KANTHOUNA 1 - KHYINGEI PU'TLOU Bible (BSI)

Tlaipang Waiyounei: Dunpuei Hutsarap

¹ Tlaipang waiyoutirnung Dunpune lamkrini Thangmun heirou Shimlei sheemthutkhou.

² Kheen heinungri tlaipangpalri koukhi shakrungkhi naimakni louklei, heitoubi kmehni yui'nlaak doura mkhubphopbine louklei. Heirou Dunpuei Lhawaini yui'nlaak doura kanchekchakhou.

³ Heirouri Dunpune shun, “Kwaar allaksu,” heirouri kwaar yuk'alkur.

⁴ Heirouri Dunpune kwaar heiri lhangaime touri muwurla; heitoubi Dunpune kwaar heiri kmeh'rouwei khaithutpikur.

⁵ Heirou Dunpune kwaar heiya Tlaini, heirou kmehya Ane Masa toubi min thulkur. Heisitoubi rawai khatle ningshun khat heiwani lamkri tlainikhat hoikur.

⁶ Heirouri Dunpune shun, “Nungthou'le Samadru heiri lailaini hoilakasu; heitoubi yui nlaakle yui'nlaak heikhi lailaini khailakasu.”

⁷ Heisitoubi Dunpune nungthouya sheemkur, heirou nungthou daakrei klei yui nlaakle nungthourei yuile lailaini khaithutbi heisibil hoiyerkur.

⁸ Heirou Dunpune nungthouya Thangwan toubi min thulkur. Heisitoubi rawaile ningshun touri masale nunghang khat hoiyerwurbi khnini'tlung tlaini hoikur.

⁹ Heithangrou Dunpune shun, “Nungthou daakrei klei yui namma heiri bi khatra kallonglakasu, heirou thlei taarnakhi laini hoilakasu,” heirouri kyun heinakrimni hoikur.

¹⁰ Heirouri Dunpune taarnabi heiya Thleidou toubi min thulkur; heirouri Dunpune heiya thinarouri lhangaiyurame toubi muwurla.

¹¹ Heirouri Dunpune shun, “Thleidoura louhtrung-ramtrungkhi katpuklakasu, heitoubi limlimei heengpar-ramparkhi heirou heikhei heengtrung-rotrungkhi heirou trunwai trungkhi limlim katpuklakasu,” heirouri kyun heinakrimni hunghoikur.

¹² Heisitoubi tlaipangpal heiri heengna-ronani mar'emyerkur, heengpar-rampar limlim, heenghei-rohei limlimei heengtrung-rotrungni bilthimkur; heirouri Dunpuei mit'thrilnara lhangaiyurame toubi muwurla.

¹³ Heirouri rawai khatle ningshun khat hoiyurbi, khyumni tlung tlaini hoikur.

¹⁴ Heirou Dunpune shun, “Thangwanrei wanshangra kwaar yuk'allaksu, heitoubi masa-nunghang khainei hutlha khoini, Kinni, tangla, heirou kum'chaankhi yuktamlakasu.

¹⁵ Heirou nungthourei kwaar heini yuk'albine tlaipangra yukwaarlaksu,” heirouri shunkur heinakrimni hoiyura.

¹⁶ Heirouri Dunpune kwaar tang khintam sheempikur, alduiyei kwaar Kinni heiri nunghangnang pu khoini warnungei, heirou wardupbei kwaar heini masanang warnungei, heile kalhonni Ane sorwa rapkhi sheemkur.

¹⁷ Heitoubi heirapya Dunpune Thangwanyei wanshangra bi chani khoupibi tlaipangra yukwaaryerkur.

¹⁸ Heirou nunghangnang pu khoini warnungei, heirou masanangkhi pu khoini warnungei, heirou kmehrei kwaar khaithutnanungei toubine hoiyerwurla; heirouri Dunpune heirapya thibi lhangaiyurame toubi muwurla.

¹⁹ Heisitoubi rawai khatle ningshun khat heiri phalini tlung tlaini hoikur.

Phanganirou Yoolim-Waalim Sheemkur

²⁰ Heirouri Dunpune shun, “Yuirillani heiyei lhawaipal chiwi rapne thimlakasu, heirou nungthourani yoo-waa rapne traichabi thimlakasu.”

²¹ Heisitoubi Dunpune samadru rillei thangatang heirou thangalim deideikhi sheempibi leiyerkur; heitoubi waa limkhi mshing tlungni sheempikur, heirapri Dunpune thinarou lhangaiyurame toubi muwurla.

²² Heirou Dunpune yaya phor pibi kyun, “Lungpun hoiniyasu, heitoubi mshingkhi chungduilakasu; heirou samadru thimni karyoulakasu, heirou yoo-waa rapne thleidou thimlakasu.”

²³ Heirou rawai khatle ningshun khat hoiyurbi phangani tlung tlaini hoikur.

Thruknirou Yaalim-Yoolim Sheemkur

²⁴ Heirouri Dunpune shun, “Tlaipangdou arou yaalim-yoolim namma tlungni leilakasu,” heirou ui-waa limlim, frul limlim heirou ramyaa limkhi tlungni leilakasu; heisitoubi shunkur hilthungni namma hungthukkur.

²⁵ Heisitoubi Dunpune ramyaa limlim sheempikur, heirou cheemrei kyuk ui-waakhi limlim sheempikur, heirou ukni tulcha frul limlimkhi sheempikur; heirou sheemthutkur namma heiri Dunpuei mit'thrilnara lhangaiyurame toubi muwurla.

Tlaipang Thimiya Sheemkur

²⁶ Heirou Dunpune shun, “Kane kaiyei shakrungya loubine, kaiyei runglhahak kmalni tlaipang thimi sheemthutdase, heitoubi yani yuirei klei chiwi rapya heirou nungthourei traicha ramwaa, heirou ui-waa, ramyaa heirou ukni tulcha chiwi rapbei doura heirou tlaipangpallei doura pu khoini paallakasu.”

²⁷ Heisitoubi Dunpune Aiyei runglhaya loubine tlaipang thimi sheemthutkur, heirou Aiyei runglhara Ane yaya, napawa heirou napuiya sheempikur.

²⁸ Heitoubi Dunpune yaya phor pibine kyun, “Lungpunbi yu-cha pungduilaksu; heitoubi tlaipangpal karyouni paalbine, samadruei thanga'lim, nungthourei traicha ramwaa rapbei dourakhi, heirou thleidou karyouni ringbi klei chiwirap nammaei dourakhi pu khoini paallakasu.”

²⁹ Heirouri Dunpune shun, “Thilak, tlaipang thleidourei pukbi klei heengtrung-rotrungrap, heenghei-roheirap, anna-louna namma heiri nanungei silnawurla; heirou heirapya naiyei murchaknungei hoiyerwurla.

³⁰ Heitoubi tlaipangpalra ringbi klei ramyaa kantangnungei, ukni tulcha chiwi lim kantangnungei heirou nungthourei traichabi klei yoolim-waalim kantangnungkhi yaiyei shainung heengna-rona, heirou chanungei heenghei-rohei limlimkhi Keine piwurla,” heirou shunthutkur heinakrimni hoiyura.

³¹ Heisitoubi Dunpune sheemthutpikur Aiyei hutsarap namyerwa heiri Ane thinarouri beimakni lhangaiyura touri muwurla. Heisitoubi rawai khatle ningshun khat heiri thrukni tlung tlaini hoikur.