Mataafa Otoowwa a lammatta 8 - Mataafa Qulqulloota

Kodadda a pila a Selemooni' kode

¹ Parrasene kunda lakki a karaayye Selemooni tikase a qulqulloota isho a mankisteetaadi qupe ete dikkaden kammaayye,

² katamaddasene a Kiraami ishi' daashe'e harmishe ka qupe ka akka Isira'eeleta kara kallaatto' kode.

³ Sekkammaayye Selemooni ka piita Hamaatisoori opa tuule ka qara pire.

⁴ Ka katamasene a Tasimoori koommaytoppa ca isho katamaddasene a turan piita Hamaati kara' qupe a meeha kara' xaayamma harmishe ka qupeew.

⁵ Ka akkimose' mina'ew, katamaddasene a Pete horooni a ela qate isho a xata qate harmishe ka qupe ka katamadda a kawwattan kapa qorrame ka xarrada isho dufnadda a sipla qapa' kode.

⁶ Ka asseew katama a Pa'ilaati ka katamadda a tika meeha piisa ka katamadda kara sarkeelladda kalinnaane isho a fartada kara kalannaane piisa qupe; ka sene isho wa koda dikade piisa katama Yursaalami ka a Lipanoosi isho pora piitaadi oppa oorto ikka mukinno piisa kara' qupe.

⁷ Nuqusase Selemooni ka orra Isira'eeleta oppa in qapnin, Ketteeta ka Amoorata ka Feresaata ka Hiwwaata isho Iyyapuusata a ata hasse piisa,

⁸ a Isira'eeleta sanynyeetaaysho in pirrin ikka piisse oppa' hasen akka koda hupna' kodane ishootta kitteesse ikka haka awweti karpishshadda kodden ka kodase a hupna' kooni.

⁹ Ma xoori Selemooni Isira'eeleta oppa akka nama takka nefo karpishsha koddo ka kodoose a hupna kodo in koone; ishootta xela oranna ka ajajampaya a saarraadi a xela oranna ka ajajampaya a sarakella, isho a sarakellaan torpina'e kodden.

¹⁰ Sene oppaayye nama dippa lakki kunda ken, saarra nuqusase a Selemooni kodden ka orrose qara saarummi.

¹¹ Selemooni ikide, “Pora oppa taapotose a Waaqa kaye piisa qoota qulqullaawe malla, enenta Feri'ooni iskatteetiyyo tika mankisteeta a Taawwiti a nuqusa Isira'eeli kara' kallaatta ishetta parpaaccisni in kitto.” Ka katama Taawwitiiyyi isheetta qeede ka tikase a mankisteeta a ishi' qupe karopa isheetta kalshe.

¹² Selemooni ka poqase a kalisoota a xarrase a silayta tika qulqulloota a Waaqa tura' kode qara'e, kalisoota kupannitto Waaqa' kalshe.

¹³ Ka qoota kalisoota kalissaati desa akkima Muuse ajaje mina'e, kuyyaata a xaysonessuma' piisaayye, se kideese nefo, sampatadda ka xa'atima aleya isho xaysonessumaddasene sessa paroppa' kodamma, se kidese'ew, xaysonessumadda a laaqqota ka a fera isho a shaakkaatiiyyi kalisoota kupannitto Waaqa' dehayshe.

¹⁴ Ka taanteta a aappaaysho a Taawwiti kamma antaanne, kita kitaanne qeesewwa kodaaysho qara' qoote ka Lawaataaw akka masmuureta kalata saanta qara aanisso'e ka kuyaata mina'e, qeesewwa qaarqaarto'e, ishetta kiteew ka akka namase a Waaqa Taawwiti ajaje mina'e, tooytampaya xarra tika qulqulloota akka xarrada ishootta' kitame tooytane'e, kita kita ishootta qooteew.

¹⁵ Ishootta nefo, ajajase a nuqusase a Taawwiti qoota tika meeha isho a we pisaati desa Lawaata isho qeesewwa' daashe piisa kamman in dapne.

¹⁶ Awta kiritta tika qulqulloota a Waaqa' katameeyye paayyatte haka dikkattaati'i, koda tika Waaqa piisa ka Selemooni olkela teye. Kodase a tika qulqulloota a Waaqa ka pora asse pahon dikkade.

¹⁷ Sekkammaayye Selemooni ka katamaddasene pakateeta piita Etoomi kapa ca a Etsiyyoon- kapiiri isho a Ellaati opa aane.

¹⁸ Nuqusase Kiraami ka ajajampaya a markapaddaadi a qalpeeta pakateeta upa markapadda ollin Selemooni erke. Ishootta ka orra Selemooni ollin piita Oofiri opa aanen ka eeyyeeyye warqeeta mekiliteeta dippa afuri ka kunda kenin kalen ka nuqusase Selemooni' daashen.