LUQA 18 - IL-BIBBJA IL-KOTBA MQADDSA

Kapitlu 18 Il-parabbola tal-imħallef u l-armla

¹ Imbagħad qalilhom parabbola biex jurihom li għandhom dejjem jitolbu bla ma jaqtgħu.

² Qalilhom: “Kien hemm f’belt wieħed imħallef, li la kien jibża’ minn Alla u lanqas iħabbel rasu minn ħadd.

³ F’dik il-belt kien hemm waħda armla, u kienet tmur għandu u tgħidlu, ‘Agħmilli ħaqq kontra l-għadu tiegħi.’

⁴ Hu ma riedx, u dam ħafna hekk; iżda mbagħad bejnu u bejn ruħu qal, ‘Mhux għax nibża’ minn Alla jew għax se nħabbel rasi min-nies,

⁵ imma għallinqas għax din l-armla dejqitni; ħa nagħmlilha ħaqq, biex ma tibqax ġejja u sejra sa ma tifnini.’ ”

⁶ U l-Mulej qal: “Isimgħu ftit x’jgħid l-imħallef il-ħażin.

⁷ Imbagħad Alla, lill-magħżulin tiegħu li jgħajtulu lejl u nhar, sejjer ma jagħmlilhomx ħaqq? Se joqgħod itawwal magħhom?

⁸ Jiena ngħidilkom li malajr jagħmlilhom ħaqq. Imma taħsbu intom li Bin il-bniedem se jsib il-fidi fuq l-art meta jiġi?”

Il-parabbola tal-Fariżew u l-pubblikan

⁹ Kien hemm uħud li kienu jafdaw fihom infushom li huma ġusti u kienu jmaqdru lill-oħrajn. Ġesù qalilhom din il-parabbola:

¹⁰ “Żewġt irġiel, wieħed Fariżew u l-ieħor pubblikan, telgħu fit-tempju biex jitolbu.

¹¹ Il-Fariżew, wieqaf, talab hekk f’qalbu, ‘O Alla, niżżik ħajr li m’iniex bħall-bqija tal-bnedmin, ħalliela, inġusti, żienja, jew ukoll bħal dan il-pubblikan.

¹² Jiena nsum darbtejn fil-ġimgħa u nħallas l-għexur ta’ kulma ndaħħal.’

¹³ Iżda l-pubblikan, bilwieqfa fil-bogħod anqas biss ried jerfa’ għajnejh lejn is-sema, imma beda jħabbat fuq sidru u jgħid: ‘O Alla, ħenn għalija, għax jien midneb!’

¹⁴ Ngħidilkom jien li dan, u mhux l-ieħor, niżel id-dar iġġustifikat. Għax kull min jitkabbar, jiċċekken; u min jiċċekken, jitkabbar.”

Ġesù jbierek it-tfal iż-żgħar

¹⁵ Ġabulu wkoll quddiemu t-trabi biex iberikhom. Imma d-dixxipli, kif raw dan, qabdu jgħajtu magħhom.

¹⁶ Ġesù sejħilhom u qalilhom: “Ħalluhom lit-tfal iż-żgħar jiġu għandi, u żżommuhomx, għax ta’ min hu bħalhom hija s-Saltna ta’ Alla.

¹⁷ Tassew ngħidilkom, li min is-Saltna ta’ Alla ma jilqagħhiex bħal tifel ċkejken ma jidħolx fiha.”

Il-kap li kien għani

¹⁸ Wieħed kap staqsieh u qallu: “Mgħallem tajjeb, x’għandi nagħmel biex nikseb il-ħajja ta’ dejjem?”

¹⁹ “Għaliex qiegħed issejjaħli ‘tajjeb’?” qallu Ġesù, “Ħadd ma hu tajjeb ħlief Alla waħdu.

²⁰ Inti l-kmandamenti tafhom: La tiżnix, la toqtolx, la tisraqx, la tixhidx fil-falz, weġġaħ lil missierek u ’l ommok.”

²¹ Dak qallu: “Jiena dan kollu ili nħarsu minn żgħożiti.”

²² Kif semgħu jgħid hekk, Ġesù qallu: “Ħaġa waħda tonqsok: bigħ kulma għandek, agħtih lill-foqra, u jkollok teżor fis-smewwiet: imbagħad ejja u imxi warajja.”

²³ Iżda dak, meta semgħu jgħid dan, sewwed qalbu ħafna, għax kien tassew għani.

²⁴ Ġesù, meta rah li sewwed qalbu, qal: “Kemm hi iebsa għall-għonja li jidħlu fis-Saltna ta’ Alla!

²⁵ Għax eħfef li ġemel jgħaddi minn għajn ta’ labra milli wieħed għani jidħol fis-Saltna ta’ Alla!”

²⁶ Dawk li semgħuh qalulu: “Mela min jista’ jsalva?”

²⁷ Iżda hu weġibhom: “Dak li ma jistax ikun għall-bnedmin, għal Alla jista’ jkun.”

²⁸ Qallu Pietru: “Tajjeb! Aħna ħallejna kulma kellna u ġejna warajk.”

²⁹ Ġesù qalilhom: “Tassew ngħidilkom, li fost dawk kollha li minħabba s-Saltna ta’ Alla jħallu darhom jew lil marthom jew lil ħuthom jew lill-ġenituri tagħhom jew ’l uliedhom,

³⁰ ma hemm ħadd fosthom li f’din id-dinja stess ma jirċevix kollox għal mitt darba iktar, u l-ħajja ta’ dejjem fiż-żmien li ġej.”

It-tielet taħbira tal-mewt u tal-qawmien

³¹ Ġesù sejjaħ lejh it-Tnax u qalilhom: “Ara, issa aħna telgħin Ġerusalemm, u jseħħ kulma kitbu l-profeti fuq Bin il-bniedem.

³² Għax se jagħtuh f’idejn il-pagani u jiddieħku bih, iżebilħuh u jobżqulu fuqu,

³³ jagħtuh is-swat u joqtluh, u fit-tielet jum iqum mill-imwiet.”

³⁴ Iżda minn dan kollu ma fehmu xejn; kien diskors li baqa’ mistur għalihom, u ma fehmu xejn milli qal.

Ġesù jfejjaq l-agħma ta’ Ġeriko

³⁵ Ġara li, huwa u riesaq lejn Ġeriko, kien hemm wieħed agħma bilqiegħda mal-ġenb tat-triq jittallab il-karità.

³⁶ Dan sama’ l-kotra tan-nies għaddejja u beda jistaqsi x’ġara.

³⁷ U qalulu li kien għaddej Ġesù ta’ Nazaret.

³⁸ Hu qabad jgħajjat u jgħid: “Ġesù, Bin David, ikollok ħniena minni!”

³⁹ Dawk li kienu mexjin quddiem bdew iċanfruh u jsikktuh, imma hu aktar issokta jgħajjat: “Bin David, ikollok ħniena minni!”

⁴⁰ Ġesù waqaf u ordna li jressquhulu quddiemu. Meta resaq, staqsieh:

⁴¹ “Xi tridni nagħmillek?” “Li nara, Mulej,” wieġbu dak.

⁴² U Ġesù qallu: “Ara, iva! Il-fidi tiegħek salvatek.”

⁴³ U minnufih beda jara, u baqa’ miexi warajh jagħti glorja lil Alla. U l-poplu kollu li ra dan beda jfaħħar lil Alla.