ESTHER 1 - KHYINGEI PU'TLOU Bible (BSI)

Krungne Malchaak Khaangkur

¹ Ahasu-erus'ne Krung khoine India'rei waiyoubine Ethiopia waphane Ramkullim machale somnile-eni doura thrungkhouyei chaanrou asitoubine thukwurkhou.

² Heiyei kheenrou Ahasu-erus'ne Susa'ra Khulil khoine aiyei Krungbom doura ombine thrungkhou.

³ Aiyei Krungkhoi kum-khyum tlung heirouri, ani aiyei Krungcharap nammale, aiyei ruishik raple, heirou Persia'le, Media'yei raallui chaylampu uparap nammakhi, heirou lhou'urpu uparap nammakhi, heirou aiyei Krungramrei Yama-Krungrap nammaya ungbine Malchaak tangkhat khaangkur.

⁴ Kheen heirouri ane aiyei Krungkullei lalthum raple, sina-lapa rapkhi, heirou aiyei thang'al lhangaiyei Krungbomrap nammakhi tlaini machale somshri billei rillou namma lhathutbine yertlengwa mutpikur.

⁵ Heitoubi heiyei tlainirap yenralkur heirouri, Krungne hanuikhi, aiyei Krungkullei yuntlangmaira Khulil Susa rillei klei thimirap nammaya, tang-mandi naimakne namyerwaya ungthutbine tlaini eninibil Malchak khangurthu.

⁶ Heirou Krungkul heiyei yuntlangmai heiwari phaikhringei punshel khngoule, khmongdup kimyei phiyeng rapya kulshan hutsira reengbine, thlungrillei shutlai rapya ruine msuibine yarkhalbi khou, heitoubi sinayei heirou kulshanyei ipna khumdou rapkhi manklu thlung'khngou, heirou thlung'mrao, heirou thlung'maryem thlungkwaar lampakbi khoukur yuntlangmaira dunthutbine khoukur.

⁷ Heitoubi tulkhi sinaei kepra heirou daarkep limlimra fleithutbine yerpikur, heirou Krungei tulkhi kleiyeimkhei marthumni fleithutbine yerpikur.

⁸ Tulflei heiwari ayillei lammit hilthungne fleipibi, thimi hukhatyakhi nambine pimakne, ai'aiyei paam hilthungne mongyerkur; heirou Krungnekhi aiyei tulflei shok rapya chay piwurbi, mimiyei madu heirou mongkro hilthungne fleipinanungei shunmatupikur.

⁹ Heirou Krungnu Vashti'nekhi Ahasu-erus'yei Krungkulla napuiya rapnungei Malchaak marshikbi khaangpikur.

Krungnu Vashti'ne Krungei Tlouya Chanthungmakur

¹⁰ Malchaak khaangnei tlaini enini tlungnerouri, Krung Ahasu-erus'ne tul kalthi mongmalipburbi, aiyei ukningra nungwaiyura, heirouri Krungne aiyei pongra wattoubi heiklei shokrap- Mehuman, Biztha, Harbona, Bigtha, Abagtha, Zethar, heirou Carkas ya napung eniya chay piwurbi,

¹¹ Krungnu Vashti'ya aiyei Krungnuwei shamb lhangaiya mansambine Krungei maibongra yenruilhakbine, aiyei lhangai-karyuikna shakrung heiwaya Yama-Krung rapbei maibongra heirou thimi rapbei maibongra mutpinanungei shunkur.

¹² Heiya Krungnu Vashti'neri pheitah rapbei shunpikur Krungei chaytlou heiwaya tlou khoine loupimakurbi wathukmakura. Heitounei ngamrou Krungne malungkhawurbi, aiyei ukningra meinakne kaangkur.

¹³ Heirouri Krungne heikaallei youkna hilthungne ayilya lhangaine kmu shingkhei thimi rapya unglhakbine, koutouserou toubi khalnarilbi yanungei tlou loukur.

¹⁴ Kheen heirou aiyei pongra unglhakbine knakni omyerkur thimi rapri- Persia'le, Media ramrei Krungcha raple, Yama-Krung napung-eni heiri Carshena, Shethar, Admatha, Tarshish, Meres, Marsena, heirou Memucan; heitoubi yarap heine Krungkullei malchaak khaangnara Krungei pongra mairone omkarhungbi tlou khalrilkur lilkhoi malrapthil.

¹⁵ Heirou Krungne asitoubi kyun, “Krungnu Vashti'yari ayillei hilthungne koutouserou? Ngamri ane Krungei chaytlouya chanthungmakne toubaiwurla.”

¹⁶ Heirouri Krungle yama-upa rapbei maibongra Memucan'ne loukyun, “Krungnu Vashti'ne Krungnungtom klal toukurthil nimakne, Yama-Krungrap nammanungkhi, heirou Krung Ahasu-erus'yei Krungram karhillei klei thimirap nammayakhi manthapimaknei tlou.

¹⁷ Kouweiyo toulanungri Krungnu Vashti'yei toukur lhou heiwaya mayekbine napuiyarap nammanekhi, ‘Krung Ahasu-erus'ne Krungnu Vashti'ya aiyei maibongra wathuknanungei shunkur chaytlouya manthapimakne pothutpimakme,’ toubi yunnabine, yaiyaiyei shal rapya manthanamakrou.

¹⁸ Heineri angtutou tlainirou Krungnu Vashti'yei toukur lhangaimakei pao heiwaya mayekkur Persia'le, Media'yei napuinu nammanekhi yaiyaiyei shal Yama-Krung rapya manthapimakne yunnarou klui naimakne karhoukril heirou malungkharil hoinarou.

¹⁹ Heineri, kounakpi Krungne yapiyanungri, Krungei chay pithutdurbine, martlengkur toumaknungei Persia'le, Media'yei ayil khoine mayelhakurlaklo; heitoubi chaytlou heiri ‘Krungnu Vashtini kouniroukhi Krung Ahasu-erus'yei maibongra wachangnungei yamakrou,’ toulaksu; heitoubi Krungne Vashti'yei rungkhlangra aya duiyei lhangai-karyui napuiya dei khatya Krungnu khoine bom lhakpilaksu.

²⁰ Heitoubi Krungei chaytlou heiya aiyei maryakur Krungram karyoune mayekphalanungri, napuinurap nammane tangkhi-mandikhi naimakne ai'aiyei shal rapya rikrai khrumpirou.”

²¹ Heisitoubi shunmatukur tloulhangrap heiwari Krungnungle, Yama-Krungrap nammanungei malungpilkna tloubom hoiyura; toubi Krung Ahasu-erus'ne Memucan'yei shunpikur tloubom hilthungne lhou touthutkur.

²² Heisi toubine Krung Ahasu-erus'ne chaytlou heiwaya mayethutbi, heitoubi Krungrap nammanungei ai'aiyei Kholhun kantangra, heirou ai'aiyei kho'khoyei yunkril tlou hilthungne mayethutbine manthunpikur. Chaytlouei chethi arou kyunri, ‘Napawa napung-kantangne ai'aiyei bommaira pu khoine paalrou da.’