TITUS 1 - KHYINGEI PU'TLOU Bible (BSI)

¹ Dunpuei shik heirou Jesu Christa'yei paocha thimi Paul, Dunpuei khalthutkur thimi rapbei uklum heirou kaiyei shingkheiyei lamra Dunpu'nung chimni leiyerna'nungei,

² heirou Tlaipang kanrebongei waiyoubi mandalmak Dunpune kantompikur klui naimak chaanya malungamkyer khoine,

³ heirou keiya kum-chaan chani kaiyei Dunpu, Kalpipuni chay piwurbi Aiyei tlouya shunthutyerlei.

⁴ Uklummei lamra keiyei chanapawa hoibi klei Titus'nung keine chethi aya mayepithunglei. Pawa Dunpurei heirou kaiyei Kalpipu Christa Jesuei kying heirou kringpikhei heiri neidoura leipiniyasu.

Crete'ra Titus'yei Watlhou

⁵ Keine neiya Crete'ra lakurkhou heiri khukarthil kantangei Church'ra toubomthuk lhou rapya tounanungei, heirou lhakbomthuk lhou'ur, laa'ur thimi rapya ruipinanungei upa rapya khalthutbi lhoubom lhakpina'nungei toubi lakurkhou. Keine neinungei shunmatupikhou rapya ningthutbine lhou toulak.

⁶ Lhou'urpu upa khat hoiyanungri mine yunnamak thimi, nu khattom klei thimi hoirou da; heirou aiyei chanaorap heikhi uklum thimirap hoirou da, heirou lhangaimaknara rangrilbi ngaal'ok thukril, nimanung kyunya chanthungmak thimirap hoimakrou da.

⁷ Ngamri Church'yei lhou'urpu upa heiri Dunpuei watlhouya thikulpi thimi, heine a heiri mideine yunkna thimi hoimakrou da. A heiri khramtangmak thimi, malungkha kalmak thimi, tul malipmak, kngaal paammak thimi, heirou tuy khrammak thimi hoirou da.

⁸ A heiri miya karyemkhei picha-pimai khei thimi hoirou da, lhangaiya malungshi thimi hoirou da. A heiri ai'msha-aitamei ukningya manphopchang thimi, tharmu klei thimi, ukning khying thimi, heirou ai'mshani toubomthukya kmu thimi hoirou da.

⁹ A heine shunmatukur tlou rapya chimni churbi minekhi malungamkya khoine heirou chimmei shunmatunara thimi rapbei ukning thoubaangpi, heirou yanimak thimi rapyakhi manelchang thimi hoirou da.

¹⁰ Kouweiyo toulanungri, chorit naimak thimirap, tlouchui kyun thimirap, heirou minamtang thimirap, lilkhoine murdin thimi rapbei thani Christen hoibi miya lam tamungyerbi klei yaolei.

¹¹ Heinaksi thimi rapyari koukhatkhi yunyermakni lhangairou, ngamri yane yai yunbom thukmak tlou rapya yunbine bommai kounakya toumanokurla, heirou yane tuy phananungei toubi rikraiknayei lhou rapyakhi toubi leilei.

¹² Crete'rei thimirap hangrei thimkhui khatnikhi asitoubine yunlei, “Crete'rei thimi rapri kheenserrou mandalkhei, khril thuithi ramyaa'naksi, heirou chatek-maitekbi yrathi thimithil.”

¹³ Kyuntlou ari chimmakme. Heinung'tlim yaya kalni shunmatupilak, heiyanungri yane Jehudi rapbei sheemthutkur wari rapya chanthungmakni,

¹⁴ heirou tlaipang thimiyei chaylam rapya chanthungurbi chimmei tlouya yamakkur toumakni, yaiyei uklum heiya chetne mayungbi leirou.

¹⁵ Khying thimi rapnungeiri put namyerwa khying hoirou, heiya hyingmak thimi rapnungeiri, heirou uklummak thimi rapnungeiri put namyerwa heiri koukhatkhi hyingmakrou, ngamri yai ukning-solung heiri nammani hyingmakura.

¹⁶ Yari Dunpuya kmume toubi yunthutlei, heiya yai touthutkur lhourap heineri Aya yapimaklei. Yari machinknayei thimirap, heirou kyunya ninglhakmak thimirap hoinei ngamrou yane koukhatkhi lhangai touchangmaklei.