Mataafa Otoowwa a lammatta 5 - Mataafa Qulqulloota

¹ Kodase a Selemooni tika qulqulloota a Waaqati' kode piisa ete dikkadeeyye, warqeeta ka dakarase a pirreeta isho meeha a pila a aappaaysho Taawwiti xawwi reexxe piisa qeede ka tika meeha a tika qulqulloota a Waaqa kelopa kalshe.

Akka taapotase tika qulqulloota kelopa kale

² Sekkammaayye Selemooni ka akka taapotase a kodayteeta Waaqa Siyyooni katamasene a Taawwitiiyyi qeedane'e, qimoota Isira'eeli ka mattiyya a toolla isho saarra a kaffa piisa Yursaalami karopa ollopa hale.

³ Samayta Isira'eeli' piisa ka awta xaysonessuma a leya tappatta ulfeessammaaneeyye, nuqusa turopa ollopa de'e.

⁴ Ete qimoota Isira'eeli' piisa ollopa deeteeyye Lawaata ka taapotase isqaropa xaysatte.

⁵ Ka taapotase a Waaqa ka tukkanaadi a ishshaarritta isho meehaadi a xawwi' reexxame a kara ca piisa qeeden ka opeela ishin fayyaden. Qeesewwa a Lawaata kodde ka mehaddasene' haaden.

⁶ Nuqusase Selemooni isho xora samayta a Isira'eeli a isha kapopa xore piisa ka kahirra isho lo'alla a dikoota in qapnini taapotase tura' kalisoota' dehayshen.

⁷ Qeesewwa ka taapotase a kodayteeta Waaqa' qeeden ka kaatasene a qulqullitteeta qulqullowwa karaayye xoollasene a kirupeelewwa kela'e porase' xaadi oppa' xaayen.

⁸ Xoollasene a kirupeelewwa paldade ka taapotase a kodayteeta Waaqa isho molookaddaadi qara deken.

⁹ Molookaddasene' qoota dedderaan malla, nama fuula qulqullitteeta qulqullowwa tura' qa'ade pisa'e akkaanni. Ma xoori nama a tika Waaqati paapaha oppa cooti akkanni in caan ka awwe ikki eeyye caan.

¹⁰ Awta Isira'eeleta Kipsi kara sookte kammaayye, Waaqa ka ishootta olliiyyi kodayteeta kodadeeyye, dakaddasene pappalda lakki a Muuse irrootase a Siina qaraayye taapotase kara' xaaye maliiyyi we takkan nefo taapotose kara in caan.

Akka ulfeena Waaqa akkaade

¹¹ Qeesewwasene ka tika qulqulloota kara sooken; qeesewwosen eeyye ca kadi punu akka kitamenen in koddinin nefooyye, piisa xawwi isi reexxe.

¹² Lawaata sammarritto isho a meeha kirpa' dawnitto opa Asaafi ka Hemaani isho Yidutaani ka hellaasso isho daltayaasso piisa ollinni mehadda xaynaata a qora talpa oppa kodame kalsaden ka porase a kalisootatiiyyi qinda piirtotatin qa'aden ka sokojkoja kekkehinni ka pekena ka kehayta dawni; qeesewwa a kaasa dawna dippa ka kunda lakki ka ishootta' hawsinni.

¹³ A kaasa dawna isho a sammarra ka takka koden ka nessa takkan Waaqaaysho kalataysaden ka saarshen. Ka kaasa dawen ka sokojkoja isho meeha a kirpa a pilaatin nessaaysho kuttishen ka Waaqa kalataysanni ka dawni ka kiini, “Isha xoonampayta, jaalalaadi nefo pirama in qapan.” Sitiiyyi urratta ka tikase a qulqulloota a Waaqa kela immake.

¹⁴ Qoota ulfeena Waaqa tikase a qulqulloota a Waaqa kela immake malla, urrattose qaran xaate'e, qeesewwa ka kodaaysho koda in ettaninnin.