PROVERBJI 1 - IL-BIBBJA IL-KOTBA MQADDSA

Kapitlu 1 L-isem u s-suġġett tal-ktieb

¹ Il-proverbji ta’ Salamun bin David sultan ta’ Iżrael:

² biex jagħrfu l-bnedmin l-għerf u t-tagħlim, biex jifhmu kliem l-għaqal,

³ biex jieħdu tagħlim tajjeb, skont il-ġustizzja, id-dritt u s-sewwa;

⁴ biex jingħata d-dehen liċ-ċkejknin, l-għerf u l-għaqal liż-żgħażagħ.

⁵ Jisma’ wkoll l-għaref, u jżid l-għerf tiegħu, u min jifhem jitgħallem aktar,

⁶ biex jifhem il-proverbji u t-tixbihat, u xi jgħidu l-għorrief u l-kliem mistur tagħhom.

⁷ Il-biża’ tal-Mulej hu l-bidu tal-għerf; l-għerf u t-tagħlim il-boloh imaqdruhom.

⁸ Isma’, ibni, kliem missierek, u twarrabx tagħlim ommok;

⁹ dawn huma għalik kuruna sabiħa fuq rasek, u kullana ta’ ġieħ madwar għonqok.

Aħrab il-ħżiena

¹⁰ Ibni, jekk iħajruk il-ħżiena, toqgħodx għalihom.

¹¹ Jekk jgħidulek, “Ejja magħna; nissajaw ħa nxerrdu d-dmija, nistaħbew ħa naħbtu għal min hu bla ħtija;

¹² nibilgħuhom bħal Art l-Imwiet, ħajjin u sħaħ, bħal dawk li jmorru fil-ħofra;

¹³ nsibu kull ġid u għana, nimlew djarna bil-priża;

¹⁴ itfa’ xortik magħna, ikollna lkoll but wieħed.”

¹⁵ Ibni, tmurx magħhom fi triqthom, warrab riġlejk minn mogħdijiethom;

¹⁶ għax riġlejhom għall-ħażen jiġbdu, u għat-tixrid tad-demm jgħaġġlu.

¹⁷ Għalxejn tifrex ix-xibka, fejn kull għasfur jista’ jaraha.

¹⁸ Iżda dawn għal demmhom stess jissajjaw, u għalihom infushom jonsbu.

¹⁹ Din hi x-xorti ta’ min jistagħna bid-dnewwa, il-qligħ li jikseb ineħħilu ħajtu.

Is-sejħa tal-għerf

²⁰ L-għerf jgħajjat fit-triqat, leħnu jgħolli fl-imsieraħ,

²¹ isejjaħ fil-bidu ta’ triq kollha storbju, ixandar fid-daħla ta’ bibien il-belt:

²² “Intom, boloh, kemm se ddumu tħobbu l-bluha? Kemm se jdumu l-insolenti jitgħaxxqu bl-insolenzi tagħhom, u l-boloh jobogħdu t-tagħlim?

²³ Agħtu widen għat-twiddib tiegħi; jien se nsawwab ħsibijieti fuqkom, se ngħarraf kliemi lilkom.

²⁴ Talli sejjaħtilkom, u intom ma ridtux tisimgħu, meddejt idejja lejkom, u ħadd ma ta kas;

²⁵ talli warrabtu fil-ġenb kull parir tiegħi, u xejn ma ridtu t-twiddib tiegħi;

²⁶ jien ukoll nidħak għall-ħsara tagħkom, nidħak bikom meta jaqbadkom il-biża’;

²⁷ meta jaqa’ fuqkom bħal tempesta l-biża’, u bħal riefnu tiġi fuqkom il-ħsara, meta l-hemm u d-dwejjaq jaħkmukom.

²⁸ Imbagħad isejħuli, imma jien ma nweġibhomx; ifittxuni, imma ma jsibunix.

²⁹ Għax huma t-tagħlim jobogħduh, u l-biża’ tal-Mulej ma jriduhx;

³⁰ għax il-pariri tiegħi ma laqgħuhomx, u maqdru t-twiddib kollu tiegħi.

³¹ Mela ħa jieklu frott għemilhom, u jixbgħu bl-għemejjel tagħhom.

³² L-ebusija ta’ moħħhom nieqes toqtolhom, u l-bruda tal-boloh teqridhom.

³³ Imma min jisma’ lili jgħix moħħu mistrieħ, bla ebda tfixkil, bla biża’ tal-ħsara.”