, i ða sed kad awïn kï ketekete kam kadkam Luwaht, i ndood kï ndïdøt kï kasïnatap.

³ Kïtø kaglo mad a ðe nõ, deg a ndigïn koo dø nyandoo kïjaraw al, na kïgo nyurkõgt lod kï køsï død, a kawïn ne ngéndoo deg'n a elïnd nyag'n ndigïn koo dø.

⁴ A unïn mbid kø dø rotat, a telïn rod go sukïdagt.

⁵ Na î, majkad i ndï kï kum kï jaroi kam nyagt tube, i høtøgibá kamkõt, i ða kïla lo ngelamber hoita kïmaj, i tølkon kïlaþer'n sumba kad i ða ad Luwah nõ.

⁶ Mî taa ne, ndø asï woi kad m'oi. Tajigla a tølmïn tit kadkari nyakãi'n deg a mbelïn kø adïn Luwah be.

⁷ M'ðøø ðøø kïmaj, m'ãi ngød m'gug dø bang woi, m'ngomgo kadkam Luwah maj.

⁸ Nãi nya kïðabe, i jøg lo ngétetðøø'n Bïraþe ngegangta kïgoðobat a adïm kam ndøt kï nu nõ, a adïm mî kïkïðambe al, na a ad deg tube'n ndï ngoon, kam tart, ndø teea høi.

Hoitag kïdangdang

⁹ I sah ðob kad i ðe romt kanangbe.

¹⁰ Demas tî nyam kø kïta ndï tar dunia nge 'nten ngãibe ad aw þebot kï Tesalonik. Kresens aw døning Galatit, Tit aw Dalmatia.

¹¹ Luk kïkïðanbe la i nat sem ye. Un Mark i ðen sia, kïta asï kad ða sem dø kïlat'n m'ndï m'ða.

¹² Na Tisik taa, m'laa þebot kï Epesï.

¹³ Lon a i ðe a ne, un kubji'n hã m'nyà kï Troasït ro Karpust i ðen. Øi maktubg, na kïbo tøi, i ðe kï ndarrg'n ndangïn nya tit.

¹⁴ Alegjandïr kï kød ko nya ða sem nyag kïmajal ngãi, Bïraþe a baa kïgo kïlaðaagt.

¹⁵ Oo go roi maj dø det'n non. Kïtø mbet ta'n kï j'el nõ.

¹⁶ Lon m'ða m'orrïn ta dømt nõ ngekõþet dasa nõ ye, de kï ða sem dø tat goto, na deg tube tî nyàmïn kø. M'kø Luwah kad tïda majal 'nten kïdødt al.

¹⁷ Na Bïraþe ða kadïmt, ða adïm tøg. Kïtø 'nten m'asïn la mber Hoita kïmaj tube kïtakad m'ad girrdeg kïdangdang tube oon dø. Na Bïraþe ajïm ta tubo ndat tø.

¹⁸ Bïraþe a ajïm kam nyat kïmajal kïðen, a ngomïm lapia mbã m'tee kõþet loa kï dõ dørãt, køsïgon i kï døat mbã kï kohgt lo kohg. Amin.

Lapia kï døboit

¹⁹ I ða lapia Prisil kï Akilas kï ngékïþe lo Onesipor adïm.

²⁰ Erast nãi kï þebot kï Korent. M'nya Tropim kam þebot kï Mîle kïta mõi ðaa.

²¹ I sah ðob kad i ðe kete nõ þart kïkud. Ebulus, kï Pudens kï Linus kï Klodia kï ngankõ tube ðain lapia.

²² Kï Bïraþe ndï nat sei. Kï majkurr lo Luwah i nat sesï tube.