NUMRI 20 - IL-BIBBJA IL-KOTBA MQADDSA

Kapitlu 20 Ulied Iżrael jeħduha kontra l-Mulej

¹ U l-ġemgħa kollha ta’ wlied Iżrael waslu fid-deżert ta’ Sin fl-ewwel xahar, u l-poplu waqaf f’Kades; u mietet Mirjam u difnuha hemm.

² Billi ma kienx hemm ilma għall-poplu, inġabru kontra Mosè u Aron.

³ Il-poplu ħadha ma’ Mosè u qalulu: “Mhux li mitna meta nqerdu ħutna quddiem il-Mulej.

⁴ Għala ġibtu l-poplu tal-Mulej f’dan id-deżert, biex immutu hawn aħna u l-bhejjem tagħna?

⁵ Għala tellajtuna mill-Eġittu biex ġibtuna f’post mill-agħar bħal dan, fejn ma jikber xejn, la qmuħ, la tin, la dwieli, la rummien; u lanqas ma fih ilma tax-xorb.”

⁶ U Mosè u Aron telqu minn quddiem il-ġemgħa tal-poplu u marru ħdejn il-bieb tat-tinda tal-laqgħa, inxteħtu wiċċhom fl-art u dehritilhom il-glorja tal-Mulej.

⁷ U l-Mulej kellem lil Mosè u qallu:

⁸ “Ħu l-ħatar, u iġbor il-ġemgħa, int u ħuk Aron, u kellmu quddiemhom lill-blata, u din tagħti l-ilma tagħha; u hekk int toħorġilhom l-ilma mill-blata, u tisqi lill-ġemgħa u l-bhejjem tagħhom.”

⁹ U Mosè ħa l-ħatar minn quddiem il-Mulej, kif kien ordnalu.

¹⁰ U flimkien ma’ Aron ġabar il-ġemgħa quddiem il-blata, u Mosè qalilhom: “Isimgħuni, ja xewwiexa! Aħna se noħorġulkom l-ilma minn din il-blata?”

¹¹ U Mosè għolla idu, u ħabbat darbtejn fuq il-blata bil-ħatar u bdew ħerġin gliegel ta’ ilma, u xorbu l-ġemgħa u l-bhejjem kollha.

¹² U l-Mulej qal lil Mosè u lil Aron: “Għax intom ma emmintux fija, u ma ħaristulix qdusiti quddiem Iżrael, intom ma ddaħħlux lil din il-ġemgħa fl-art li se nagħtihom.”

¹³ Dawn huma l-ilmijiet ta’ Meriba, fejn ulied Iżrael ħaduha mal-Mulej, u hemm tahom prova ta’ qdusitu.

L-Edomin ma jħalluhomx jgħaddu

¹⁴ Mosè bagħat messaġġiera minn Kades, jgħidu lis-sultan ta’ Edom: ‘Dan jgħidlek ħuk Iżrael: Int taf bl-hemm kollu li sibna ruħna fih.

¹⁵ Missirijietna niżlu l-Eġittu, u baqgħu fl-Eġittu għal ħafna żmien, u l-Eġizzjani ħaqruna, lilna u ’l missirijietna.

¹⁶ Għajjatna lill-Mulej, u sama’ leħinna, u bagħat anġlu, u ħariġna mill-Eġittu. U hawn aħna f’Kades, belt f’tarf artek.

¹⁷ Ħa ngħaddu minn artek; ma ngħaddux mir-raba’, lanqas mill-oqsma tad-dwieli, u lanqas ma nixorbu l-ilma tal-bjar. Ngħaddu mit-triq tas-sultan, bla ma nilwu lejn il-lemin jew lejn ix-xellug, sakemm naqsmu artek.”

¹⁸ U Edom weġibhom: “Ma tgħaddux minn għandi, inkella noħroġ għalikom bix-xabla.”

¹⁹ U wlied Iżrael qalulu: “Nitilgħu mit-triq ewlenija; u jekk nixorbu mill-ilma tiegħek, jien u l-bhejjem tiegħi, inħallsek tiegħu. Kemm ngħaddi bil-mixi.”

²⁰ U wieġeb: “Ma tgħaddix.” U ħareġ Edom jilqagħhom b’forza qawwija u kotra ta’ nies.

²¹ Hekk Edom ma riedx iħalli lil Iżrael jaqsam l-art tiegħu, u Iżrael qabad triq oħra ’l bogħod minnu.

Il-mewt ta’ Aron

²² U wlied Iżrael refgħu l-kamp minn Kades, u l-ġemgħa kollha waslu ħdejn il-muntanja Ħor.

²³ U l-Mulej kellem lil Mosè u lil Aron ħdejn il-muntanja Ħor, f’tarf art Edom u qalilhom:

²⁴ “Aron se jinġabar ma’ niesu, għax mhux dieħel fl-art li tajt lil ulied Iżrael, għax intom merejtu kliemi ħdejn l-ilma ta’ Meriba.

²⁵ Ħu lil Aron u lil Elgħażar ibnu, u tellagħhom fuq il-muntanja Ħor,

²⁶ neżża’ lil Aron minn ilbiesu, u libbishom lil Elgħażar, ibnu; u jinġabar Aron ma’ niesu, u jmut hemm.”

²⁷ U Mosè għamel kif ordnalu l-Mulej. U telgħu fuq il-muntanja Ħor quddiem il-ġemgħa kollha.

²⁸ U neżża’ Mosè lil Aron minn ilbiesu u libbishom lil Elgħażar ibnu; u Aron miet hemm fuq il-quċċata tal-muntanja, u Mosè u Elgħażar niżlu minn fuq il-muntanja.

²⁹ U l-ġemgħa kollha rat li miet Aron, u l-familja kollha ta’ Iżrael bkietu għal tletin jum.