NUMRI 12 - IL-BIBBJA IL-KOTBA MQADDSA

Kapitlu 12 Mirjam u Aron kontra Mosè

¹ Mirjam u Aron gergru kontra Mosè minħabba l-mara minn Kus, għax kien ħa b’martu waħda minn Kus.

² U huma qalu: “Jaqaw il-Mulej lil Mosè biss kellem? Ma kellimx lilna wkoll?” U l-Mulej semagħhom.

³ Mosè kien bniedem umli, l-aktar umli fost il-bnedmin li hawn fuq wiċċ l-art.

⁴ U l-Mulej minnufih qal lil Mosè, lil Aron u lil Mirjam: “Oħorġu t-tlieta li intom lejn it-tinda tal-laqgħa.” U ħarġu t-tlieta li kienu.

⁵ U niżel il-Mulej fil-kolonna tas-sħab, u qagħad fil-bieb tat-tinda u sejjaħ lil Aron u lil Mirjam, u resqu t-tnejn,

⁶ u qalilhom: “Isimgħu kliemi: Jekk xi ħadd minnkom ikun profeta, Jiena l-Mulej nidhirlu f’viżjoni, u nkellmu fil-ħolm.

⁷ Mhux hekk ma’ Mosè il-qaddej tiegħi, il-bniedem li fdajtlu dari.

⁸ Jien inkellmu wiċċ imb wiċċ; inkellmu mhux bix-xbihat imma bid-dieher; u jara s-sura tal-Mulej. Kif, mela, ma bżajtux titkellmu kontra Mosè, il-qaddej tiegħi?”

⁹ U l-Mulej xegħel bil-qilla għalihom, u telaq.

¹⁰ Kienet għadha anqas biss telgħet is-sħaba minn fuq it-tinda, meta Mirjam inksiet bil-ġdiem, bajda bħas-silġ; Aron ħares lejn Mirjam, u raha kollha ġdiem. U Aron qal lil Mosè:

¹¹ “Nitolbok, ja sidi, la tħalliniex nitgħabbew bil-piż tad-dnub, li aħna tbellahna biex għamilna.

¹² Tħallihiex qisha xi ħaġa mwielda mejta minn ġuf ommha, b’ġisimha nofsu mittiekel.”

¹³ U Mosè għajjat quddiem il-Mulej u qal: “O Alla nitolbok, fejjaqha.”

¹⁴ U l-Mulej wieġeb lil Mosè: “Li kieku missierha beżqilha f’wiċċha, ma kinetx tibqa’ mriegħxa bil-mistħija għal sebat ijiem? Mela ħalli tingħalaq għal sebat ijiem barra l-kamp, imbagħad terġgħu tilqgħuha f’nofskom.”

¹⁵ Għalhekk Mirjam ingħalqet barra l-kamp għal sebat ijiem, u l-poplu ma ċċaqlaqx qabel ma reġgħet inġiebet lura.

¹⁶ Imbagħad il-poplu telaq minn Ħaserot u waqqfu l-kamp fid-deżert ta’ Faran.