ĠENESI 4 - IL-BIBBJA IL-KOTBA MQADDSA

Kapitlu 4 Kajjin u Abel

¹ U Adam għaraf lil martu Eva, u din tqalet u wildet lil Kajjin, għax qalet: “Għamilt bniedem mal-Mulej.”

² U mbagħad wildet lil ħuh Abel. U Abel kien ragħaj in-nagħaġ u Kajjin ħaddiem ir-raba’.

³ Ġara wara xi żmien li Kajjin għamel offerta mill-frott tal-art lill-Mulej;

⁴ u Abel offra wkoll hu mill-bikri tal-merħla tiegħu u mill-grass tagħhom. U l-Mulej ħares lejn Abel u l-offerta tiegħu.

⁵ Imma lejn Kajjin u lejn l-offerta tiegħu ma ħarisx; u Kajjin għalhekk saħan sewwa u wiċċu tqarras.

⁶ U l-Mulej qal lil Kajjin: “Għala sħant u għala għaddast rasek?

⁷ Jaqaw mhux minnu dak li jekk tagħmel it-tajjeb terfa’ rasek? Imma jekk ma tagħmilx it-tajjeb id-dnub bħal xitan jissajja wara biebek. U hu xewqan għalik, imma inti tista’ trażżnu.”

⁸ U Kajjin qal lil ħuh Abel: “Ħa mmorru fir-raba’.” U kif kienu fir-raba’ Kajjin qam għal ħuh Abel, u qatlu.

⁹ U l-Mulej qal lil Kajjin: “Fejn hu ħuk Abel?” U hu wieġbu: “Ma nafx. Jaqaw jien għassies ta’ ħija?”

¹⁰ U l-Mulej wieġbu: “X’għamilt! Leħen id-demm ta’ ħuk qiegħed jgħajjatli mill-art.

¹¹ U issa misħut int mill-art li fetħet fommha u laqgħet id-demm ta’ ħuk minn idejk.

¹² Meta int taħdem l-art ma tagħtikx aktar ġidha. Int tibqa’ tiġġerra maħrub ’l hemm u ’l hawn fl-art.”

¹³ U Kajjin qal lill-Mulej: “Il-kastig tiegħi kbir wisq biex nerfgħu.

¹⁴ Ara, int keċċejtni llum minn wiċċ l-art u jkolli ninħeba minn quddiem wiċċek; u nibqa’ niġġerra maħrub ’l hemm u ’l hawn fuq l-art; u kull min isibni joqtolni.”

¹⁵ U l-Mulej wieġbu: “Mhux hekk! Kull min joqtol lil Kajjin iħallas seba’ darbiet.” U l-Mulej għamel sinjal fuq Kajjin biex kull min isibu ma joqtlux.

¹⁶ U Kajjin ħareġ minn quddiem il-Mulej u mar jgħammar f’art Nod, fuq il-Lvant tal-Għeden.

In-nisel ta’ Kajjin

¹⁷ Kajjin għaraf lil martu, u din tqalet u wildet lil Ħenok; u hu beda jibni belt u semmieha Ħenok b’isem ibnu.

¹⁸ U lil Ħenok twelidlu Għirad, u Għirad wiled lil Meħujjel, u Meħujjel wiled lil Metusajel, u Metusajel wiled lil Lamek.

¹⁹ U Lamek ħa żewġ nisa: waħda kien jisimha Għada u l-oħra Silla.

²⁰ Għada wildet lil Ġabal, li kien missier dawk li jgħixu fl-għerejjex u jrabbu l-imrieħel.

²¹ U ħuh kien jismu Ġubal, li kien missier dawk li jdoqqu ċ-ċetra u l-flawt.

²² U Silla wkoll wildet lil Tubal-Kajn, li kien ħaddied, jaħdem l-għodod tal-bronż u l-ħadid. U oħt Tubal-Kajn kienet Nagħma.

²³ U Lamek qal lin-nisa tiegħu: “Għada u Silla isimgħu leħni; nisa ta’ Lamek, agħtu widen għal kliemi. Qtilt raġel għax ġeraħni, u żagħżugħ għax benġilni.

²⁴ Għax seba’ darbiet jitħallas Kajjin, imma Lamek sebgħa u sebgħin darba.”

It-twelid ta’ Set

²⁵ U Adam għaraf lil martu u wildet tifel u semmietu Set, għax qalet: “Għax Alla tani nisel ieħor flok Abel, li qatlu Kajjin.”

²⁶ U ’l Set ukoll twelidlu iben u semmieh Enos; imbagħad bdew isejħu isem il-Mulej.