NUMRI 21 - IL-BIBBJA IL-KOTBA MQADDSA

Kapitlu 21 Rebħa fuq il-Kangħanin

¹ Is-sultan Għarad tal-Kangħanin, li kien joqgħod fin-Negeb, sama’ li Iżrael kien ġej mit-triq ta’ Atarim; ħareġ jissielet miegħu, u qabad lil xi wħud minnhom priġunieri.

² U Iżrael għamel wegħda lill-Mulej u qal: “Jekk tagħtini f’idejja dan il-poplu, neqred l-ibliet tagħhom.”

³ U l-Mulej sama’ t-talba ta’ Iżrael, u tahom f’idejhom il-Kangħanin. U qered lilhom u lil bliethom, u bdew isejħu dak il-post: Ħorma.

Is-serp tal-bronż

⁴ U telqu minn ħdejn il-muntanja Ħor mat-triq tal-Baħar tal-Qasab biex jeħduha bid-dawra mal-art ta’ Edom, imma l-poplu ddejjaq jimxi,

⁵ u beda jgerger kontra Alla u kontra Mosè: “Għala tellajtuna mill-Eġittu biex immutu fid-deżert? Mhawnx ħobż u lanqas ilma; aħna xbajna b’dan l-ikel ħafif.”

⁶ U l-Mulej bagħat sriep velenużi f’nofs il-poplu u bdew jigdmuhom; u mietu ħafna mill-poplu ta’ Iżrael.

⁷ U l-poplu mar għand Mosè, u qalulu: “Dnibna għax tkellimna kontra l-Mulej u kontra tiegħek. Itlob lill-Mulej ħa jwarrab is-sriep minn fostna.” U Mosè mar jitlob għall-poplu.

⁸ U l-Mulej kellem lil Mosè u qallu: “Agħmel serp tal-bronż velenuż, u arbulah bħal stendard; u kull min jingidem u jħares lejh ifiq u jgħix.”

⁹ U Mosè għamel serp tal-bronż, u arbulah bħal stendard. U ġara li kull min kien jigdmu s-serp kien iħares lejn is-serp tal-bronż, u kien ifiq u jgħix.

Ir-rebħa fuq Siħon

¹⁰ U wlied Iżrael telqu minn hemm u waqfu f’Obot;

¹¹ u telqu minn Obot u waqqfu l-kamp f’Għijje-għabarim fid-deżert li jiġi biswit Mowab, in-naħa ta’ tlugħ ix-xemx.

¹² Minn hemm reġgħu ċċaqilqu, u waqqfu l-kamp f’wied Żared.

¹³ Telqu minn hawn, u waqqfu l-kamp in-naħa l-oħra tax-xmara Arnon, fid-deżert, li ġejja mill-art tal-Amurrin; għax l-Arnon hi f’tarf Mowab, bejn Mowab u l-Amurrin.

¹⁴ Għalhekk jingħad fi Ktieb il-Gwerer tal-Mulej: “Waħeb f’Sufa u l-widien tal-Arnon,

¹⁵ u x-xaqliba tal-widien, li tieħu lejn l-għamajjar ta’ Għar, u tmiss ma’ truf Mowab.”

¹⁶ Minn hemm telqu lejn Bir; dan hu l-bir fejn il-Mulej qal lil Mosè: “Iġbor il-poplu flimkien u nagħtihom l-ilma.”

¹⁷ Imbagħad Iżrael għannew din l-għanja: “Fawwar ja bir! Għannulu!

¹⁸ Bir li ħaffruh il-prinċpijiet. U fetħuh il-kbarat tal-poplu bix-xettru u l-bsaten tagħhom.” U mid-deżert marru Mattana,

¹⁹ u minn Mattana sa Naħlijel, u minn Naħlijel għal Bamot,

²⁰ u minn Bamot għall-wied li hemm fir-raba’ ta’ Mowab taħt il-quċċata tal-muntanja ta’ Pisga li tħares lejn id-deżert.

²¹ Iżrael bagħat messaġġiera jgħidu lil Siħon, is-sultan tal-Amurrin;

²² “Ħa naqsam mill-art tiegħek. Ma ngħaddux mir-raba’ jew l-oqsma tad-dwieli; ma nixorbux mill-ilma tal-bjar. Ngħaddu mit-triq tas-sultan sakemm naqsmu l-fruntieri tiegħek.”

²³ Imma Siħon ma riedx iħalli lil Iżrael jaqsam il-fruntieri tiegħu; u ġabar il-poplu tiegħu kollu, u ħareġ jaħbat għal Iżrael fid-deżert, u kif wasal f’Ġaħas ħabat għal Iżrael.

²⁴ Imma Iżrael qeridhom b’xifer ix-xabla, u ħadlu artu, mill-Arnon sal-Ġabbok sal-art tal-Għammonin; għax Ġagħżer kienet fuq il-fruntiera tal-Għammonin.

²⁵ U Iżrael ħa dawk l-ibliet kollha, u għammar fl-ibliet kollha tal-Amurrin, f’Ħesbon, u fl-irħula kollha tagħha.

²⁶ Għax Ħesbon hi l-belt ta’ Siħon, is-sultan tal-Amurrin. Dan kien għamel gwerra lis-sultan ta’ Mowab ta’ qablu, u ħadlu minn idejh l-art kollha tiegħu sal-Arnon.

²⁷ Għalhekk jgħannu l-għannejja: “Ejjew Ħesbon! Tinbena u titla’ mill-ġdid il-belt ta’ Siħon.

²⁸ Ħareġ in-nar minn Ħesbon, ilsna tan-nar mill-belt ta’ Siħon. U kielu Għar-mowab; u ħarbtu l-għoljiet tal-Arnon.

²⁹ Ħażin għalik Mowab, int mitluf ġens ta’ Kemos. Telaq ’l ulied maħrubin, u l-bniet tiegħu mjassrin f’idejn Siħon, is-sultan tal-Amurrin.

³⁰ Minn Ħesbon sa Dibon kollox meqrud, kollox qridna minn Nofa, bin-nar sa Medeba!”

³¹ U Iżrael beda jgħammar fl-art tal-Amurrin.

Ir-rebħa fuq Għog

³² U Mosè bagħat xi rġiel jitkixxfu l-belt ta’ Ġagħżer; u Iżrael qabdu l-irħula tagħha, u keċċew l-Amurrin li kienu jgħammru hemm.

³³ Imbagħad daru u telgħu għat-triq ta’ Basan; u ħareġ għalihom Għog, is-sultan ta’ Basan, hu u l-poplu tiegħu kollu, biex jitqabad magħhom f’Edregħi.

³⁴ U l-Mulej qal lil Mosè: “Tibżgħux minnu għax f’idejk nerħih, lilu u l-poplu kollu tiegħu, u ’l artu; u tagħmillu bħalma għamilt lil Siħon, is-sultan tal-Amurrin, li kien joqgħod f’Ħesbon.”

³⁵ U ħabtu għalih, u għal uliedu, u għall-poplu kollu tiegħu, sakemm ma kien baqagħlu ebda wieħed; u ħadulu artu.