Mataafa Otoowwa a lammatta 9 - Mataafa Qulqulloota

Akka nuqusitteeta Saapa Selemooni tooyya ante

¹ Nuqusiteeta a piita Saapa ete kurra Selemooni dakayteeyye, kaassumadda a kokkokaatinni isha ekkaysata'e Yursaalamipa deete; ka itturadesa qimaamewwa ka warqeeta akata kutta isho dakadda heraan kokkoka kaalla qara' fee'ite ka orra kuttayta ollin deete ka Selemooni kapopa dehaatte ka kaassuma a mattoppa qapta piisa isha kaassatte.

² Selemooni ka kaassuma a kaassatte piisa ishi oorshe; umma kaassumaappaayye a ishin kame takkan nefo in caan.

³ Nuqusitteetase a Saapa ete ookuma Selemooni ka tikaadi a mankisteeta a qupade ka

⁴ damta isha tura' dehannitto ka kutiitta a saarraadi kutiinaan ka a damta dehanna isho mehadda a kalsannaane ka a ikkayta dehanna ka mehadda a kalsannaane isho kalisoowwa a kupanna a tika qulqulloota a Waaqa kala dehanna akkiteeyye, akata oppa' qawwaawte.

⁵ Ka nuqusa' kiite, “An piitiyyo cooyye qoota kodaayti isho a ookumaaytiti desa wa an dakaye piisa dukaata!

⁶ Ma xoori hakan deeno ka ilddaayyon akkino kara'e, wa ana' lelene an amanne; dukaatanne ookumaayti a kutta quda paka nefo ana in lelamme; wa an qootaayti desa dakaye qaropa a kuttati'i jaalli.

⁷ Oo orraayti maana oloode! Oo saarraatti a awta piisa ke tura' qa'anna ka ookumaayti dakayna, maana olooden!

⁸ Akka Waaqa Poqallaatti kela nuqusa koddito ka mukisso'e, isase ken xasoode ka sufaanaadi qara ke kuttishe Waaqa Poqallaatti, a kalataysamo. Waaqaayti qoota Isira'eeli jaalade ka haka paraparati'i isheetta kokkonnassa fade malla, akka hanqeeta ka dukaata mureeta qeetto'e ishootta qara ke nuqusumshe.”

⁹ Ka kammadesa warqeeta mekliteeta dippa kunda lakki ka qimaamewwa akata kutta isho daka heraan kokkoka nuqusa' daasse. Qimaamewwosen a nuqusitteeta Saapa Selemooni' daasse paha turan apari opani in upan.

¹⁰ Orra a Kiraami isho a Selemooni isasene turan piita Ofiritiiyyi warqeetan kale amma qoyra senteeleta isho dakadda heraan kokkokanne kaleneew.

¹¹ Nuqusa ka qorasene a santeeleta oppaayye fayma a tika qulqulloota a Waaqa isho a mankisteetaadi kodacciise ka asseew sammaarewwa'e, oppaayye kehayta isho pekena kodacciise; umma meeha a masmuureta a asse paho piita Yihuta oppaayye apari opani in akkine.

¹² Nuqusa Selemooni ka nuqusitteetase a Saapati'i wa faate ka kaassatte piisa ishi' daashe; wa a ishi daashe nefo, daassawwa a isheetta ishin ishi' deete qara jaalli. Ikka orra a ollin de'en ollin piitaadipa tiitaawte.

Akkima teyanta nuqusase a Selemooni koopte

¹³ Paroppa'e warqeeta Selemooni' kallitto mekliteeta dippa lehi ka kunda lehi' lehi.

¹⁴ Sede nefo warqeeta ka dakara pirreeta a nakkaatewwa ka nuqussa a piita arapa piisa isho saarra a piitaadi qara kipiran ishi kalinnaan maliiyyi kideeta.

¹⁵ Nuqusa Selemooni kontalewwa a kukutta dippa lakki warqeeta laaqamte oppaayye kodacciise; warqeeta a laaqamte a kontaleeta takka oppaayye kodamte sheqileeta dippa lehi.

¹⁶ Ka kontalewwa shashakka dippa sessa warqeeta a laaqamte oppa kodeew; warqeeta a laaqamte a kontaleeta takka oppaayye kodamte, sheqileeta dippa sessa. Nuqusa ka kontalewwosen qeede ka tikase' xaadi “Tika mankisteeta a mura Lipaanoosi” kidammitto kara' xaaye.

¹⁷ Sekkamma desa nuqusase ka hirta arpa oppaayye suufaaneta kuttayteeta kode ka warqeeta paliten quda uwwishe.

¹⁸ Suufaanese nefo fayma opeela oppan fayyannaan ka lekkanaane lehi qapta ka pora a oppa loqta xaayannaan a warqeeta oppa kodamte ka suufaanese quda qapsiisame qaptaaw; pora kutiittatiiyyi qinda qindanne, pora qara harka xaayannaane qapta; porase qara harka xaayannaan qinda qindanne, karma takka takka qa'ade.

¹⁹ Faymase lehi qara qinda qindanne, pahana a karma takka takka ca; ollopa'e pahana karma kudanka lakki'i qa'ade; umma sufaaneta asse pahato piita takka nefo oppa apari in kodamme.

²⁰ Meeha a nuqusase Selemooni oppaayye ikkayta ikkino piisa warqeetoppaaw kodame; meeha tikase' xaadi “Tika mankisteeta a mura Lipaanoosi” kidammitto kara co piisa warqeeta a palite oppa kodame. Sapana Selemooniiyyi qoota sipla dakara we kapa' dikammi in kinnin malla, meeha sipla dakara oppa kodame takka nefo in co.

²¹ Selemooni markapadda a ishin paata herina a orra Kiraami qulla'e qapa; ishootta ka para sessa oppa'e, takkan warqeeta ka sipla dakara ka hirta arpa ka qamileeta isho keltaya qaqqapni ka ishi ishin kalli.

²² Nuqusase Selemooni teyanta isho ookumanne nuqussa piita oppa a isha kayno in co.

²³ Nuqussa piita piis ka ookuma a Waaqa karittoppa ishi' xaaye dakaya'e, isha kapopa deena faani.

²⁴ A paroppa isha kapopa deena piisa ka daassawwa a meeha warqeeta ka a sipla dakara ka meeha kalsannaan ka a meeha oranna ka a qimaamewwa ka fartada isho kaankewwaan ishi' deeni.

²⁵ Selemooni tikka a kelopa fartada kalinnaane isho sarakella kela' xaynaane kuma afuri qapa ka katamasene a kara kala a Yursaalami isho katamadda a sarakella karaayye fartada kuma kudanka lakki qapa.

²⁶ Ka kirra Efraatiisiti paayyatte haka piita Filisteemiti'i ka haka xeela Kipsiti mankistewwa ca piisa pidde.

²⁷ Nuqusase Selemooni ka Yursaalami kara'e, sipla dakara akka a horoora mina' koopo kode ka akka qora talta irrowwa a Yihuta kelandesa a qora leya mina lekaadane'e' kode.

²⁸ Selemooni ka piita Kipsi isho piitada a pilaatiiyyi fartada kalsanni.

Akka Selemooni' to'e

²⁹ Wa a ata hase a Selemooni andaadi kara' kode piisa mataaffa torra a xuumampaytase a Naataani kara'e ka mataafa xuuma a Akkiya a Seelitta kara'e ka mataafase a keleshaata a Iiddo isase qoota Iyyorpi'aami a inna Naapaati desa akke kara'e taafamen?

³⁰ Selemooni ka Yursaalami' kuti'e ka Isira'eeli piisa qara' para kunda afuri nuqusume.

³¹ Ka to'e ka turka aappaaysho a katama Taawwiti kara ca oppa mookame; innaadi Roopi'aami ka pakkaadippa nuqusume.