VALETI 8 - BIBILLYA Mareiyo Meele a Iruva

Ivingwa lya Mafurumyony lya Vamidian

¹ Naasa vandu va Efraimu veekiita mbony yeto vakavia Gidion, “A nkyiki elyi kwalutannya indi?” Nkuleluvaanga elyi kulendekapana na Vamidiani-fo. Vakasakkya nawe deny.

² Nawe kavavia, “A nkyoki shiletana kiilanyi ekyo muletana yeni? Naakwa ni ndunda ta misabibu yeto ta Efraimu mmbo tiilanyi fimu fya ufyari lwakwa lwa Abieseri.

³ Nawe Iruva mmbo alevika vamangyi yewo va Vamidian Orevu na Seebu maakony any. A yeny nkyoki shiletana-n?” Ee kyaammba indo na unyafi lwawo lukawa.

⁴ Naasa Gidion karuuka Yordan ando amwi na vandu yewo eeriani nawo, nawo mmbo vemmaraa vakasya finya deny, lyo vakeengera ivavinngya.

⁵ Naasa kavia vandu va Sukoti, “Niingeny vandu yeva shiriani nawo shoonga, mashika vammba vanana nnu, mmbo lukeevinngya Seba na Salmuna, nawo ni vamangyi va Midian.”

⁶ Vasongoru va Sukoti vakaammba, “A mmbo kwambinga Seba na Salmuna kutani luniingaa itorito lyafo shoonga?”

⁷ Nalyo Gidion kaammba, “Naasany, lyo elyi Nndumi Iruva ashevikaa Seba na Salmuna maakony akwa, mmbo nsheouwa nyama ya miili yaany na yiidoshadosha na miinga ya usakeny.”

⁸ Eekyuukan yoo karwa na Penieli, kavia vandu va vayo marero yoo meni. Vandu va Penieli nawo vakalema ivaniinga shoonga vakasherouwa sha vandu va Sukoti.

⁹ Nawe kavavia “Elyi nshewuyaa shammaa ivinga, mmbo nshewunndwaa nnara yeu wany.”

¹⁰ Vamangyi yewo Seba na Salmuna mmbo venrishya Karkori, ando amwi na itorito lyawo, iniini sha fiku ikumi na firaanu. Nawo mmbo yewo vensaa-fo vandu yewo va taari ya ngama. Mashika mmbo vemmbwaawa vandu fiku iyana na makumi avii vekee vaskari.

¹¹ Naasa Gidion kasora taari ya yewo veekee meemeny nnyo taari ya ngama ya miri ya Noba na Gogbeha, kavakaba uviny mashika mbeekudeesye-fo.

¹² Nalyo vamangyi yewo vavii Seba na Salmuna na Midian vakarisha, kyeendi vakavavinngya, kavatira, na itorito lyawo lyikanyanyaka.

¹³ Naasa Gidion mwana wa Yoashi kawuya ooka fireny, eeshiraa shia ya irwa na Heresi.

¹⁴ Naasa kakwaanannya na nndu umwi nkoo wa Sukoti, karera nawe, nawe llyo alensendya marina a vasongoru va Sukoti na vamiku va muri yeto woose vakava vandu makumi mfungare na mfungare.

¹⁵ Naasa kashesha kwa vandu va Sukoti kavavia, “Mwiishi, vamangyi valya va Midian Seba na Salmuna muleshisela kimaruma kyawo llya muleshivia, ‘A nkyoki kwantannya Seba na Salmuna kutani lukuningaa shoonga.’ Ekakavany ulaalu.”

¹⁶ Vakandeepoo miinga efo kasa kandeorota nayo vasongoru valya va Sukoti.

¹⁷ Naasa kookafo kawunndwa nnara wa Penieli, kavewaa na vandu valya mulewaa kulya Tabori mmbo veekee vandu va ngata-ki? Vakammbia, “Mmbo veekuvakye yewe, wo umwi waawo mmbo eevakye mwana wa mangyi.”

¹⁸ Naasa kavesa Seba na Salmuna “A nkwi womi valya mulewaa kulya Taboni vakai?” Vakarouwa vakaamba, “Shaasa kukai, ni indo veekai wo umwi waawo; mmbo weevakkye vana va mangyi.”

¹⁹ Nawe kawuya ivavia, “Vandu yewo mmbo veekee vanavama va ivee lyimwi nsi, Mmbo shamuvia dede, kukooye mulekira vandu yewo neeny inu nshemuwaa-fo.”

²⁰ Naasa Gidion kavia mwana wakwe mmbee, “Yeteri, salala kwawaa vandu yeva.” Lyo mwana yeto wakwe alesomwa usu lwakwe-fo, kimmba akee mwana nkoo.

²¹ Llyo Seba na Salmuna valeamba, “Salala yewe kumuni kwaluwaa, mashika shaasa nndu akai niindo na finya yakwe ikai. Llyo Gidiaon kasalala kawaa Seba na Salmuna, numa keeboo na findo fya utore efo singony ta ngamula tawo.”

²² Naasa vandu va Israeli vakavia Gidion, “Lushillye yewe-te, yewe na mwana wafo na vashuku vafo, kimmba kwallwaauwa maakony a Vamidian.”

²³ Gidion kavavia, “Yeny nshimushillyaa-fo, na vana vakwa-fo, Ni Nndumi Iruva muni amushillyaa yeni”

²⁴ Yeny nkindo kimwi nsi shikunndye kwany, shiniingyeny findo efyo fya maaarwi mulesoka yewo mulevavinga-te. (Mmbo valeonisa-fo nrashi na fivelu fya maarwi mashika elyi veekee Vasumeelyi).

²⁵ Vakammbia, “Mmbo lukuningyaa toose deny.” Naasa vakaala soori si, vakavikau findo efyo.

²⁶ Uroo lwa vayo lukava ni filo makumi avii, kuutafo findo fingyi fisha filesokwa vandu yewo na Vamangyi va Midian, sha mise na fingyi.

²⁷ Naasa Gidion kasongosya-fo ifwanu, kaivika muriny kwakwe efo Ofra, nawo Vaisraeli woose vakeenda-fo vakandelyiinndya, na ifwanu elyo lyikava nreiyo na kyeeso kwa Gidion na mmba yakwe.

²⁸ Niindo Vamidia valevingwa ni Vaisraeli, nta valakikwiiboo-se lyingyi. Naasa uruka lukatira ufoo ando a myaaka makumi aana ya Gidion.

Ufu lwa Gidion

²⁹ Naasa Gidion mwana wa Yoashi keenda kyeny kwakwe.

³⁰ Gidion mmbo eetiri vana makumi mfungare, mashika mbo eetiri vaka nkuka.

³¹ Na nka kishinga wakwe eekee Shekemu kamwiirya mwana, kammbaanga Abimeleki.

³² Naasa Gidion wa Yoasi kafwa eetiri myaaka miingyi, kaarwa mmbangeny ya ndeye Yoashi kulya Ofra ya Waabieseri.

³³ Gidion eekifwa indi, vana va Israeli vakaalashika vakeendya maruva a wongo Baali, na Baal-Beriti vakammbika iruva lyawo.

³⁴ Vana va Israeli mmbalekikummbwa Nndumi Iruva waawo-fo, nawe mmbwe alevaauwa maakony a vakiduva vawo woose,

³⁵ nta mmbalekiinndya vandu va mmba ya Yerubaali-fo we Gidion-fo, nta mmbalekikummbwa mesha alya alevatannya-fo.