Mataafa a Nuqussa a lammatta 25 - Mataafa Qulqulloota

Akka Yursaalami harka nyaapa oppa pi'ite

¹ A nuqusa Yihuta Seteqiyaasi nuqusumeeyye para sakalattaatiiyyi ka leya kundattati ka kuyyaata kundattaatiiyyi, nuqusa Paapilooni Naapukedenasoori ka xelaadi a oranna piisa qapade ka Yursaalamipa tuule ka kapa mure; ka kawwatta katamaati pora takka takka qudopa piita tuule.

² A Seteqiyaasi nuqusumeeyye haka para kudanka takka kaynitto'e, katamoosen ka kapa murama qudaaw caaden.

³ Leya afratta oppa kuyyaata sakalattatiiyyi, katamasene qoota akata loosaden malla, orra kara co ka wa dama dape.

⁴ Sitiiyyi kawwatta katama ka pootamte, nuqusa Yihuta Seteqiyaasi ete sede akkeeyye kadi punu xela Paapilooni katama kapa mureeyye, xelase xaadi a oranna'e qeede ka halkeetteeyye xarrase kawwaya lakki otantoppa co ka dulase a nuqusa kapa deha oppan naaba Yurtaanoosi opa qahe.

⁵ Xelase a oranna a Paapilooni ka nuqusa kamma daane ka laka Iyyaarko oppa isha qape. Xelaadi a oranna nefo ka alle isha diishe ka kapa pase.

⁶ Ikka isha qeeden ka katamasene a Ripila a nuqusa Paapilooni ishi ca opan ishan kalen; ka qara faraten.

⁷ Ka hellaadi ildaadippa desa isha tura leyshen ka Seteqiyaasi kara ilda qoten ka sansalaatan isha hiden ka Paapiloonipan kalen.

Akka tika qulqulloota pootamte

⁸ A nuqusa Paapilooni Naapukedenasoori nuqusumeeyye para kudanka sakalattaati leya kenatta oppa kuyyaata tappattatiiyyi, Naapusaartaani isase dehaamampayta a nuqusa Paapilooni ka saara a tooytampaya nuqusa kodde ka Yursaalamipa de'e.

⁹ Ka tikase a qulqulloota a Waaqa ka tika mankisteeta isho tikka toolla kukutta ka tikka Yursaalami kara ca piisa apittan kupe.

¹⁰ Xelase a oranna a Paapilooni isase saarase a tooytampaya a nuqusa olli co piisa ka kawwatta a Yursaalami quda kitto alle poote.

¹¹ Naapusaartaani saarase a tooytampaya a nuqusa Paapilooni ka samayta a katama kara hase ka a turan nuqusa Paapilooniti harka daasade isho orra a ata hase piisa qeede ka Paapiloonipan kale.

¹² Naapusaartaani saarase a tooytampaya nuqusa xoori teekolaya piissiti akka dulla qotadan ka dishma wayneeta dishadane'e eyye ishootta diishe.

¹³ Xeloose a Paapilooni ka meehase a tika qulqulloota a Waaqa kela co tuudda sipla poora ka pora a qara meeha xaaynaan a kela kanaannawwa qapo isho mirka pisha a akata kutta a sipla poora oppa kodame oppa faaten ka siplalla kelaayye Paapiloonipa haadaden.

¹⁴ ka akkimose mina'ew, tistewwa ka paallawwa a apitta ka qorewwa kara apitta libbinnaane isho jilfada ka meeha a sipla a pora oppa kodame a tika qulqulloota piisa qeedaden.

¹⁵ Saarase a tooytampaya a nuqusa Paapilooni ka qorewwa kara apitta opannaane ka sahinna warwarra a warqeeta isho sipla dakara oppa kodame qeedeneew.

¹⁶ Tuudase lakki a sipla poora ka porrasene qara meeha xaaynaane kela kanaannawwa qapa isho mirka a pisha a akata kutta a sipla poora oppa kodame isasene a Selemooni tika qulqulloota a Waaqa kela kode qoota akata ulsi malla kiila in ettaninne.

¹⁷ Tuuddosen derumtaaysho dikla kudanka sette sette kayni ka tula qaraayye sira sipla poora qapan. siroosen nefo derumtaaysho dikla sessa sessa ka qudandesa nyupura isho pahana dalta roomaani a sipla poora oppa kodame qapan.

Akka Yihutaata Paapiloonipa poojamte

¹⁸ Saarase a tooytampaya a nuqusa Paapilooni ka Serayaani saarase a qeesewwa ka Sofoniyaasi a qeesuman isha kamma qate isho tooytampayasene a xarra tika qulqulloota sessa hida qeede.

¹⁹ Ka orra katama kara hase oppaayye saarase a xela oranna ka dehaamampaya a nuqusa keni qeede ka saara a xela oranna a kutta a oranna orra reexanno isho a katama kara hase a matta qapo nama kunda lehi kuli qeede.

²⁰ Naapusaartaani saarase a tooytampaya a nuqusa Paapilooni ka nuqusase a Paapilooni piita Hamaati karaayye katama Ripila kara co kapopa ishoottan kale.

²¹ Nuqusa ka eyye Ripila kara'e akka ishootta leyshane kode. Samayta Yihuta pora asse pahonne piitaaysho oppa poojame.

Akka Ketaaliya mukissampayta Yihuta kodde

²² Nuqusa Paapilooni Naapukedenasoori orrase a Yihuta eyye piitaaysho oppa hase qara'e oopa Safaani inna Ahiqaami Ketaaliya mukissampayta kode ka shuume.

²³ Saarra xela oranna a Yihuta Isma'eeli inna Nataniyya ka Yohanaani inna Qaareha ka Serayya inna Tanihumeeti a Netofitta ka Ma'ikitta inna Saniyya isho orra ishootta quda co piisa ete akka nuqusa Paapilooni Ketaaliyase mukissampayta shuume dakayeneeyye, misippopa Ketaaliya kapopa aanen.

²⁴ Ketaaliya ka ishootta isho orra ishootta quda co tura xaxade ka kide, “Saarra Paapilooni malla in fuuran; ma are piisse oppa'ew kallaada. Ka nuqusa Paapilooniti piddama; we piisa ishina ettanaay.”

²⁵ Ma xoori parose oppaayyeew leya tappattatiiyyi Isma'eeli isase sanynyeeta nuqusa quda qate oopa Elshama'i inna Netaniya nama kudani isquda qeede ka katama Misippa opa aane ka Ketaaliya ka Yihutaata isho Paapilooneta isha quda kitto leyshe.

²⁶ Qoota Paapilooneta fuuren malla a shakka ka a kutta in kiinin mali samayta piisa ka saarrasene a xela oranna ollin xa'en ka piita Kipsi opa alle qahen.

Ikkoniyaani akka hidaappa furmade

²⁷ Ikkoniyaani a poojame ka hidameeyye para kunda sessa tappattati leya kudanka lakkatta oppa kuyyaata kunda lakki tappattaatiiyyi, Ewilmerokati Paapilooni qara'e nuqusume ka parose oppaayyeew hidaappa Ikkooniyaani fure.

²⁸ Ka naalumaan isha haasawsiise ka nuqussa Paapiloonipa isha olli poojame qaropeela pora ulfeena a kuutta ishi daashe.

²⁹ Ka mehaddasene a tika hida kara kalsanna quda purshe. Ikkooniyaani ka haka co kara'e kuyyaata piisa toma nuqusa oppa dammi.

³⁰ Nuqusa ka haka Ikkooniyaani co piisa kara'e qallapa isha parpaaccisno kuyyaata mina ishi daanni.