GYUUDA 1 - Mampruli

¹ Man Gyuuda, Gyeemsi sunzɔ la, n sɔbri gbaŋŋu wa n‑tiri ya; man ŋɔn nyɛ sɔ ŋɔn tumni n‑tiri Yisa Kirisita Masiiya hoo u daabri la. Yarima ka n sɔbri gbaŋŋu maa n‑tiri ya, dama n wuri ya ti Ba Naawunni yɛla zugu, ka ba pun booli ya Naawunni saani na ka Yisa Kirisita mari ya suŋŋa.

² Ya nin nya namboo Naawunni saani, ni alaafɛ ni wurilim zaa.

³ M mabiisi, n wuri ya pam ka di zugu n da yi boori la n sɔbi gbaŋŋu n‑ti ya zaŋŋi n‑kyaŋŋi man ni yan zaa ŋɔn la'am n‑nya tiliginsim seem maa; amaa di kpa la talasi ni n daŋŋi n‑sɔbi yɛttɔ'a n‑susiri ya, ni, ya kpaŋŋma ya mansi n‑zaŋŋi ya kpeeŋŋu zaa m‑moora, ni ya ti zɛ yɛdda yɛla maa nyaaŋŋa - yɛdda yɛliseesi Naawunni ŋɔn daa pun zaali n‑ti u niriba la.

⁴ Dama ninvugseeba pun sɔ'ai n‑kpɛ ya saani na, ka za'asiri Naawunni gyeeŋŋu yɛla. Halli ba daa pun sɔbi lala niriba yɛla, ni, ba nin kari ba sariya n‑lusi ba. Ninvugbeeri wa n kur zeemni ti Dugma Naawunni piinisuma, halli nti takki Naawunni yɛla ka a leebi la da'ari tuma an bu dɔli soori; ka ba za'asiri ti Dugma Yisa Masiiya yɛla, halli ni ŋɔn kɔkɔ ŋɔn su ti yɛla zaa gba.

⁵ M boori ni n teaai ya zaŋŋi n‑kyaŋŋi Naawunni ŋɔn daa pun tum seem, halli ni yan pun wum di lahabaari gba: ni, Naawunni daa daŋŋi n‑tiligi u niriba n‑yiisi ba Igyipti tingbaŋŋu ni na, amaa di zaa yɔri, u daa naayi kyɛ ka baseeba ban daa za'asi yɛdda niŋbu la daa ti baasi yɔri.

⁶ Halli malaakadima maa gba - baseeba ban daa bu sakki, ni, ba ti kpalim ba maŋtoori naam fukumsi yɛla ni, ka daa kyɛ ba beebu ziiya m‑bakki la - ban ka Naawunni daa lɔ la kyɔrimseesi an ku toaai n‑lɔrigi sahakam, n‑kpari zibsim zii maa ni, halli n‑guri sariya karibu daari maa.

⁷ Lala gba ka Sɔdoom dima, ni Gɔmɔra dima, ni tinseesi an daa gyiligi bɛni niriba m‑paasi daa bɛ ni. Ba daa tumni la zina tuma ka dɔli la kɔrisi yɛliseesi an bu dɔli soori; ka lala zugu ka Naawunni daa kyɛ ka ba nya tubdarigri saha din ka naari, bugum maa ni; halli ka ba yɛla ti leebi la wulisigu n‑kpamsiri sɔkam zaa.

⁸ Tɔ, ka lala deede ka niriba wa zaasiri zaasibeeri, ka di zugu ba sa'amni la ba maŋtoori ningbina, ka za'asiri la fukumsi ka tuuri la gyirima daandima.

⁹ Ya bu nya, halli malaakadima zuguraana maa, Maikyɛli la, daa bu tu Sintaani gba, Musa ŋɔn daa kpi ka ba daa mari nangbankpeemni n‑ti taaba zaŋŋi n‑kyaŋŋi u ningbiŋŋu yɛla. Ay! - u daa kur yɛli u, ni, “Ti Dugma nin boosi i!”

¹⁰ Amaa niriba wa muna - ba yi bu baŋŋi bunseelli gbinni, kana ka ba tuura. Halli ba yi ti baŋŋi bunseesi, ba mari la yam hoo bunkɔbri ŋɔn mari seem m‑baŋŋi a, ka bamsim din bu tuusi wa mun kyɛ ka ba basi la yɔri.

¹¹ Waai, waai, waai! Ba yɛla basi la yɔri! Dama ba dɔli la Kyeen sɔbeoo la. Ba mun sufu kpɛ Beelɛm yɔmsigu yɛla ni, ka ba nin nya tubdarigri hoo ŋɔn Beelɛm ŋɔn daa nya seem la. Halli ba za'asiri yɛlimaŋni soori hoo Koora ŋɔn daa za'asi seem, ka ba nin nya baasiyɔri hoo ŋɔna.

¹² Ya yi ti la'amni n‑diri bundirigu wurilim zugu, lala niriba kpeeri na n‑sa'amni ya yɛla, ka vi bu kpɛ ba di zugu. Ba ŋmanni la pɛguriseeba ban bu guri peesi maa, amaa ba maŋtoori yɛla ka ba gɔsira; bee, sangbana an ka saa ka pɛsiŋŋu kur zeeri a ka a kyɛnni kpa, n‑labri kpa; bee, tiseesi an bu wanni wala halli ni waligu saha ŋɔn paai maa zaa yɔri - a pun kpi napɔmbuyi, ka ba nin foaai a m‑basi.

¹³ Ba laa n‑ŋmanni la teeku kooma; a damni la kɔmiisi n‑tumni la toom n‑yiisiri la fufukka - ba vi tuma nla; bee, saŋmariwuusi n nyɛ ba, seesi an goori n‑goora, halli ka zibsim din ka naari ti deaai ba m‑mara.

¹⁴ Inɔkyi daa nyɛ la Adam ya'aŋŋa, sɔ ŋɔn daa yi badima ayɔpɔi Adam nyaaŋŋa ni na: ŋɔna n daa tɔ'asi anabitiri yɛttɔ'a zaŋŋi n‑kyaŋŋi niriba wa yɛla, ni, “Ya nyama! Naawunni kyɛ na, ŋɔn ni u nyaaŋŋa - u toori niriba tusatusa la;

¹⁵ u kyɛ na ni u ti kari sɔkam sariya. U nin darigi ba zaa tubri ba tumbeeri zugu, ni ban daa tɔ'asi yɛttɔ'abeeri n‑za'asi ŋɔn Naawunni maa zugu - ala'akyi dima n nyɛ ba ka ba za'asiri Naawunni noori.”

¹⁶ Niriba wa nyɛ la yɛttɔ'adɔ'asa daandima, ba kur fabinni la yɔriyɔri; ba dɔli la ba kɔribeeri sɔya, n‑tɔ'asiri n‑nyuuri bara; ba bu tiri niriba gyirima, amaa ba ya n‑yɔmsi ba n‑kyɛ ka ba nini tigi ba yɛla.

¹⁷ Yarima muna, m mabiseeba man wuri suŋŋa wa, ya teaama yɛttɔ'aseesi yan daa pun wum la, aseesi ti Dugma Yisa Kirisita tuumudima ŋɔn daa daŋŋi n‑tɔ'asi n‑ti ya la.

¹⁸ Ni, ba daa yɛli, “Saha nin ti kyɛ na din nyɛ naari saha ka ninvugseeba nin ti bɛ ni n‑niŋni ansarisi, n‑dɔli la ba kɔribeeri, ka za'asiri Naawunni yɛla.”

¹⁹ Lala niriba n nyɛ baseeba ban purigi ya ka kyɛ ka ya wɔligi taaba. Ba dɔli la ba duniya wa yam yɛla, ka kɔŋŋi Naawunni Sii maa zaa.

²⁰ Yarima muna, m mabiisi, ya kpalimma n‑zɛ yummu ya yɛdda maa ni, dama di zaa nyɛ la Naawunni dinni. Ya puusima Sii Kasi maa yiiko ni,

²¹ ka kur kpalimma Naawunni wurilim la puuni. Ya dim sugru n‑guusiri ti Dugma Yisa Kirisita nambɔzoaa saha la, dama lala saha maa ka ya nin ti nya nyɔvuri kan ka tariga.

²² Ya zɔm namboo n‑ti ninvugseeba ban birisira.

²³ Ninvugseeba muna - ya faama ba m‑basi bugum ni na. Seeba yaasa ya zɔm ba namboo, amaa ka zɔ ba dabeem gba, halli nti kyisi ba bunyeera da'ari siisigu gba, dama ba ningbinkɔrisi yɛla sa'amni a ni.

^24-25 Naawunni kɔkɔ n nyɛ ti tiligra, ka ŋɔn nin toaai n‑guri ya n‑kyɛ ka ya kpalim m‑bɛ kasi. U nin zaali ya u gyirima zii tooni, ka da'ari ka ni, ka kyɛ ka ya sufu pɛligi zaa di zugu. Ya kyɛ ka ŋɔn Naawunni nya gyirima ti Dugma Yisa Kirisita Masiiya maa zugu, ka nya duusigu, ni kpeeŋŋu, ni yaa. Ka di daa daŋŋi m‑bɛ la lala, ka na bɛ la lala zuna, ka di nin kpalim m‑bɛ lala saha din ka naari. Ammi.