KOĦÈLET 5 - IL-BIBBJA IL-KOTBA MQADDSA

Kapitlu 5

¹ Tiftaħx fommok kif ġieb u laħaq, u tiddeċiedi xejn addoċċ quddiem Alla, għax Alla fis-sema qiegħed u inti fuq l-art; ħa jkun, mela, ftit il-kliem tiegħek.

² Għax, mill-ħafna tħassib jiġi l-ħolm ikrah, u mill-ħafna tpaċpiċ il-kliem bla għaqal.

³ Jekk tagħmel xi wegħda ’l Alla ddumx ma ttemmha, għax Alla ma jiħux pjaċir bil-boloh. Dak li twiegħed qis li tagħmlu.

⁴ Aħjar ma twiegħed xejn milli ma żżommx dak li twiegħed.

⁵ Tħallix ilsienek iwaqqgħek fil-ħtija u mbagħad tmur quddiem il-qassis tgħidlu: “Dan kien nuqqas ta’ ħsieb”.

⁶ Għaliex trid bi kliemek iġġiegħel ’l Alla jinkorla u jġib fix-xejn dak li għamlu idejk? Għax fejn joktor il-ħolm, joktor il-kliem fieragħ. Inti, mela, ibża’ minn Alla.

⁷ Jekk f’xi qasam tal-pajjiż tara l-fqir jinħaqar u d-dritt u l-ħaqq mirfusa, m’għandekx tistagħġeb b’dan, għax kull uffiċjal hemm wieħed ogħla għassa tiegħu, u fuqhom it-tnejn hemm ieħor ogħla minnhom.

⁸ Dak li tagħti l-art hu għal kulħadd, imma huwa s-sultan li jinqeda l-ewwel mir-raba’.

Il-frugħa tal-għana

⁹ Min iħobb il-flus ma jixbax bil-flus, u min iħobb l-għana ma jixbax bil-qligħ. Dan ukoll hu frugħa.

¹⁰ Jekk joktor il-ġid joktru wkoll dawk li jberbquh, u x’jibqagħlu s-sid ħlief li jarah biss b’għajnejh?

¹¹ Il-ħaddiem, jiekol ftit jew jiekol wisq, jiġih ħelu l-irqad, imma l-għani x-xaba’ ma jħallihx jieħu nagħsa.

¹² Rajt gwaj ieħor taħt ix-xemx: il-ġid li sid jerfa’ jisfagħlu ta’ ħsara.

¹³ Imur ħażin f’xi negozji u ġidu jintilef; imbagħad ikollu iben u dan ma jsib xejn f’idu.

¹⁴ Għeri jkun ħareġ minn ġuf ommu, u għeri, kif ġie, jerġa’ lura, bla ma jkun ġabar xejn x’jieħu miegħu mit-taħbit tiegħu.

¹⁵ Jaqaw mhux ukoll gwaj ikrah li wieħed jerġa’ jitlaq bħalma jkun ġie? X’jiswielu la jitħabat għar-riħ,

¹⁶ la jiemu kollha fid-dlam jgħaddihom qalb ħafna għali, mard u inkwiet.

¹⁷ Ara, mela, x’sibt li hemm tajjeb u jaqbel għall-bniedem: li jiekol u jixrob u jgawdi l-frott ta’ kull taħbit li jġarrab taħt ix-xemx tul l-għomor li Alla jisilfu: għax dan hu li jmissu.

¹⁸ U kull min Alla tah ġid u għana u setgħa li jgawdihom, ħa jieħu sehem u jifraħ b’xogħlu, għax dan ukoll hu don ta’ Alla.

¹⁹ Hekk ma joqgħodx jitħasseb wisq fuq għomru meta Alla jżommu medhi bil-ferħ ta’ qalbu.