MARK 3 - IL-BIBBJA IL-KOTBA MQADDSA

Kapitlu 3 Ir-raġel b’idu niexfa

¹ Raġa’ daħal fis-sinagoga, u kien hemm raġel li kellu idu niexfa.

² U qagħdu jgħassulu jekk ifejqux f’jum is-Sibt, biex ikollhom fuqiex jixluh.

³ Imma hu qal lir-raġel li kellu idu niexfa: “Qum, ejja fin-nofs.”

⁴ Imbagħad staqsa lilhom: “X’jiswa li tagħmel nhar ta’ Sibt, ġid jew deni? Issalva ħajja jew toqtolha?” Iżda huma baqgħu siekta.

⁵ U xeħet ħarsa qalila madwaru fuqhom, imnikket għall-aħħar minħabba l-ebusija ta’ qalbhom, u qal lir-raġel: “Midd idek.” Dak meddha, u idu reġgħet ġiet f’saħħitha.

⁶ U l-Fariżej ħarġu; minnufih bdew jiftiehmu mal-Erodjani kontra tiegħu kif jeqirduh.

Kotra kbira f’xatt il-baħar

⁷ Ġesù telaq flimkien mad-dixxipli tiegħu għan-naħa tal-baħar, u kotra kbira mill-Galilija marret warajh; u mil-Lhudija,

⁸ minn Ġerusalemm, mill-Idumija, min-naħa l-oħra tal-Ġordan, u mill-inħawi ta’ Tir u Sidon, kotra kbira ta’ nies, li semgħu b’kulma kien għamel, marru ħdejh.

⁹ Hu qal lid-dixxipli tiegħu biex iżommulu dgħajsa mħejjija fil-qrib minħabba l-kotra, biex ma jagħfsux fuqu;

¹⁰ għax billi kien fejjaq ħafna nies dawk kollha li kellhom xi mard kienu jrossu fuqu biex imissuh.

¹¹ U l-ispirti ħżiena kull darba li kienu jilmħuh, kienu jinxteħtu fl-art quddiemu u jaqbdu jgħajtu: “Int l-Iben ta’ Alla!”

¹² Iżda hu kien jordnalhom bis-sħiħ biex ma jurux min kien.

Ġesù jagħżel it-Tnax

¹³ Tela’ fuq l-għolja u sejjaħ lejh lil dawk li ried. Huma resqu lejh,

¹⁴ u għażel tnax li semmiehom appostli biex jibqgħu miegħu u biex jibgħathom jippridkaw,

¹⁵ u jkollhom is-setgħa li jkeċċu x-xjaten.

¹⁶ Għażel mela t-Tnax: Xmun, li tah ukoll l-isem ta’ Pietru,

¹⁷ u Ġakbu ta’ Żebedew, u Ġwanni, ħu Ġakbu, li tahom ukoll l-isem ta’ Boanerges, jiġifieri wlied ir-ragħad,

¹⁸ u Indrì, u Filippu, u Bartilmew, u Mattew, u Tumas, u Ġakbu ta’ Alfew, u Taddew, u Xmun il-Kanani,

¹⁹ u Ġuda l-Iskarjota, dak li ttradieh.

Ġesù u Begħelżebul

²⁰ Imbagħad mar id-dar, u l-kotra reġgħet inġemgħet, hekk li anqas biss setgħu jieklu.

²¹ Qrabatu, malli semgħu, ħarġu biex iżommuh, għax qalu li tilef moħħu.

²² Il-kittieba li kienu niżlu minn Ġerusalemm bdew jgħidu: “Dan għandu fih lil Begħelżebul,” u wkoll, “Dan bis-saħħa tal-Prinċep tax-xjaten qiegħed ikeċċihom ix-xjaten.”

²³ Hu sejħilhom lejh u beda jkellimhom bil-parabboli: “Kif jista’ x-Xitan ikeċċi x-Xitan?

²⁴ Jekk saltna tinqasam fiha nfisha, dik is-saltna ma tistax iżżomm wieqfa.

²⁵ U jekk familja tinqasam fiha nfisha, dik il-familja ma tistax iżżomm wieqfa.

²⁶ Li kieku mela x-Xitan qam kontra tiegħu nnifsu u nfired, ma kienx jista’ jżomm sħiħ, imma jkun wasal fit-tmiem.

²⁷ Ħadd ma jista’ jidħol fid-dar ta’ wieħed qawwi u jaħtaflu ġidu jekk qabel ma jkunx rabat lil dak il-qawwi; imbagħad id-dar jaħtafhielu żgur.

²⁸ Tassew ngħidilkom, kollox jinħafrilhom lil ulied il-bniedem, id-dnubiet u d-dagħa kollu li jidgħu.

²⁹ Imma min jieqaf lill-Ispirtu s-Santu ma jkollu qatt maħfra; jibqa’ ħati għal dejjem.”

³⁰ Għax kienu qalu: “Għandu fih spirtu ħażin.”

Omm Ġesù u ħutu

³¹ Darba ġew ommu u ħutu, baqgħu barra u bagħtu jsejħulu.

³² Dak il-ħin kien hemm ħafna nies bilqiegħda madwaru. “Ara,” qalulu, “ommok u ħutek qegħdin hemm barra u jriduk.”

³³ U hu weġibhom: “Min huma ommi u ħuti?”

³⁴ Imbagħad dawwar ħarstu fuq dawk li kien hemm madwaru bilqiegħda, u qal: “Dawn, ara, huma ommi u ħuti.

³⁵ Kull min jagħmel ir-rieda ta’ Alla, dak huwa ħija, u oħti, u ommi.”