Mataafa Otoowwa a lammatta 7 - Mataafa Qulqulloota

Akka tikase a Waaqa marraqamte

¹ Ete Selemooni qinseeta dikkisheeyye, apitta moonte lekkade ka kalisootase kupannitto isho kalisoota a pila kuli kupe; ulfeena Waaqa ka tikase a qulqulloota kela immake.

² Qoota ulfeena a Waaqa tikase kela immake malla, qeesewwa ka tikase a qulqulloota kelopa kulla malaalen.

³ Isira'eeleta piisa akka apitta lekkade ulfeena a Waaqa ka tikase a qulqulloota qara caade ete akkiteeyye, dakadda afame qara'e kilpiippite ka fuula piitan kayte ka sakatatte; ka Waaqa kalataysanni ka kiini, “Isha xoonampayta, jalalaadi nefo pirama in qapan.”

⁴ Sekkammaayye nuqusa isho samayta piisa ka fuula Waaqa tura kalisoota kalshen.

⁵ Nuqusase Selemooni ka lo'alla kuma kunda lakki lakki ka kahirra isho telalla kuma dippa kunda lakki kalisoota dehayshe. Nuqusa isho samayta ka pora asse pahonne tikase a qulqulloota marraqen.

⁶ Qeesewwa ka pora ishootta kitame oppa qa'aden; fuulaaysho tura'e, Lawaata ka qa'atte ka meehase a masmuureta isase a nuqusa Taawwiti xatta kodacciise ka ishin Waaqa kalataysanna qeeden ka dawanni ka kiini, “Jaalalaadi pirama in qapan.” Isira'eeleta piisa ka qa'atte tupaaw kitta; qeesewwa ka minaadesa kaasa dawni.

⁷ Porase a kalisoota a nuqusase Selemooni sipla poora oppa kodacciise qoota kalisootase kupannitto ka a unta isho a hallaaka qapa kupa'e in kaynin malla, Selemooni ka paapahase tika qulqulloota a Waaqa tura co oppaayye kara otanta xawwi reexxe; ka kalisootase kupannitto isho hallaaka a kalisoota takkumta oppa kupe.

⁸ Sitiiyyi Selemooni ka samayta Isira'eeli piisa olliiyyi haka kuyyaata tappaati'i xaysonessumoosen a shaakka ulfeesse; samayse nefo kullaysuma a Hamaatiti paayyatte haka naaba Kipsiti'i ollopa de'e ka akata kutti.

⁹ Qoota porase a kalisoota kuyyaata tappa marraqen ka kuyyaata a pila tappa xaysonessuma ulfeessen malla, kuyyaata settattati xora kodaden ka dikkishen.

¹⁰ Selemooni ka leya tappatta oppa kuyyaata kunda lakki sessattati samayta akka tikkaasso opa kalo isqara xaashe. Ishootta ka paxaarumtase a Waaqa Taawwiti ka Selemooni isho samayta Isira'eeliti kode malla, a kuttaati xasooden ka xasan tikkaasso opa kalen.

Akka Waaqa a lammattati Selemooni tura akkaade

¹¹ Selemooni ka koda a tika qulqulloota a Waaqa isho a mankisteetaadi piisa dikkishe; ete wa tika qulqulloota a Waaqa isho a mankisteetaaditi desa dikade dikkishe kammaayye,

¹² Waaqa ka halkeette isha tura akkaade ka ishi kide, “Qinsetaayti in dakaye ka tikoose are kitto akka tika qulqullaawte a kara kalisoota kalinnaan koddito'e issi reexade;

¹³ akka roopa in roopnini'i oton moonta dufooyye, taaki akka piita luuqqisho'e torrayta ajajooyye, taaki samaytiyyo qara erkannaata erkooyye,

¹⁴ samaytase xayyo maxxiyyon halaame oto issi jeersho ka qinsadooyye ka ana fado ka saantaadi a neeqa qara alle tiitaawooyye, moontexatan ishootta dakaya ka juppootaaysho ishootta diisha. Ka piitaaysho dinsha;

¹⁵ amma nefo, qinseeta poroose opa dehaannitto opa ildaayyo itooyyadan, nappaayyo ka dakayan.

¹⁶ Akka maxxiyyo haka paraparati kara kinnaado'e, tikoose a qulqulloota in reexade ka xawwi reexxe; ildaayyo ka karittiyyo awta piisa eeyye qaraaw kinnaadan.

¹⁷ Atti nefo akka aappaayshin Taawwiti kode mina'e, oton ifuuliyyo turadesa anniiyyi ka wa an ke ajaje piisa kooniiyyi ka taantewwaayyo ka seerriyyo tooytiniiyyi,

¹⁸ akkiman aappaayshin Taawwiti olliiyyi kodayteeta kodade ka kide, ‘Sanynyeetaayti oppaayye a Isira'eeli muksho a dapto.’ mina'e, alka mankisteetaayti in kokkonnaysha.

¹⁹ Ishina xoori oton ana kamma alle tiitaawtan ka taantewwaayyo isho seeriyyo alle diissan ka antan ka killoowwa pilaati orxumtan ka ishootta sakatattaneeyye,

²⁰ sitiiyyi oori piitase an ishootta daashe oppaayyen Isira'eeli alle shukka; ka tikoose qulqullaawte an ulfeena maxxiyyo malla xawwi reexxade ildaayyo tura alle kata; ikka lekna piita piisa tura'e, a jeerte opanka qara seesnaan koddita.

²¹ Tikoose qulqullaawte kadi punu awwe a kuttati orra qawwannittaayye, awse a kapan tarpino piisa qara tammaqa ka kida, ‘Hela Waaqa maana malla wa asse paha piitose isho tikose qara kode?’

²² Samayta ka ishootta oorsha ka kida, ‘Wa malla pateeta asse pahato ishootta qara qeede, qoota Waaqase a aappadaasso Kipsi kara ishootta sookshe alle diishen ka killanna a pila kamma aanen ka ishootta sakataden ka kela orxumen malla.’”