KOĦÈLET 6 - IL-BIBBJA IL-KOTBA MQADDSA

Kapitlu 6

¹ Hemm gwaj ieħor li rajt taħt ix-xemx u dan jifni ħafna lill-bniedem.

² Lil wieħed Alla tah għana, ġid u unuri, hekk li xejn ma jonqsu minn dak li tixtieq qalbu; u mbagħad ma jħallihx igawdih hu, iżda ieħor barrani jgawdih. Dan ukoll frugħa u gwaj tassew kiefer.

³ Li kellu bniedem inissel mitt tifel u jgħix għal bosta snin u jtawwal għomru, jekk qalbu ma timteliex b’dan il-ġid u ma jkollux qabar fejn jindifen, jien ngħid: “Aħjar minnu frott il-ġuf li twieled mejjet;

⁴ għax għalkemm ġie għal xejn u jmur fid-dlam fejn jibqa’ mistur ismu,

⁵ għalkemm ma rax ix-xemx, u lanqas jaf biha, dan għandu mistrieħ akbar mill-ieħor.

⁶ U li kellu l-għani jgħix elfejn sena u ma jkollux tgawdija minn ġidu, mhux fl-istess post imur bħall-imwieled mejjet?”

⁷ It-taħbit tal-bniedem hu kollu għal żaqqu, u b’danakollu qatt mhi xebgħana qalbu.

⁸ U x’għandu aħjar l-għaref mill-iblah, jew il-fqir li jaf imur tajjeb mal-ħajjin?

⁹ Aħjar tara b’għajnejk milli ssiefer bil-ħsieb. Imma dan ukoll frugħa u ġiri wara r-riħ.

¹⁰ Kulma jeżisti diġà magħruf minn ismu; għalhekk nafu x’inhu l-bniedem. Ma jistax dan iħaqqaqha ma’ min hu aqwa minnu.

¹¹ Aktar ma jkun hemm kliem, akbar tkun il-frugħa; imbagħad x’se jieħu l-bniedem minn dan kollu?

¹² Min jaf x’inhu tajjeb għall-bniedem f’ħajtu, tul il-ġranet magħduda tal-ħajja fiergħa tiegħu li hu jqatta’ bħal dell? Min jista’ jurih lill-bniedem x’għad isir warajh taħt ix-xemx?