LEVITIKU 3 - IL-BIBBJA IL-KOTBA MQADDSA

Kapitlu 3 Sagrifiċċji tas-sliem

¹ “Jekk xi ħadd joffri sagrifiċċju tas-sliem, jekk l-offerta tkun mill-baqar, għandu joffriha bla difett, raġel jew mara, quddiem il-Mulej.

² Iqiegħed idu fuq ras il-vittma, u joqtolha fil-bieb tat-tinda tal-laqgħa, u l-qassisin, ulied Aron, ixerrdu d-demm madwar l-artal.

³ Hu joffri mill-vittma tas-sliem biex jinħaraq quddiem il-Mulej ix-xaħam li jiksi l-ġewwieni u x-xaħam kollu ta’ fuq il-ġewwieni,

⁴ iż-żewġ kilwiet, u x-xaħam ta’ fuqhom ta’ mal-ġenbejn, u t-tebqa tal-fwied, li tinqala’ minn ħdejn il-kliewi.

⁵ U wlied Aron imbagħad jaħarquh fuq il-vittma ta’ fuq il-ħatab, li jkun hemm fuq in-nar; ħruq ta’ riħa tfuħ lill-Mulej.

⁶ “Jekk xi ħadd joffri sagrifiċċju tas-sliem mill-imrieħel lill-Mulej, l-offerta, raġel jew mara, għandha tkun bla difett.

⁷ Jekk l-offerta tkun ta’ ħaruf, iġibu quddiem il-Mulej,

⁸ iqiegħed idu fuq ras il-vittma u joqtlu fil-bieb tat-tinda tal-laqgħa, u wlied Aron ixerrdu d-demm madwar l-artal.

⁹ Mill-vittma tas-sliem jagħti għall-ħruq lill-Mulej: xaħamha, id-denb sħiħ, li jaqtgħu minn ħdejn is-sinsla, u x-xaħam li jiksi l-ġewwieni u x-xaħam kollu ta’ fuq il-ġewwieni,

¹⁰ u ż-żewġ kilwiet u x-xaħam ta’ fuqhom ta’ mal-ġenbejn, it-tebqa tal-fwied, li tinqala’ minn ħdejn il-kliewi.

¹¹ Imbagħad il-qassis jaħraq kollox fuq l-artal bħala ikel maħruq lill-Mulej.

¹² “Jekk xi ħadd joffri mogħża, iġibha quddiem il-Mulej;

¹³ iqiegħed idu fuq rasha, u joqtolha fil-bieb tat-tinda tal-laqgħa, u wlied Aron ixerrdu d-demm tagħha madwar l-artal.

¹⁴ U joffri minnha bħala offerta tiegħu għall-ħruq quddiem il-Mulej ix-xaħam li jiksi l-ġewwieni, u x-xaħam kollu ta’ fuq il-ġewwieni

¹⁵ u ż-żewġ kilwiet u x-xaħam ta’ mal-ġenbejn, u t-tebqa tal-fwied li tinqata’ minn ħdejn il-kliewi.

¹⁶ Imbagħad il-qassis jaħraqhom fuq l-artal, ikel maħruq ta’ riħa tfuħ. Ix-xaħam kollu jmiss lill-Mulej.

¹⁷ “Din hi liġi għal dejjem minn ġenerazzjoni għal oħra, tkun fejn tkun tgħammar. La tiekol ebda xaħam u ebda demm.”