NUMRI 13 - IL-BIBBJA IL-KOTBA MQADDSA

Kapitlu 13 L-ispiji f’art Kangħan

¹ Il-Mulej kellem lil Mosè u qallu:

² “Ibgħat xi rġiel jitkixxfu l-art ta’ Kangħan li jien se nagħti lil ulied Iżrael. Ibgħat wieħed minn kull tribù ta’ missirijiethom. Ilkoll mill-kapijiet fosthom.”

³ U Mosè bagħathom mid-deżert ta’ Faran, skont ma qallu l-Mulej, kollha nies li kienu kapijiet ta’ wlied Iżrael.

⁴ Dawn kienu ismijiethom: Sammugħha bin Żakkur mit-tribù ta’ Ruben;

⁵ Safat bin Ħori mit-tribù ta’ Simgħon;

⁶ Kaleb bin Ġefunni mit-tribù ta’ Ġuda:

⁷ Igal bin Ġużeppi mit-tribù ta’ Issakar;

⁸ Ħosegħa bin Nun mit-tribù ta’ Efrajm;

⁹ Palti bin Rafu mit-tribù ta’ Benjamin;

¹⁰ Gaddijel bin Sudi mit-tribù ta’ Żebulun;

¹¹ Gaddi bin Susi mit-tribù ta’ Manassi minn nisel Ġużeppi;

¹² Għammijel bin Gemalli mit-tribù ta’ Dan;

¹³ Settur bin Mikiel mit-tribù ta’ Aser;

¹⁴ Naħbi bin Vofsi mit-tribù ta’ Naftali;

¹⁵ Gewel bin Maki mit-tribù ta’ Gad.

¹⁶ Dawn huma l-ismijiet ta’ dawk li Mosè bagħat jitkixxfu l-art; u lil Ħosegħa bin Nun, Mosè semmieh Ġożwè.

¹⁷ Mosè bagħathom jitkixxfu l-art ta’ Kangħan u qalilhom: “Itilgħu min-Negeb, u itilgħu qalb l-għoljiet.

¹⁸ Araw l-art x’inhi u n-nies li jgħammru fiha; jekk humiex f’saħħithom jew dgħajfa; jekk humiex ftit jew ħafna;

¹⁹ jekk l-art li jgħammru hijiex art tajba jew ħażina; u liema huma l-ibliet li jgħixu fihom; humiex miftuħa jew magħluqa bis-swar;

²⁰ jekk l-art hijiex għammiela jew ħawlija; fihiex siġar jew le. Agħmlu l-ħila u ħudu mill-frott tal-art.” Kien żmien il-bikri tal-għeneb.

²¹ U telgħu u tkixxfu l-art, mid-deżert ta’ Sin sa Reħob, in-naħa tad-daħla ta’ Ħamat.

²² Telgħu min-Negeb u waslu sa Ħebron, fejn kienu Aħiman, Sesaj, Talmaj, ulied Għanak. Ħebron kienet inbniet seba’ snin qabel Sogħan fl-Eġittu.

²³ Meta waslu fil-wied ta’ Eskol, qatgħu minn hemm fergħa b’għanqud għeneb, u refgħuh fuq lasta bejn tnejn; qatgħu wkoll ir-rummien u t-tin.

²⁴ U l-post sejħulu Naħal-eskol, b’tifkira tal-għanqud li qatgħu minn hemm ulied Iżrael.

²⁵ Reġgħu lura mit-tkixxif tal-art wara erbgħin jum.

²⁶ Malli waslu marru għand Mosè u Aron u l-ġemgħa kollha ta’ Iżrael fid-deżert ta’ Faran f’Kades. U qalulhom b’kollox, lilhom u lill-ġemgħa kollha ta’ Iżrael, u wrewhom il-frott tal-art.

²⁷ Irrakkuntawlu kulma raw, u qalu: “Morna fl-art li intom bgħattuna nitkixxfu, u tassew tnixxi ħalib u għasel; u dan hu l-frott tagħha;

²⁸ iżda n-nies li joqogħdu fiha huma nies ta’ saħħa, u l-ibliet magħluqa bis-swar u kbar ħafna. Hemm rajna ’l ulied Għanak;

²⁹ l-Għamalekin li jgħammru fin-Negeb; il-Ħittin, il-Ġebusin, l-Amurrin li jgħammru fuq l-għoljiet; u l-Kangħanin li jgħammru n-naħa tal-baħar u max-xtut tal-Ġordan.”

³⁰ Kaleb sikket il-poplu quddiem Mosè u qalilhom: “Infittxu nitilgħu, u neħduha f’idejna. Nistgħu nirbħuha għax nifilħu għaliha.”

³¹ U l-irġiel li telgħu miegħu qalu: “Ma nistgħux naħbtu għal poplu jiflaħ aktar minna.”

³² U xerrdu xniegħa ħażina fuq l-art li marru jitkixxfu lil ulied Iżrael, u qalulhom: “L-art, li dħalna fiha biex nitkixxfuha, tibla’ lil kull min imur jgħammar fiha, u l-popli kollha li rajna f’nofsha huma razza ta’ nies twal.

³³ Hemm rajna l-ġganti (ulied Għanak ġejjin mill-ġganti) u ħassejna ruħna bħal ġradijiet u hekk deherna aħna f’għajnejhom.”