LEVITIKU 20 - IL-BIBBJA IL-KOTBA MQADDSA

Kapitlu 20 Pieni u kastigi

¹ Il-Mulej kellem lil Mosè u qallu:

² “Għid lil ulied Iżrael: Jekk xi ħadd minn ulied Iżrael, jew mill-barranin li jgħammru f’Iżrael, jagħti ’l xi ħadd minn nislu lil Molek, jagħtuh il-mewt billi jħaġġru l-poplu.

³ U jien indur għalih, u neqirdu minn fost il-poplu tiegħu, għax ikun ta lil nislu lil Molek, u niġġes is-santwarju tiegħi u pprofana l-isem qaddis tiegħi.

⁴ U jekk il-poplu jagħlaq għajnejh għal dan il-bniedem, li jkun ta ’l nislu lil Molek, u ma jagħtuhx il-mewt,

⁵ nixħet jien għajnejja fuqu, u fuq niesu, u neqred lilu u lil kull min fost il-poplu mar warajh biex jiżni wara Molek.

⁶ ‘Min imur għand is-saħħara li jsejħu l-erwieħ u għand min jeħber, biex jiżni warajhom, indur għalih u neqirdu minn fost il-poplu.

⁷ “Tqaddsu, u kunu qaddisin, għax jien il-Mulej Alla tagħkom.

⁸ Ħarsu l-liġijiet tiegħi u agħmluhom: Jiena l-Mulej, li jqaddiskom.

⁹ “Il-bniedem li jidgħi lil missieru u ’l ommu jagħtuh il-mewt; ikun ġieb il-mewt b’idejh għax ikun dagħa lil missieru u lil ommu.

¹⁰ “Il-bniedem li jiżni ma’ mart għajru jagħtuhom il-mewt, liż-żieni u liż-żienja.

¹¹ “Ir-raġel li jimtedd ma’ mart missieru, ikun kixef l-għera ta’ missieru; joqtluhom it-tnejn; demmhom fuqhom.

¹² “Ir-raġel li jkun imtedd ma’ mart ibnu, jagħtuhom il-mewt it-tnejn, għax ikunu għamlu ħaġa faħxija; demmhom fuqhom.

¹³ “Meta raġel jimtedd ma’ raġel bħalma jimtedd ma’ mara, it-tnejn ikunu għamlu ħaġa moqżieża: jagħtuhom il-mewt; demmhom fuqhom.

¹⁴ “Wieħed li jkun iżżewweġ lil mara u ’l ommha jkunu għamlu ħaġa moqżieża: jaħarqu lilu u lilhom, u hekk ma jkunx hemm f’nofskom dan il-qżież.

¹⁵ “Wieħed li jimtedd ma’ bhima jagħtuh il-mewt, u l-bhima toqtluha.

¹⁶ “Mara li tersaq lejn xi bhima biex titħallat magħha, għandek toqtol lilha u l-bhima; għandhom imutu; demmhom fuqhom.

¹⁷ “Li wieħed jiżżewweġ lil oħtu, bint missieru jew bint ommu, u hu jara l-għera tagħha u hi tara l-għera tiegħu, tkun ħaġa ta’ għajb; jinqatgħu t-tnejn minn fost il-poplu, għax ikun kixef l-għera ta’ oħtu, u jitgħabba bil-piż ta’ dnubu.

¹⁸ “Jekk wieħed jimtedd ma’ mara fi żmienha, u jikxef l-għera tagħha, hu jkun kixef l-inxija tagħha, u hi kixfitlu l-inxija ta’ demmha; it-tnejn għandhom jinqatgħu minn fost il-poplu.

¹⁹ “La tikxifx l-għera ta’ oħt ommok jew oħt missierek, għax tkun kxift l-għera ta’ qrabatek; u jkollhom jitgħabbew bil-piż ta’ dnubhom.

²⁰ “Raġel li jimtedd mal-mara ta’ ħu missieru, ikun kixef l-għera ta’ ħu missieru; it-tnejn jitgħabbew bil-piż ta’ dnubhom, u jmutu bla wlied.

²¹ “Min jiżżewweġ lill-mara ta’ ħuh ikun għamel ħaġa moqżieża, għax ikun kixef l-għera ta’ ħuh, u jibqa’ bla wlied.”

Eżortazzjoni għall-qdusija

²² “Ħarsu l-liġijiet tiegħi kollha u d-digrieti tiegħi kollha, u agħmluhom, li ma tobżoqkomx ’il barra l-art li fiha jien se neħodkom biex tgħammru fiha.

²³ La timxux skont il-liġijiet tal-ġnus li jien se nkeċċi minn quddiemkom, għax dan kollu għamluh u jien stkerrahthom.

²⁴ Imma lilkom ngħidilkom: Intom tirtu l-art tagħhom u jien nagħtihielkom biex tirtuha, art tnixxi ħalib u għasel; jiena l-Mulej Alla tagħkom, li għażiltkom minn fost il-ġnus.

²⁵ U intom għandkom tagħżlu bejn il-bhejjem safja u l-bhejjem imniġġsa, u bejn it-tajr safi u t-tajr imniġġes. La titniġġsux bl-ebda bhima jew tajra jew kull ħliqa li titkaxkar fl-art, li jien għażiltilkom bħala mniġġsin.

²⁶ U tkunu għalija qaddisin, għax qaddis jien il-Mulej, u għażiltkom minn fost il-popli biex tkunu tiegħi.

²⁷ “Jekk xi ħadd minn fostkom, raġel jew mara, isejjaħ l-erwieħ jew jeħber, għandhom jagħtuhom il-mewt billi jħaġġruhom; demmhom fuqhom.”