Mataafa Saamu'eeli a lammatta 15 - Mataafa Qulqulloota

Apseloomi akkima Taawwiti tiyye

¹ Sekkammaayye, Apseloomi sarakella ka fartada isho orra isha turandesa hiro kunda keni issi qobbeessade.

² Ka paraappan xaani ka porase a xarra katama kapa qa'anni Ka oto nama deexa qapo ka firteeta akkatta nuqusa kapopa deenooyye, haleeni ka ishi kiini, “Atti a nama katama a xaamane? Ka oto ishi oorsho ka kido “Anti orxaytaayti Isira'eeli karaayye anti an ama kafa eeyyeti.”

³ I'ishi kiini, “Tin are tooye, deexaayti dukaata ka likkeeta ma, nama a nuqusa shuume a ke qara dakayo takka nefo in co.”

⁴ Ka kammadesa kiiniwwi, “Hay, katin anan piisse oppa taanynya kiiteeyye, nama deexa taaki wa lelada qapo helani ana kapopanne de'a, anti ka ishi dukaata murri heene.”

⁵ Ka oto nama ishi kaareeta oorissa'e isha kapopa dehaannooyye, harkaadi deranni ka namase qapni ka dinkin.

⁶ Apseloomi ka orra Isira'eeli a deexaayshoti mura akkatta malla nuqusa kapopa anna pisa'e, asseew kooni ka orra Isira'eeli kara karittaaysho issipa oorsade.

⁷ Para afuri kammaayye, Apseloomi ka nuqusase Taawwiti kide, “Akkan Keproonipa aano ka xasa an Waaqa daasade kalsho'e, ana faqqate.”

⁸ Anti orxaytaayti an piita Sooriyatiiyyi Keshuuri kara kalooyye, xasan Waaqa daasade ka kide, “Dukaatan otoni iWaaqa Yursaalamipa anan kaleeyye, Keprooni kara'en ishi sakatada.”

⁹ Nuqusa ka ishi kide, “Nakaytan aane.” Ikka xa'e ka Keproonipa aane.

¹⁰ Ma xoori Apseloomi, kaffa Isira'eeli piisa opa dekandekatti orra erke ka kide ishootta kida, “Oto nessa kaasa dakaytaneeyye, kida Apseloomi Keprooni kara'e nuqusume.”

¹¹ Xaykitta halaame nama dippa lakki ka Apseloomi olli aane umma we takkan nefo in upnaanne ka sullaase oppaayye in qapan, ma asseew olli aanen.

¹² Apseloomi ka ete kalisowwa dehaannaaneeyye, Akitofeelise dehaamampayta Taawwiti kodde namase a katama Kiillo kamma orra erke ka halacciise. Sullaatase ka ollinniiw koopni. Orra Apseloomi quda koddino ka koopaanneew anni.

Akkima Taawwiti Yursaalami kara alle qahe

¹³ Nama erkame takka ka Taawwiti kapopa de'e ka ishi kide, “Ha orra Isira'eeli karittaysho Apseloomi qudopa oorsade.”

¹⁴ Taawwiti ka saarraadi a isha olli Yursaalami kara caati kide, “Xa'a! Ka qahana a taakiti Apseloomi kela an pahanooy, akka ino qara'en urrin ka nama katamoosen kara co in lennin ka ino in pirrini'i, jarjartan qahana.”

¹⁵ Saarrasene xaadi ka ishi kidene, “Tin nuquso! Ino orxayaatti wa atti ishi piisatte koda'e in harmisanne.”

¹⁶ Nuqusase ka sooke, toolaadi piisa ka isha kamma'ew sooke, ma xoori akka tikaadi a mankisteeta ishi tooytane'e lammittewwaadi kudani hattishe.

¹⁷ Nuqusase ka samayta piisa iskamma qeede ka sooke ka tika takka xaala katama qara kitto kapa qa'ade.

¹⁸ Saarraadi piisa ka isha turopa tarpa, Keeritaata ka Felitaata isho Keetteta a katama Kaatiti isha kamma deete, nama dippa lehi ka nuqusa turopa tarpen.

¹⁹ Nuqusa ka Itaayi Keettitta kide, “Maana'e ino olli deeni? Alle tiitaawe ka nuqusase Apeselomi kapa tawe. Atti a haptitta ka piitaaytippa sookteey.

²⁰ Atti dehaynitte deeteey, ka kuli ana poran opa anno in upnin, olli akka pora tirarraawto'e, attan koda ettansha? Hellaassin isquda qeede ka alle tiitaawe. a Waaqa xoonasene xaadi pirama in qapnini isho amanumaadi ke akkisho.

²¹ Itaayi xoori inuqusa oorshe ka kide, “Caattampayta Waaqa ka ke poqallaayyo nuqusannen xaxanni! Oton punu toota taaki caattaayye, anti orxaytaayti, pora atti poqallaayyo nuquso oppa kinnaannitto eeyyen kinnaada.”

²² Taawwiti ka Itaayi kide, “Qattin ka ka aane” Keettittase Itaayi ka orraadi isho toolaadi a isha quda co piisa qeede ka tarpe.

²³ Ete orra piisa ishootta kapan tarpinooyye, samayta piita piisa ka ullupe ka pooye, nuqusa ka kirra Qetrooni tuulle. Orra piisa ka tuulle ka qinda koommayta qapade.

²⁴ Qeesittase Apiyataari ka de'e. Qeesittase Satooqi kuli ka eeyye'ew ca. Lewaatase taapotase a kodayteeta Waaqa haanitto ka isha olliiw eeyye kitta ka haka orra piisa katama kara sookno kara'e, taapotase a Waaqa piita xaayen.

²⁵ Kammadesa nuqusa ka qeesittase Satooqi kide, “Taapotase a Waaqa qeeda ka katamaapan tiitaawa; oton iWaaqa ana xasa qapaayye, i'anan tiitaawa ka akkan isheetta isho poraadi a kallaata lammatta akko koda.”

²⁶ Ma xoori oton ikiini, “An ke xasa an qapooyye, tin aren caay, awa ishi aaka ana qara kodo.”

²⁷ Nuqusa ka qeesittase Satooqi kideewwe, “Atti a akkampaytanne? Innaatti Ahimaasi isho inna Apiyataari Yoonataani qeede ka katamaapa nakaytan kale. Ke isho Apiyataari hellaassin lakki qeeda ka kala.

²⁸ Tin are anti haka nessa ishin kapa ana qara kayno kara'e, malkasene a koommayta kapa'en asadaay.

²⁹ Seminan Saatooqi isho Apiyataari ka Yursaalamipa taapotase a Waaqatin tiitaawen ka eeyye tawen.

³⁰ Taawwiti xoori matta qaranne ohaata qeede ka marattase a irroota Taprasayti loqqa pattan fayyade ka poran pooyni. Samaytase isha quda co piisa ka mattadaasso qaran ohawwa qeedaden ka pooytan fayyaden.

³¹ Ikka Taawwiti lelen ka kidene, “Ha Akitofeeli Apseloomi olli sullaase oppaayye qapa!” Taawwiti ka qinsade ka kide, “Oo Waaqqo! Dehaamta Akitofeeli eepumopa purshe.”

³² Taawwiti ete porase qara Waaqa sakatannaan kuutase a irrootaseti qara kayeeyye, Arkittase Hushaayi mehaddaadi isquda kaa'e ka matta qara kuyyalayta pulade ka isha mina mina'anayta de'e.

³³ Taawwiti ka ishi kide, “Oton ana olliiyyi deeniiyyi haadeta ana qara koddita.

³⁴ Ma kadin katamaapa kalli ka Apseloomi kiini, “Nuquso, orxaytaaytin kodda ka akkiman xatta orxayta aappaayshina kodde mina orxaytaayti koddaayye.” Dehaama Akitofeeli olkelan dapaanne ana qaarqaarta.

³⁵ Qeesewwasene Satooqi isho Apiyataari ke olliiw eyye caadaneey, semmalla wa tika nuqusa kara dakayta piisa ishootta lele.

³⁶ Tin hellaasso lakki Ahimaasi isho Yoonataani nefo ishootta olliiw eeyye caadan. Akka wa dakayta piisa ishootta qara ana erkita.

³⁷ Moottase a Taawwiti Hushaayi ka katamaapa tiitaawe ka ete Apseloomi Yursaalami karopa siti kullinooyye eeyye kaye.