Mataafa a Nuqussa a lammatta 21 - Mataafa Qulqulloota

Minaase nuqusa Yihuta

¹ Minaase a nuqusummooyye paraadi kudanka lakki; ikka Yursaalami kuti'e ka para kunda keni ken mukshe. Maxxa aayyaassoti nefo Hefisapa.

² Minaase kollumasene neeqa a orrase Waaqa amanni in kinnini a Waaqa Isira'eeli tura alle sookshe kamma aane ka fuula Waaqa tura wa neeqa kode.

³ Ka porrasene a sakatatta kunkunnawwa qara ca a aappaaysho Hisqiyaasi alle qitqishshe oorshe ka dawe; ka akkimase Aki'api nuqusase a Isira'eeli kode mina'e, killoota pa'aliti poqa kalisoota dawe; ka olaahitta asheera qa'e ka hiikka moontati sakatade ka ishootta Waaqaysade.

⁴ Ka tikase a qulqulloota a Waaqa isase a Waaqa qootaadi desa kide, “Yursaalami kara maxxiyyo kara halaama.” Kara'e, killootaseti poqa kalisoota dawe.

⁵ Ka tikase a qulqulloota a Waaqa karaayye paapahaddasene lakki oppa'e, hiikka moontati poqa kalisoota daweew.

⁶ Ka innaadi a mattaadi kalisoota kupannitto kode ka kalshe; ka tipampaya isho so'aya kodde. Ka so'aya isho a kaarayya haleena soosade, Waaqa ka kodoose xaadi akata neeqa qaran xaate miirode.

⁷ Minaase ka pahanasene a olahitta asheera qeede ka tikase a qulqulloota kela xaaye. Isheetta nefo porase a Waaqa Taawwiti isho innaadi Selemooni kide, “Tikoose isho Yursaalamise an Isira'eeli pisa oppa reexade kara'en maxxiyyo haka paraparati halacciisa.”

⁸ Ka poroose mallaaw kideewwe, “Wa an ishootta ajaje piisa a qanqannissa tooytaden ka seera a orxaytiyyo Muuse ishootta daashe tooytaattaan japaaden diisheey, arepadesa piisse an aappadaassoti daashe oppaayye loqqa Isira'eeli akka sookan ka pora rarraatawane an kodo.”

⁹ Samayta xoori in dakayne; akka orrase Waaqa amanni in kinnin a Waaqa Isira'eeleta tura alle pashshe qaran qapto'e neequmta kodane'e Minaase saanta qara ishootta maqqishe.

¹⁰ Waaqa ka orxayaadi xuumampaya qudan haasawade ka kide,

¹¹ “Minaase nuqusa Yihuta, nyala asse paha'e kode ka Amooratase ishin turan kitto piisa qaran qapto'e neequmta kode ka killowwa sakatattaan Yihutaata juppootoppopa kate.

¹² Semmalla Waaqa Poqalla Isira'eeli kiini, “Tin anti wa nama dakayno piisa'e nappaappa akata neeqa'en Yursaalami isho Yihuta qara koda;

¹³ ka watarootase an piita samaariyaatin ekkaysade ka tumpeetase an tika Aki'apin ekkaysade isheettanneew Yursaalami ekkaysada. Ka akkima nama toma kela jaqno ka qupaapno mina'e Yursaalami kara jaqa ka qupaapa.

¹⁴ Ka peela a samaytiyyo alle kata ka nyaapa turopa ishootta tuukka ka daasha; nyaapaaysho ka ishootta pooja ka sara.

¹⁵ Sede nefo qoota aappadaasso Kipsi kara sookene paayyatte haka ammati fuuliyyo tura neequmta koden ka ana miirayshen malla.”

¹⁶ Minaase akka Yihuta fuula Waaqa tura juppoota kooto'e saanta qara isheetta maqqisade maliiyyi orra dapa in koonin lekayta leyshe ka yursaalami piisa diikan immake.

¹⁷ Wa a ata hase a Minaase kode piisa ka juppootaadi a kode mataffa torra a nuqussa a Yihuta qara'e taafamen.

¹⁸ Minaase ka to'e ka dulase xaadi a dishma Uusa kidammo ka tikaadi a mankisteeta kapa co oppa hawlaame. Innaadi Amooni ka pakkaadippa nuqusume.

Amooni nuqusa Yihuta

¹⁹ Amooni a nuqusumooyye paraadi kunda lakki lakki, ikka Yursaalami kuti'e ka para lakki mukshe. Aayyaasso Meshulemeti kidammi, ishetta nefo enenta Haarusi a nama katama Yaatipa.

²⁰ Isha kuli akka aappaaysho a Minaase mina'e fuula Waaqa tura wa neeqa kode.

²¹ Ka pora aappaayshoti oppanneew aane ka killowwa aappaaysho ishi sakatadeti sakatade ka Waaqaysade.

²² Ka Waaqa Poqalla aappadaassoti alle diishe. Umma saanta Waaqa oppan in anne.

²³ Saarra Amooni ka isha sulen ka tikaadi a mankisteeta kara isha ishshen.

²⁴ Samayta ka xa'ew ka a nuqusase Amooni sule leysheew ka innaadi Iyyoosiyaasi pakkaadippa nuqusumshe.

²⁵ Wa a ata hase a Amooni kode piisa mataaffa a torra a nuqussa Yihuta qara'e taafamen.

²⁶ Isha ka dula dishma Uusa kidammo oppa mookame, innaadi Iyyosiyaasi ka pakkaadippa nuqusume.