RUMANI 7 - IL-BIBBJA IL-KOTBA MQADDSA

Kapitlu 7 Ix-xbieha taż-żwieġ

¹ Ma tafux intom, l-aħwa - qiegħed nitkellem ma’ nies li jafu l-Liġi - li l-liġi taħkem bniedem sakemm jibqa’ ħaj?

² Hekk, il-mara miżżewġa hi marbuta bil-liġi ma’ żewġha sakemm hu jdum ħaj; jekk żewġha jmut tinħall mil-liġi ta’ żewġha.

³ Għalhekk, sakemm żewġha jkun għadu ħaj, jekk tiżżewweġ raġel ieħor, tkun adultera. Jekk żewġha jmut hi tkun ħielsa minn dik il-liġi u jekk tiżżewweġ raġel ieħor, ma tkunx adultera.

⁴ Hekk intom, l-aħwa, mittu għal-Liġi permezz tal-ġisem ta’ Kristu, biex intom tkunu ta’ ħaddieħor, jiġifieri, ta’ dak li kien imqajjem mill-imwiet, sabiex nagħmlu l-frott għal Alla.

⁵ Sakemm konna fil-ġisem, il-ġibdiet tad-dnub kienu jaħkmu fina permezz tal-liġi fil-membri tal-ġisem tagħna biex nagħmlu l-frott għall-mewt.

⁶ Issa aħna nħallejna mil-Liġi għax mitna għal dak li kien iżommna lsiera, biex issa nservu skont il-ħajja l-ġdida tal-Ispirtu u mhux aktar skont l-ittra l-qadima.

Il-jasar tad-dnub fina

⁷ Xi ngħidu, mela? Li l-Liġi hi dnub? Ma jkun qatt! Imma ma kontx inkun naf x’inhu d-dnub, kieku ma kinitx il-Liġi; ma kontx inkun naf x’inhuma x-xewqat ħżiena kieku l-Liġi ma qaltlix: “Ma jkollokx xewqat ħżiena”.

⁸ Id-dnub ħa l-okkażjoni mill-kmandament u qajjem kull xorta ta’ passjoni fija. Mingħajr il-Liġi, id-dnub kien ikun ħaġa mejta.

⁹ Jien kont darba ngħix mingħajr il-Liġi, imbagħad ġie l-kmandament u d-dnub ħa r-ruħ.

¹⁰ Jien mitt: il-kmandament li kien maħsub biex iġib il-ħajja, spiċċa biex ġiebli l-mewt.

¹¹ Id-dnub ħa okkażjoni mill-kmandament biex qarraq bija u qatilni.

¹² Il-Liġi hi qaddisa u l-kmandament hu qaddis, ġust u tajjeb.

¹³ Mela dak li hu tajjeb sar mewt għalija? Ma jkun qatt! Iżda d-dnub, biex jurini li hu dnub, ġiebli l-mewt b’dak li hu tajjeb biex permezz tal-kmandament id-dnub jurini sa fejn jasal il-ħażen tad-dnub.

¹⁴ Nafu li l-Liġi hi spiritwali, imma jien tad-demm u l-laħam mibjugħ lid-dnub.

¹⁵ Ma nafx x’jien nagħmel; naf li mhux dak li rrid nagħmel iżda dak li ma rridx.

¹⁶ Jekk nagħmel dak li ma rridx, naqbel mal-Liġi li hi tajba.

¹⁷ Issa mela mhux aktar jien li qiegħed nagħmel dan iżda d-dnub li hemm jgħammar ġewwa fija.

¹⁸ Naf li t-tajjeb ma jgħammarx fija, jiġifieri f’ġismi. Ir-rieda tajba qiegħda hemm fija, imma li nagħmel it-tajjeb mhux hemm.

¹⁹ M’iniex nagħmel it-tajjeb li rrid, imma qiegħed nagħmel il-ħażin li ma rridx.

²⁰ Jekk jien nagħmel sewwasew dak li ma rridx, mhux jien mela qiegħed nagħmlu iżda d-dnub li hemm jgħammar fija.

²¹ Inħoss din il-liġi ġewwa fija: meta rrid nagħmel it-tajjeb, ifeġġ quddiemi l-ħażin.

²² Skont il-bniedem ta’ ġewwa togħġobni l-liġi ta’ Alla;

²³ iżda nilmaħ fil-membri ta’ ġismi liġi oħra titqabad kontra l-liġi ta’ moħħi u tjassarni taħt il-liġi tad-dnub li hemm ġo ġismi.

²⁴ Imsejken bniedem li jien! Min se jeħlisni minn dan il-ġisem tal-mewt?

²⁵ Niżżi ħajr lil Alla permezz ta’ Ġesù Kristu Sidna! Mela minni nnifsi jien naqdi lil-liġi ta’ Alla b’moħħi, iżda b’ġismi naqdi l-liġi tad-dnub.