LEVITIKU 23 - IL-BIBBJA IL-KOTBA MQADDSA

Kapitlu 23 Il-festi: il-ħarsien tas-Sibt

¹ U l-Mulej kellem lil Mosè u qallu:

² “Kellem lil ulied Iżrael u għidilhom: Il-festi tal-Mulej, li intom tniedu, il-laqgħat imqaddsa, dawn huma festi tiegħi.

³ Għal sitt ijiem tagħmel ix-xogħol tiegħek, u fis-seba’ jum ikun is-Sibt tal-mistrieħ u l-laqgħa mqaddsa; ebda xogħol ma tagħmlu, għax hu l-mistrieħ tal-Mulej, kull fejn tkunu tgħammru.

⁴ Dawn huma l-festi tal-Mulej, il-laqgħat imqaddsa li għandkom tniedu fi żmienhom.

Il-festa tal-Għid

⁵ “Fl-ewwel xahar, fl-erbatax tax-xahar, filgħaxija bejn ħajta dawl u oħra dlam, l-Għid tal-Mulej.

⁶ U fil-ħmistax-il jum tal-istess xahar issir il-festa tal-ħobż ażżmu lill-Mulej; għal sebat ijiem tieklu ħobż bla ħmira.

⁷ Fl-ewwel jum ikollkom il-laqgħa mqaddsa, u ma tagħmlu ebda xogħol.

⁸ Għal sebat ijiem toffru sagrifiċċju tal-ħruq lill-Mulej, u fis-seba’ jum issir laqgħa mqaddsa u ma tagħmlu ebda xogħol.”

⁹ U l-Mulej kellem lil Mosè u qallu:

¹⁰ “Kellem lil ulied Iżrael u għidilhom: Meta tidħlu fl-art li jien se nagħtikom u taħsdu l-ħsad, ġibu l-ewwel qatta tal-ħsad lill-qassis.

¹¹ U hu jxejjirha quddiem il-Mulej, biex togħġbuh; ixejjirha l-għada tas-Sibt.

¹² Dak in-nhar li l-qassis ixejjer il-qatta tagħkom, intom toffru ħaruf, tas-sena, bla difett, b’sagrifiċċju tal-ħruq lill-Mulej,

¹³ bl-offerta tal-qmuħ miegħu ta’ żewġ għexur ta’ efa dqiq miblul fiż-żejt, biex jinħaraq b’riħa tfuħ lill-Mulej u tiswiba ta’ libazzjoni ta’ kwart ta’ ħinn inbid.

¹⁴ Ħobż u qamħ inkaljat jew nej ma tiklux f’dan il-jum, qabel ma ġġibu l-offerta ta’ Alla tagħkom. Din hi liġi għal dejjem għall-ġenerazzjonijiet kollha kull fejn tkunu.”

Għid il-Ħamsin

¹⁵ “Għoddu seba’ ġimgħat sħaħ mill-għada tas-Sibt, u minn meta tkunu offrejtu l-qatta u xejjirtuha quddiem il-Mulej.

¹⁶ Tgħoddu ħamsin jum sal-għada tas-seba’ Sibt; imbagħad iġġibu offerta ġdida tal-qamħ lill-Mulej.

¹⁷ Minn kull fejn tgħammru ġġibu żewġ ħobżiet għat-tixjir, ta’ żewġ għexur ta’ efa dqiq moħmija bil-ħmira, bħala offerta tal-bikri lill-Mulej.

¹⁸ U toffru wkoll mal-ħobż sebat iħrief bla difett, tas-sena, u għoġol, u żewġ bdabad għal sagrifiċċju tal-ħruq lill-Mulej; u offerta tal-qmuħ u tiswiba magħhom; ħruq b’riħa tfuħ lill-Mulej.

¹⁹ Toffru wkoll bodbod b’sagrifiċċju tal-purifikazzjoni, u żewġt iħrief tas-sena b’sagrifiċċju tas-sliem.

²⁰ U l-qassis ixejjirhom flimkien mal-ħobż tal-bikri u maż-żewġt iħrief, tixjira quddiem il-Mulej; u jkunu mqaddsin lill-Mulej, u jibqgħu għall-qassis.

²¹ Dak in-nhar stess issejħu u jkollkom laqgħa mqaddsa; ma tagħmlu ebda xogħol. Liġi għal dejjem għall-ġenerazzjonijiet kollha kull fejn tkunu.

²² “Meta taħsdu l-ħsad ta’ artkom, tibqax sejjer taħsad sa tarf l-għalqa, u la tlaqqatx li jaqa’ mill-ħsad tiegħek; ħallih għall-fqir u għall-barrani: Jiena l-Mulej Alla tagħkom.”

L-ewwel tas-sena ċivili

²³ U l-Mulej kellem lil Mosè u qallu:

²⁴ “Kellem lil ulied Iżrael u għidilhom: Fis-seba’ xahar, fl-ewwel tax-xahar, ikollkom mistrieħ kbir, taħbira bit-trombi u laqgħa mqaddsa.

²⁵ Ma tagħmlu ebda xogħol iebes, u toffru sagrifiċċju tal-ħruq lill-Mulej.”

Jum l-Espjazzjoni

²⁶ U l-Mulej kellem lil Mosè u qallu:

²⁷ “Fl-għaxra ta’ dan is-seba’ xahar ikun Jum l-Espjazzjoni; ikollkom laqgħa mqaddsa, u tgħakksu ruħkom, u toffru sagrifiċċju tal-ħruq lill-Mulej.

²⁸ Ma tagħmlu ebda xogħol dak in-nhar; għaliex hu jum l-espjazzjoni, meta ssir l-espjazzjoni għalikom quddiem il-Mulej Alla tagħkom.

²⁹ Kull min ma jitgħakkisx dak in-nhar jinqata’ ’l barra mill-poplu tiegħu.

³⁰ U kull min jagħmel xi xogħol dak in-nhar neqirdu mill-poplu tiegħu.

³¹ La tagħmlu ebda xogħol. Din hi liġi għal dejjem għall-ġenerazzjonijiet kollha kull fejn tkunu tgħammru.

³² Ikollkom il-mistrieħ tas-Sibt u titgħakksu; fid-disa’ jum tax-xahar filgħaxija, minn filgħaxija sa filgħaxija, tieħdu l-mistrieħ tagħkom.”

Il-festa tal-Għerejjex

³³ U l-Mulej kellem lil Mosè u qallu:

³⁴ “Kellem lil ulied Iżrael u għidilhom: Fil-ħmistax ta’ dan is-seba’ xahar, tagħmlu l-festa tal-Għerejjex għal sebat ijiem f’ġieħ il-Mulej.

³⁵ “Fl-ewwel jum ikollkom laqgħa mqaddsa; ma tagħmlu ebda xogħol.

³⁶ Għal sebat ijiem toffru s-sagrifiċċju tal-ħruq lill-Mulej; fit-tmien jum ikollkom laqgħa mqaddsa; dak in-nhar toffru sagrifiċċju tal-ħruq lill-Mulej; tkun laqgħa solenni, ma tagħmlu ebda xogħol dak in-nhar.

³⁷ “Dawn huma l-festi tal-Mulej li għandkom tniedu, u fihom tagħmlu l-laqgħat imqaddsa, u toffru lill-Mulej il-vittmi bin-nar; is-sagrifiċċji tal-ħruq, l-offerti tal-qmuħ, sagrifiċċji u tiswib, kull ħaġa fil-jum tagħha,

³⁸ barra mis-Sibtijiet tal-Mulej, u barra mill-għotjiet tagħkom, u l-wegħdiet tagħkom u l-offerti ta’ devozzjoni, li tkunu tridu tagħtu lill-Mulej.

³⁹ “Fil-ħmistax tas-seba’ xahar, meta tkunu ġbartu l-frott tal-art, tagħmlu l-festa tal-Mulej għal sebat ijiem, bil-mistrieħ tas-Sibt fl-ewwel u fit-tmien jum.

⁴⁰ Fl-ewwel jum tieħdu l-frott ta’ siġar sbieħ, friegħi tal-palm friegħi tas-siġar ħodor, żafżâf tax-xmara, u tifirħu quddiem il-Mulej Alla tagħkom għal sebat ijiem.

⁴¹ U tagħmlu festa f’ġieħ il-Mulej ta’ sebat ijiem fis-sena. Din hi liġi għal dejjem għall-ġenerazzjonijiet kollha tagħkom. Tagħmluha fis-seba’ xahar tas-sena.

⁴² Tgħammru fl-għerejjex għal sebat ijiem; kull min twieled f’Iżrael jgħammar fl-għarix,

⁴³ biex ikunu jafu dawk li jiġu warajkom li wlied Iżrael kienu jgħammru fl-għerejjex meta jien ħriġthom mill-art tal-Eġittu: Jiena l-Mulej Alla tagħkom.”

⁴⁴ U Mosè nieda l-festi tal-Mulej lil ulied Iżrael.