NUMRI 8 - IL-BIBBJA IL-KOTBA MQADDSA

Kapitlu 8

¹ U l-Mulej kellem lil Mosè u qallu:

² “Kellem lil Aron u għidlu: Meta ttella’ l-imsiebaħ, qis li s-seba’ msiebaħ ikunu jiddu għal quddiem l-imnara.”

³ U Aron għamel hekk: tella’ l-imsiebaħ u qegħedhom iħarsu lejn in-naħa ta’ quddiem tal-imnara kif ordna l-Mulej lil Mosè.

⁴ L-imnara kienet tad-deheb battut, il-bastun u l-friegħi kollox battut. Mosè għamel l-imnara fuq il-mudell li wrieh il-Mulej.

⁵ U l-Mulej kellem lil Mosè u qallu:

⁶ “Ħu l-Leviti minn fost ulied Iżrael, u naddafhom.

⁷ U hekk għandek tagħmlilhom int u tnaddafhom: roxx fuqhom l-ilma għall-purifikazzjoni mill-ħtija; u jgħaddi l-mus tal-leħja minn fuq ġisimhom kollu, u jaħslu ħwejjiġhom u hekk ikunu ndaf.

⁸ Imbagħad jieħdu għoġol bl-offerta tal-qmuħ miegħu tas-smid imħallat biż-żejt, u ħu għoġol ieħor għas-sagrifiċċju tal-purifikazzjoni.

⁹ Ressaq imbagħad il-Leviti quddiem it-tinda tal-laqgħa, u laqqa’ l-miġemgħa kollha ta’ wlied Iżrael.

¹⁰ “U tressaq il-Leviti quddiem il-Mulej u wlied Iżrael iqiegħdu idejhom fuq il-Leviti.

¹¹ U jressaq Aron, bħala offerta minn fost ulied Iżrael, lil-Leviti quddiem il-Mulej, biex jibqgħu jagħmlu s-servizz tal-Mulej.

¹² Il-Leviti jqiegħdu idejhom fuq ras l-għoġiela, imbagħad offrihom wieħed sagrifiċċju tal-purifikazzjoni, u ieħor sagrifiċċju tal-ħruq lill-Mulej għall-maħfra tal-Leviti.

¹³ Imbagħad tqiegħed il-Leviti quddiem Aron u wliedu, u toffrihom u tressaqhom bħala offerta quddiem il-Mulej.

¹⁴ U hekk tagħżel il-Leviti minn fost ulied Iżrael, u l-Leviti jkunu tiegħi.

¹⁵ “U wara dan kollu l-Leviti jidħlu biex iservu fit-tinda tal-laqgħa. Hekk inti tnaddafhom u tressaqhom bħala offerta,

¹⁶ għaliex huma mogħtija lili minn fost ulied Iżrael, minflok kull min jitwieled l-ewwel minn mara; kull l-ewwel wild minn ulied Iżrael ħadtu jien għalija.

¹⁷ Għax tiegħi hu l-ewwel wild ta’ wlied Iżrael, kemm jekk ikun bniedem, kemm bhima; minn mindu qtilt l-ewwel ulied fl-art tal-Eġittu jien ikkonsagrajthom għalija;

¹⁸ u ħadt lil-Leviti minflok l-ulied tal-ewwel minn fost ulied Iżrael.

¹⁹ U tajt il-Leviti lil Aron u lil uliedu minn fost ulied Iżrael biex iservu minflok ulied Iżrael fit-tinda tal-laqgħa, u jitolbu għall-maħfra ta’ wlied Iżrael; u ħadd ma jkun hemm minn ulied Iżrael li jindarab hu u jersaq lejn is-santwarju.”

²⁰ U Mosè u Aron u l-ġemgħa kollha ta’ Iżrael hekk għamlu mal-Leviti skont ma ordnalhom jagħmlu magħhom il-Mulej.

²¹ Il-Leviti nħaslu bl-ilma tal-purifikazzjoni, ħaslu ħwejjiġhom, u Aron offriehom lill-Mulej u talab il-maħfra għalihom biex inaddafhom.

²² Imbagħad il-Leviti daħlu biex jagħmlu s-servizz tagħhom fit-tinda tal-laqgħa ħdejn Aron u wliedu. Mosè għamel magħhom skont ma ordnalu l-Mulej dwar il-Leviti.

²³ U l-Mulej kellem lil Mosè u qallu:

²⁴ “Din hi l-liġi tal-Leviti; minn ħamsa u għoxrin sena ’l fuq jidħlu għax-xogħol fis-servizz tat-tinda tal-laqgħa;

²⁵ u mal-ħamsin sena jieqfu mix-xogħol fis-servizz u ma jaħdmux aktar.

²⁶ Jista’ wieħed jgħin lil ħutu huma u jagħmlu l-għassa fit-tinda tal-laqgħa, imma ma jagħmilx xogħol. Hekk għandek tqassam ix-xogħol tal-Leviti.”