Mapookyony 35 - BIBILLYA Mareiyo Meele a Iruva

Iruva Avikkya Yakobo Mbora kulya Beteli

¹ Iruva kavia Yakobo, “Kwiipoo kweende Beteli, kundekaafo. Kundetannya-fo Iruva kitara kyeerasya, yeto alekoora neewe kyeeri kilya kwekeerisha mwana-mau Esau.”

² Yakobo kavia vandu va kyeny kwakwe, neewo woose vekee kyeny kwakwe, “Uteny-fo maruva yoo meny akee kwany, mukweeremute mwaalashe soori tany.

³ Lukupoo yaa, lusaame lweende Beteli. Neeny nshetannyaa-fo Iruva kitara kyeerasya we yeto aleshaarannya nkonu wa ukyiva lwakwa, ka-kaa neeny nshieny koose shileira.”

⁴ Nawo vakaniingya Yakobo maruva moose ekee maakony awo, na fipulyi fyoose efyo fyeeke marwiny awo na Yakobo kafilyikkya yoo sindeny ya nri alya Shekemu.

⁵ Vakawara shia, weerei lwa iinndya Iruva lukatira vandu va miri yeyo ivaringitye, nta mbalesora vana va Yakobo-fo.

⁶ Naasa Yakobo kafika Luzu, ukee urukeny lwa Kanani, nto Beteli, we na vandu ewo veeke nawe.

⁷ Katannya-fo kitara kyeerasya, kavaanga ando alya El-betel; ni llya yoo Iruva alekoora nawe, kyeeri eekerisha mwana-maye.

⁸ Debora ulya ekee mweeri wa Rebeka kafwa, kariko kwasinde ya Beteli, sinda-anri, na irina lya vayo akavaangwa; “Alon-bakuti”.

⁹ Iruva kashekoora na Yakobo lyingyi kyeeri aleuka Padan-aramu, kammbikkya mbora.

¹⁰ Iruva kammbia, “Irina lyafo ni Yakobo, nkushevaangwaa-se Yakobo-fo, ulaalu irina lyafo lyishevaa Israeli. Kamfishya irina Israeli.”

¹¹ Iruva kammbia, “Yeny ni Iruva muni finya toose, fumbuka kweengereke, ufyari na ngyufyari mmbo tisheukaa kwafo yewe, na vamangyi vasheukaa efo kwafo.”

¹² Na uruka elu shilevikkya Abrahamu na Isaki kyaasa nshekuningaa yewe, na ufyari lwafo lwa numa nshevaningaa uruka elu,

¹³ Llyo Nndumi Iruva kasaama auka ando alya erera nawe.

¹⁴ Yakobo kasaleesa ngo ando alya alererya nawe, ngo ya mawe, kaletya-u kiraso kya mfinyu, na mafura.

¹⁵ Yakobo kavaanga ando alya Iruva alererya nawe, Beteli.

Raheli Afwa

¹⁶ Vakaipoo kyaaro vooka Beteli, ukasaa-u mweendo mwaangu-da kufike Efrata, Raheli kalyiwa ni usu, lwa mwana na usu lwakwe lukanrovya nnu.

¹⁷ Naasa kyeeri ekelyiwa nnu ni usu, nkyeku wa mwana kammbia, “Kulairyee-fo, mashika ulaalu kusheiraa nsoro ungyi.”

¹⁸ Naasa kyeeri ekeekumba muu, mashika mmbo aleshefwa kavaanga mwana yeto Benoni, kyeendi ndeye kammbaanga Benyaminy,

¹⁹ Reheli kafwa, karikwa yoo mbai ya shia ya Efrati, nto Betlehemu.

²⁰ Yakobo kasaleesa ngo yoo uwe ya kifu kyakwe nnyo ngo ya kifu kya Reheli fika inu,

²¹ Israeli keenda na mbee, kandevaakkya yeema alya taari ya kavii ya nnara wa Ederi.

Vana va Yakobo

²² Naasa kyeeri Israeli ekee urukeny lulya, Ruben keenda kakaa na Bilha, ulya ekee ishinga lya ndeye, Israeli keeta mbony yeyo. Naasa vana yewo va Yakobo vekee ikumi na vavii.

²³ Vana va Lea ni Ruben, mwana mmbee wa Yakobo, na Simeon, na Levi, na Yuda na Iskari na Zabulon.

²⁴ Vana va Raheli ni Yosefu na Benjamen.

²⁵ Vana va Bilha, ishinga lya Raheli ni Dani na Naftali.

²⁶ Vana va Silpa, ishinga lya Lea ni Kati na Aseri. Yewo mmbo vana va Yakobo aleirya kwa Padan-aramu.

Isaki Afwa

²⁷ Yakobo kasha kwa ndeye Isaki, kulya Mamre, muriny wa Arba, nto Hebron, kulya Abrahamu na Isaki vekaa.

²⁸ Suku ta Isaki teeke myaaka iyana na makumi nyanya.

²⁹ Isaki kakumba muu kafwa, kandelala na vandu vakwe, eeke mmiku ammbuura suku. Vana vakwe Esau na Yakobo vakanndika.