Filmoona 1 - Mataafa Qulqulloota

¹ Erkana ana Pawloosi isase Yesuusi Kiristoosi malla hidame isho Timotoosi, innasene xanno a kiristaana' kapaayye, Filimoona innasene' xanno a kiristaana jaalatame an ollin koda kooninna,

² Ka Afipiya enentase' xanno a kiristaana ka Arkipaasittase ino olliiyyi xelitta oranna a Kiristoosi kodde isho ishina tika Filimoona' karopa ollopa deena maapara amanteetati' erkame.

³ Waaqa Aappinno ka Poqallaanno Yesuusi Kiristoosi kapaayye, daassata ka nakayta a ishina' kodden.

Jaalala isho amanteeta Filimoona

⁴ Qinseetiyyon ke dikattaanne awta piisan Waaqiyyo, kalataysanni.

⁵ Amanteeta a Poqalla Yesuusin qapto isho jaalala a orra amanno piisa' qapta in dakaye.

⁶ Waan Kiristoosin qapna a paxaara' piisa akka fayya upnaysamane'e, akka amanteetaayti orra pilaati qootta' japaatto'en Waaqa qinsanni.

⁷ Innaanno a kiristaanatiiyyi qoota ke minan karitta orra amannoti' xasa oorsade malla, jaalalaatti a kuttati xasa ana oorshen.

Pawloosi akka qoota Onesmoosi desa Filimoona naappade

⁸ Semmalla kadin punu kodaayti dikkishe, kideeta ka ke ajaja'e Kiristoosin maxanyuma qapa nefooyye;

⁹ Asse kodeeta kapaayye, anti Pawloosi qimayta a Yesuusi Kiristoosi malla hidame, jaalalaan ke naappattaan reexade.

¹⁰ Qoota Onesmoosi isase an anti tika hidaati cooyye innaayyo kodde desan ke naappanni.

¹¹ Onesmoosise turan ke we nakanni in co. Amma xoori nama ana ka ke kuli we nakaysho kodde.

¹² Tin ke kapopan isha erke. Isha' nefo naman a kuttati jaalanno.

¹³ Eten otoota fayya malla hidame ka are cooyye, kadin iskapa isha qapna ikka pakkaaytippa ana qaarqaarraayye i'ana' paxaari.

¹⁴ Ma xoori, kodaayti a paxaara akka irreetan in koddinin ka heennaattin koddo'e, an ke an faqqacciinin mali we takkan nefo kodeeta an heennaanne.

¹⁵ Wa malla Onesmoosi haka ammati eta' desa ke kapa xawwi' oore, akka takka punu arepa desa awta piisa ke kapa kinnaado malla.

¹⁶ Umma arepa desa akka karpishsha' mina ke kela'en kallaado ma, akka innaassina a kiristaana a jaalatame, a karpishsha qara qapo mina'e kallada. Isha ana'e innaanno a kiristaana a jaalatame. A kodditoma isha dakintan qoota kodaan ke qaarqaaro ka Kiristoosi qudan innaassin a kiristaana' kodde malla, a qaran qapto'e ke' jaalatama.

¹⁷ Semmalla oton innaassin a kiristaana kapa'e ana dikniiyyi, akka ana teyyannitto mina isha teyyado.

¹⁸ Oton wa ishin ke' dape'e ca, taakiti kuura a' qara qapto caayye, ana qaropa oorshe.

¹⁹ Tin anti Pawloosi kuura a qara' qapto “Ana ke' xaffalan.” In kiini ka harkiyyon sede taafni ka ke' upnaanni. A koddito ma qoota caattaaytiti desa anti kuli akkan ke qara kuura qapo ke' matte oorissa ana parpaaccisni in kitto.

²⁰ Semmalla innaanno a kiristaanatiiyyi! Akka wossen paxaara ana' kooto'en Poqallaan ke naappanni, atara Kiristoosin karittiyyo nessishe!

²¹ Waan malla sede ke' taafe, akkima ana' ajajammitto qootan dukaysanno malla ka laadi akka waan kaassanna' qaropa kooto upa.

²² Semaliiyyiiw Waaqa akkima qinseetaayshin dakayo ka akkan ishin kapopa de'o' kodo, qootan kippeeta qapo malla, tika an kela' nessado ana' harmishe.

Nakayta a piraampira

²³ Eppafira isase Yesuusi Kiristoosi minan ana olliiyyi hidame, nakayta ke erkini.

²⁴ Isasene ana olli koda koona, Mariqoosi ka Aristirokoosi ka Deemaasi isho Luqaasi, asseew nakayta ke erkini.

²⁵ Daassata a Poqalla a Yesuusi Kiristoosi a ishin olli caatto.