Mataafa a Nuqussa a lammatta 24 - Mataafa Qulqulloota

¹ Xelta a Iyyo'aqemi oppaayye Naapukedenasoori nuqusa Paapilooni piitaadi torpe, isha ka para sessa ishi kappare ka kammaayye tiite ka isha qara xa'e.

² Waaqa ka akka orxayaadi xuumampaya qudan haasawade mina'e, akka qaaletaadi qara'e Yihuta patissa'e, adampaya a Paapilooneta ka a Soorata ka a Mo'aapeta isho a Amooneta qaropa Iyyo'aqimi erke.

³ Sede nefo wa malla asse koddite, juppoota a Minaase kode qaran xaate'e akka fuulaadi tura Yihuta alle sekaysho'e, qoota Waaqa ajaje malla.

⁴ Qoota Minaase orra dapa in koonini leyshe ka katama Yihuta diika orra dapa in kooninitin immake malla Waaqa ishi juppootaadi diissata in faane.

⁵ Wa a ata hase a Iyyo'aqeemi kode piisa mataaffa torra a nuqussa Yihuta qara'e taafamen.

⁶ Iyyoaqemi ka to'e, innaadi Ikkooniyaani ka pakkaadippa nuqusume.

⁷ Nuqusa Paapilooni kirra Efratiisitiiyyi paayyatte haka kirra Kipsiti qoota haminta Kipsi qeede malla, sekkammaayye nuqusa Kipsi piitaadi kara in sookne ka oranna in tuulle.

Ikkooniyaani nuqusa Yihuta

⁸ Ikkooniyaani a Yihuta qara nuqusumooyye, paraadi kudanka sette. Ikka Yursaalami kuti'e ka leya sessa mukshe. Aayyaasso Nehushita kidammi. Isheetta nefo enenta Elnataani a nama katama Yursaalami.

⁹ Isha akkima aappaaysho mina'e fuula Waaqa tura wa neeqa kode.

¹⁰ Sitiiyyi saarra xela oranna a Naapukedenasoori a nuqusa Paapilooni ituulen ka Yursaalami kapa muren.

¹¹ A saarraadi a xela oranna Yursaalami kapa mureneeyye, Naapukedenasoori nuqusase a Paapilooni mattaadi'i eeyyepa de'e.

¹² Ikkooniyaani nuqusa Yihuta ka aayyaasso ka saarraadi ka saarraadi a xela oranna isho saarraadi a tika mankisteeta piisa ka sooken ka nuqusa Paapilooniti harka daasaden. Nuqusa Paapilooni ka a nuqusumeeyye para settattatiiyyi Ikkooniyaani qape ka pooje.

¹³ Akka Waaqa turan haasawade mina'e, Naapukedenasoori ka teyanta a tika qulqulloota a Waaqa isho a tika mankisteeta piisa haadade ka meehase a warqeeta a nuqusase Selemooni tika qulqulloota a Waaqati kodacciise pappaqshe.

¹⁴ Ka samayta Yursaalami isho saarraadi a xela oranna ka xela orannaadi ka harmoota a qora isho a tuma olloppa nama kuma kudani pooje ka piitaadipan kalade. Umma teekolaya maliiyyi nama piitoppa in hasne.

¹⁵ Naapukedenasoori ka Ikkooniyaani pooje ka olliiyyiiw aayyaasso ka haantowwaadi ka saarraadi a tika mankisteeta isho orra a piitaadippa kukutta Yursaalami kara pooje ka Paapiloonipan kale.

¹⁶ Nuqusa Paapilooni ka akkimoose mina'ew a kokokkoka ka oranna torpa ettaninna ka xormeeta a oranna kuma tappa ka harmoota qora isho a tuma kuma takka pooje ka Paapiloonipan kale.

¹⁷ Nuqusa Paapilooni ka apuyyaata opa Ikkooniyaani Mataaniyya pakkaadippa nuqusumshe ka maxxaadi nefo purshe ka “Seteqiyaasi” kide ka hale.

Seteqiyaasi nuqusa Yihuta

¹⁸ Seteqiyaasi a Yihuta qara nuqusummooyye paraadi kunda lakki takka. Ikka Yursaalami kuti'e ka para kudanka takka mukshe. Aayyaasso Hamutaali kidammi. Isheetta nefo enenta Ermiyaasi a nama katama Lipina.

¹⁹ Ka akkima Iyyo'aqemi kode mina'e, Seteqiyaasi kuli fuula Waaqa tura wa neeqa'e kodeew.

²⁰ Wa malla sede piisa Yursaalami isho Yihuta qara kayte, qoota Waaqa a kuttati ishootta qara miirode ka piraampira qara alle ishootta kate malla. Seteqiyaasi ka nuqusa Paapilooni fallqe.