Mataafa Saamu'eeli a lammatta 13 - Mataafa Qulqulloota

Akkima Amnooni Ti'imaari irreetan qapade

¹ Apseloomi inna Taawwiti, xarjaallitteeta takka a alawta'e qapa. Maxxaadi nefo Ti'imaari; inna Taawwiti Amnooni ka isheetta xajeele.

² Qoota isheetta issin kitto malla, akkima isheetta akkatta ishi in koddinin ikka ishi akkaatte. Ikka haka isheetta minan paaqnooti dikattaan kupade.

³ Ma xoori, Amnooni mootta takka Yoonataapi kidammo qapa. Yoonataapi inna inna opa Taawwiti a Shaama, isha nefo akatan ilattayta.

⁴ Yoonataapi ka Amnooni kide, “Atti inna nuqusa maana malla kuyyaata mina apdattaaw apdanni? Ana'e alelto?” Amnooni ka ishi kide, “Ti'imaari alawta innaanno a Apseloomin xajeele.”

⁵ Yoonataapi ka ishi kide, “Loshshaatti qara muke ka a paaqno pahanaado ka oto aappaayshin ke tooyya de'oyye, ishi kide, “Enentinno Ti'imaari a deeto ka damta ana daasso ka damtase nefo ildaayyo oppadesa kooto ka ana pupuukkisso.”

⁶ Amnooni ka oori nama paaqno pahanaade ka muke ka ete nuqusa isha tooyya de'eyye ishi kide, “Akka enentinno Ti'imaari deeto ka ildaayyo oppa desa laaqqota lakki laaqqito ka ana pupuukkisso'en ke naappanni.

⁷ Taawwiti ka Ti'imaari kamma tika mankisteeta opa nama erke ka kide, “Tika innaassina a Amnoonipa aane ka damta ishi kode.”

⁸ Ti'imaari ka tikase a innaasso a Amnooni ante ka isha a eeyye muke akkite. Ka pukessa shakkaya qeette ka tiqqiirte ka ildaadippa desa laaqqowwa laaqte.

⁹ Ka payqase alle putte ka laaqqose isha tura dehasse; Amnooni xoori dameeta tiite ka kide, “Arekela nama piisa alle sookshe.” Nama piisa ka alle isha kapa sooke.

¹⁰ Ikka Ti'imaari kide, “Kaata karopa damtasetin ana xooye ka ana pupuukkishe.” Ti'imaari ka laaqqotase a laaqte qeette ka innaasso Amnooni kapopan kaata karopa kullite.

¹¹ Ma xoori akka damo'e ete ishi laaqqotase dehasseeyye, isheetta qape ka ishi kide, “enentinno xooye ollin mukna.”

¹² Ikka ishi kiite, “Inna! Innaanno wa asse paha apari Isira'eeli kara in koddineey, anan kamtishan ka neequmse in kodan.

¹³ Xawwi anti ayshopan jeeriyyo haadada? Atti nefo Isira'eeli karaayye jeerolayaappa takka koddita; semmalla in ke qinsanniiy, nuqusa lele ka ana ken dawrooy.”

¹⁴ Isha xoori isheettan dakaya tiite ka qoota kokkonnuma isheetta qaropa qapo malla, irreetanne isheetta qapade ka isheetta olli muke.

¹⁵ Ka kammadesa a kuttati isheetta needdade, needduma isheetta needdade ka xajeela a turan isheetta xajeele qara jaalen ka ishi kide, “Xa'e ka sooke!”

¹⁶ Ikka ishi kiite, “Inna innaanno! Wa ana qara koote qaropa dapoose a amma ana sookinnitto jaalli.” Umma isha isheetta in dakayne.

¹⁷ Ka orxayta takka isha kela koda koono hale ka ishi kide, “Ildaayyo tura iskatteese alle sookshe ka kamma xarra dufe.”

¹⁸ Orxaytase xaadi ka alle isheetta sookshe ka kamma xarra dufe. Sitiiyyi isheetta qamiseeta derayteeta sira qapto, a tuparra issin ca a nuqusa kalsannaane kalsatte.

¹⁹ Ti'imaari ka qamiseetase dera sira qapto a kalsatte alle kaa'ite ka matta qara tara fidatte ka harkaan matta qara qapatte ka ullupittan sookte ka kalte.

²⁰ Innaasso Apseloomi ka ishi kide, “Hela innaassin Amnooni irreetan ke qapade? Enentinno! Amma jaw kide ka sedeppa in dikadan, isha innaassinaay.” Ti'imaari ka tika a innasso a Apeseloomi kara xawwayasatte ka eyye kalta.

²¹ Nuqusa Taawwiti ete sede piisa dakayeyye, a kuttati miiroode.

²² Umma Apseloomi Amnooni'i oppa in oorinne. Ka a paxaara taaki a neeqa ishi in haasawanne. qoota Amnooni irreetan alawtaadi Ti'imaari qapade malla, isha needdadeey.

Akkima Apseloomi Amnooni qara haalota pooyye

²³ Para lakki kammaayye Apeseloomi Efreemi kapaayye katama Paalehasoori karaayye kaharra qudaayye nyirfa mujanni ka hellaa a diira a nuqusa piisa eeyyepa damta hale.

²⁴ Ka nuqusa kapopa aane ka nuqusa kide, “Anti orxaytaayti kaharra qudan nyirfa mujanniiy, ke isho saarraatti akka ana olli deetane'en ke naappanni.”

²⁵ Ma xoori nuqusa i'Apseloomi kide, “Inna! Innaayyo ke qara'en ulsaannaay piisaani an deeno. Apseloomi ka a kuttati isha naappade. Nuqusa xoori anta in heennaanne ka ishi sake.

²⁶ Apseloomi ka kide, “Oto koddini in kinniniiyyi, innaanno Amnooni a ino olliiyyi de'on ka. Nuqusa ka ishi kide, “Maana malla ke olli anni?”

²⁷ Apseloomi xoori a kuttati nuqusa naappade, nuqusa ka akka Amnooni isho hellaa nuqusa a diira isha olli aanane kode.

²⁸ Apseloomi ka orxayaadi ajaje ka kide, “Oto Amnooni taadeta wayneeta maashshoodo tooya ka oton ishina kiino ishshaayye, ishsha; ana ishin ajajeey in fuuran, japaada ka kokkonnaada.”

²⁹ Orxaya Apseloomi ka wa Apseloomi ajaje Amnooni qara koden. Hellaa nuqusa a ata hase piisa ka kaankewwaasso qara fayyaden ka qahen.

³⁰ Ete poroppa caaneeyye, nessa ka nuqusase Taawwiti qara kaye ka kiini, “Apseloomi hellaa nuqusa piisa pire umma a kela pahe in co.”

³¹ Nuqusa ka xa'e ka mehaddaadi isquda kakkaa'e ka piitoppa pi'e, saarraadi a isha kapa qa'anna pisa ka asseew mehaddaasso kakkaa'en.

³² Yoonataapi inna innaapa Taawwiti Shaama ka kide, “Poqallaayyo! Akkima hellasene xaayti a diira piisa leyshen in dikadan. Amnooni patta to'eey. Kuyyaata ishi Amnooni Ti'imaari enentaaysho irreetan qapade paayyatte Apseloomi sede kodaa'e piisadeey.

³³ Semmalla poqallaayyo nuquso! Hellaayyo a diira piisa pirame in kidan ka in dikadan; Amnooni patta to'eey.”

³⁴ Apseloomi xoori iqahe. Namase waartiya tooytino ka opeela tooyyade ka irroota quda orra lekayta a pora katama Hornaayimiti xata deeno akke. Ka nuqusa kapopa dehaade ka wa akke piisa nuqusa lele.

³⁵ Yoonataapi ka Taawwiti kide, “Tin hellaatti ikalen. Akkan anti orxaytaayti kide qara'e koddite.”

³⁶ A sede afappa in dikkinniniiyi, hellasene a nuqusa ka kalen ka nessaaysho kuttishen ka pooyen. Nuqusa isho saarraadi kuli ka a kuttati pooyen.

³⁷ Apseloomi ka qahe ka Talmaayi inna Amihuuti nuqusa Keshuuri kapopa aane. Taawwiti ka kuyyawwa leka innaadi pooyade.

³⁸ Semmalla Apseloomi ka Keshuuripa qahe ka eeyye para sessa pire.

³⁹ Nuqusase Taawwiti ka toota Amnooni kamma xasa oorsade ka Apseloomi kapopa anta xajeele.