LEVITIKU 24 - IL-BIBBJA IL-KOTBA MQADDSA

Kapitlu 24 L-imnara u l-ħobż tal-preżenza

¹ U l-Mulej kellem lil Mosè u qallu:

² “Ordna lil ulied Iżrael iġibulek żejt pur taż-żebbuġ misħuq għall-imnara, biex tixgħel l-imsiebaħ kuljum.

³ Aron imbagħad iħejjih bl-ordni ’l barra mill-velu, quddiem ix-xhieda miktuba fit-tinda tal-laqgħa, minn filgħaxija sa filgħodu quddiem il-Mulej, kuljum; din hi liġi għal dejjem għall-ġenerazzjonijiet kollha tagħkom.

⁴ Jieħu ħsieb kuljum l-imsiebaħ fuq l-imnara nadifa quddiem il-Mulej.

⁵ “Ħu wkoll dqiq fin u aħbeż tnax-il ftira, b’żewġ għexur ta’ efa dqiq il-waħda.

⁶ Qegħedhom f’żewġ ringieli, sitta kull waħda, fuq il-mejda tad-deheb fin quddiem il-Mulej.

⁷ Roxx inċens pur fuq ir-ringieli, u jkun fuq il-ħobż bħal tifkira, li tinħaraq f’ġieħ il-Mulej.

⁸ Kull nhar ta’ Sibt iqegħduhom bl-ordni dejjem quddiem il-Mulej, patt għal dejjem għal ulied Iżrael.

⁹ Imbagħad ikunu ta’ Aron u ta’ wliedu, u jikluhom f’post imqaddes, għax hi ħaġa mill-aktar qaddisa li tmiss lilu bi dritt mill-offerti tal-ħruq lill-Mulej għal dejjem.”

Kastigi għall-midgħi bl-Isem tal-Mulej

¹⁰ Kien hemm wieħed bin mara Iżraelija u raġel Eġizzjan; u dan ħareġ f’nofs ulied Iżrael. U ġġieldu fil-kamp bin il-mara Iżraelija u raġel minn Iżrael.

¹¹ U bin l-Iżraelija dagħa bl-Isem u seħtu; imbagħad ġibuh quddiem Mosè. Ommu kien jisimha Selomit bint Dibri, mit-tribù ta’ Dan.

¹² U ħallewh fl-għassa, sakemm il-Mulej jurihom x’kellhom jagħmlu.

¹³ U l-Mulej kellem lil Mosè u qallu:

¹⁴ “Oħroġ lil dak il-midgħi barra mill-kamp, u jqiegħdu idejhom fuq rasu dawk kollha li semgħuh jidgħi, u l-poplu kollu jħaġġru.

¹⁵ Imbagħad kellem lil ulied Iżrael u għidilhom: Kull min jisħet lil Alla tiegħu, jitgħabba bil-piż ta’ dnubu,

¹⁶ u min jidgħi b’isem il-Mulej jagħtuh il-mewt, u tħaġġru l-ġemgħa kollha, sew jekk ikun barrani, sew jekk ikun mill-pajjiż; kull min jidgħi bl-Isem jagħtuh il-mewt.

¹⁷ “Kull min jaħbat għal bniedem u joqtlu, jagħtuh il-mewt.

¹⁸ U kull min jaħbat għal bhima, iroddha, ħajja b’ħajja.

¹⁹ Min jagħmel xi ħsara lil għajru, jagħmlulu bħalma jkun għamel hu;

²⁰ ksur bi ksur, għajn b’għajn, sinna b’sinna; il-ħsara li jkun għamel lil ħaddieħor, jagħmluha lilu.

²¹ Min joqtol bhima, iroddha; u min joqtol bniedem jagħtuh il-mewt.

²² Liġi waħda jkollkom sew għall-barrani u sew għan-nies mill-pajjiż; għax jiena l-Mulej Alla tagħkom.”

²³ U meta Mosè kellem lil ulied Iżrael, ħarġu lill-midgħi barra l-kamp, u ħaġġruh. Hekk għamlu wlied Iżrael, skont ma kien ordna l-Mulej lil Mosè.