Mataafa Otoowwa a lammatta 6 - Mataafa Qulqulloota

Haasa Selemooni' samayta' haasawade

¹ Selemooni ka kide, “Waaqqo Poqallaayyo! Atti ihhaasawwatte ka kiite, ‘Urratta poora karan kala.’

² Anti ka akka haka paraparati kara' kallaatto'e, ke tikoose kutta ka orra qawwannitto qupe.”

³ A xora samayta Isira'eeli piisa eeyye' qa'atta quda cooyye, nuqusa ka ishoottopa tiitaawe ka ishootta' sake

⁴ ka kide, “Waaqa Poqalla Isira'eeli, isase kippeetase a afaadi a aappinno Taawwiti' daashe harkaadin dikkishe, a kalataysamo.

⁵ Maana malla isha ikide, ‘Hakan samaytiyyo Kipsi kara sookshe paayyatte, tika qulqulloota a maxxiyyo kara halaamo akka kara' qupamto'e katamadda kaffa Isira'eeli oppaayye takkan nefo an reexanne umma akka samaytiyyo a Isira'eeli muksho'e, nama takka nefo an reexanne;

⁶ amma xoori akka maxxiyyo kara' halaamo'e, Yursaalamin reexade ka akka samaytiyyo a Isira'eeli muksho'e, Taawwiti reexade.’

⁷ Ha aappinno Taawwiti Waaqa Poqalla Isira'eeliti'i tika qulqulloota' qupa karittoppa' dikade;

⁸ ma xoori Waaqa aappinno Taawwiti'i kide, ‘Maxxiyyo'e tika qulqulloota qupeeta karittoppa idikatte; sede a asse dikatte ipaxaari;

⁹ ma xoori a tika qulqulloota ana qupo innaatti a kupeettaaytippa sooka' diisheey ke'en.’

¹⁰ Waaqa ka kippeetase a daashe dikkishe, anti nefo ka kippeetase a Waaqa daashe qara pakka aappinno oppa' nuqusume ka alkaadi qara' kuti'e ka maxxa Waaqa Poqalla Isira'eeliti tika qupe.

¹¹ Ka taapotase a karaayye kodayteetase a Waaqa Isira'eeli olli kodade kitto qeede ka tika qulqulloota kela' xaaye.”

Qinseeta a tikase a qulqulloota marraqammittooyye Selemooni qinsade

¹² Sekkammaayye Selemooni ka xora samayta Isira'eeli piisa tura'e porase a kalisoota a Waaqa kapa' qa'ade ka harkaadi moontopa xaashe.

¹³ Setturan Selemooni sipla poora oppaayye pora a qara xata samayta' haasawannaan a derumtaadi dikla ken paldumaadikan dikla ken ka moontandela derumaadi ka dikla sessa kodde kodacciise ka paapaha a laka tulan cooyye otantoppa' xaaye ka qaropa fayyade ka qara' qa'ade ka xora samayta Isira'eeli piisa tura kilpiippade ka harkaadi moontopa xaashe

¹⁴ ka kide, “Oo Waaqqo Waaqa Poqalla Isira'eelitiiyyi, ke a orxayaatti a karittaaysho piisan saantaayti oppan annaati'i kodayteetaayti a' jaalala tooytaanno, piita ka moontan Waaqa a ke paho in co.

¹⁵ Kippeetase a' aappinno orxaytaayti Taawwiti' daasse ikkokkonnasse ka wa afaattin haasawwatte akka awwe koddite mina'e, harkaaytin dikkisse;

¹⁶ oo Waaqa! Waaqa Isira'eeli, akkima orxaytase' xaayti aappinno Taawwiti' haasawwatte ka kiite, ‘Hellaatti oton xaayti mina'e wa koonaane piisa oppa seeriyyo tooytan ka fuuliyyo tura ishin kallaanniiyyi, alka Isira'eeli qara'e nama fuuliyyo tura' kuti'o a' dapto.’ Mina'e kippeetase a' daasse tooyte.

¹⁷ Amma nefo Waaqa Poqalla Isira'eelitiiyyi, kippeese a' orxaytaayti Taawwiti' daasse a dikkatto!

¹⁸ Hela allu dukaatanne Waaqa ipiita qara nama olli kallaada? Ma xoori moonta ka moontada moonta qaropeela ca nefo ke kayni in caaneey, ka kuli tikoose an anti ke' qupe desa atta ke' qajtaaw?

¹⁹ A koddito ma Waaqa Poqallaayyo, qinseetiyyo a' orxaytaayti dakaye; diissata akkatta'e naappuma an kepa dehanna dakkaysado ka ullupitiyyo isho qinseetiyyo an kepa dehanno dakaye.

²⁰ Ilddaatti ka porose are co isase a' kiite maxxiyyo kara' halaama opa a halkeetta ka kuyyaata tooyaden ka qinseeta an anti orxaytaayti porose oppa qinsanno dakaye.

²¹ Ka ana orxaytaayti isho samaytaayti a Isira'eeli qinseeta an porose oppa qinsanninno, tikase' xaayti a moonta a ishi kalto xata dakaye ka oto' dakaytooyye diissata ino' kode.

²² Nama takka oto xelittaadi'i ishin dapooyye ka akka arepa de'o ka xaxado kaassatammooyye ka tikoose are kittooyye porose a kalisoota tura xaxadooyye,

²³ moonte xata dakaye ka farate ka a ishin dape qara'e akka kodaadi' mina'e qara' mure ka a dapa in qapnin akka dapa in qapnin upnayshe ka dukaataadi ishi' kalshe.

²⁴ Samaytaayti a Isira'eeli' qoota ke ishin dapen malla, oto nyaapaaysho tura putamaneyye ka kepa ooran ka fuulaayti tura tikoose a qulqulloota are kitto kara qinsannaan ka ke naappannaan ka maxxaayti haleenaaneeyye,

²⁵ moonte xata dakaye ka juppoota a samaytaayti Isira'eeli' diishe ka piitoose a ishootta isho aappadaassoti' daasse oppopa ishootta oorshe.

²⁶ Samaytaayti oto ishin ke' dapo moonta ka dufamto roopa ka dapadooyye, qoota ishootta rakkacciisse malla, ikka porose opa qinsannaaneeyye ka maxxaayti haleenaan ka juppootaaysho oppa oorraaneeyye,

²⁷ atti moonte xata dakaye ka juppoota orxayaatti a samaytaayti Isira'eeli' diishe ka saanta a qajeelte a qara' kallaadan ishootta kollishe ka piitase a samaytaayti lehanda' daasse oppopa roopa erke.

²⁸ Oto' piitoppa' loota taaki erkannaata taaki rooma taaki torrayta taaki kuyraata qittooyye taaki katamaddaasso oppa pora oppa caaneeyye nyaapaaysho ishootta kapa murooyye taaki adana taaki surumta heente ishootta qara' kaytooyye,

²⁹ samaytaayti a Isira'eeli oppaayye nama ishi rakkoose isho nyarrahata kokkoka dakaatte takka ka harkaadi qinda tikoose opa xaasho ka kepa qinsanno ka ke naappannooyye,

³⁰ moonte poraayti a kallaatati xata ishi' dakaye ka juppootaaysho ishootta' diishe; qoota atti patta karitta nama kara upto malla, nama piisa'e, akka kodaadi' mina' daashe.

³¹ Sitiiyyi piisse a aappadaanno' daasse oppa oto kallaannaan pisaayye ke fuuran ka saantaaytippan aananeey.

³² Haptitta a samaytaayti a Isira'eeli oppa in qapnin qoota maxxase xaayti kutta ka a hupnase xaayti kokkoka isho harkase xaayti akkaade malla, a piita sekati de'e oto tikoose qulqullaawte are kittopa qinsannooyye,

³³ moonte porase a oppa kalto xata dakaye; ka akka samayta piita piisa maxxaayti upnaado ka a samaytaayti a Isira'eeli mina ke fuuro'e ka tikoose an anti qupe akka maxxaayti kara halaammo upnaadane'e, haptittoseti wa ke kaassanna piisa kode.

³⁴ Samaytaayti qinda opa ishootta erkinitto piisa opa oto nyaapaaysho torpa tuullaaneeyye ka katamoosen a atti reexatte isho tikoose an anti maxxaayti qupe opa keepa qinsannaaneeyye,

³⁵ qinseetaaysho ka naappattaaysho moonte xata dakaye ka ishootta qara qate.

³⁶ Nama ishin dapa diinno in cooy, oto ishin ke dapaneeyye akka miirotto ka nyaapa pora seka taaki a deha a ishootta poojo turopa ishootta tuuknittooyye,

³⁷ ikka piitase a opa poojameneeyye maraarfadan ka dapoppa ooraaneeyye ka piisse a oppopa poojameneeyye kiinaane, ‘Juppootan koone ka ishin dapne ka wa neeqa kooneeyye’

³⁸ Ka a eeyye caaneeyye karittaaysho piisan ka isi piisan dapoppa oorraaneeyye ka piisse a aappadaassoti daasse ka katamasene a atti mattaayti reexatte an tikka oppa maxxaayti tika qulqulloota qupe opa qinsannaaneeyye,

³⁹ moonta porase a ishi kalto xata qinseetaaysho ka naappattaaysho dakaye ka ishootta qara qate ka juppoota a samaytaayti a ishin ke dapen ishootta diishe,

⁴⁰ Amma nefo waaqiyyo, ilddaatti a tooyyaden; ka qinseeta porose are co oppa dehaatte opa nappaatti ka dakayen.

⁴¹ Oo Waaqqo Poqallaanno, xa'e ka taapotase pahana hupnaayti kodde olliiyyi poraayti a nessuma opa kulle; oo Waaqqo Poqlo, qeesewwaatti a dina uwwisaden, qulqullowwaatti ka xoonaattin xasooden.

⁴² Oo Waaqqo Poqlo, namaayti a reexatte alle in diishan; ka jaalalasene xaayti pirama in qapnini a orxaytase xaayti Taawwiti kippeeta daasse dikado.”