Mataafa Otoowwa a lammatta 4 - Mataafa Qulqulloota

Meeha a tika Waaqa kela kodaan kodammo

¹ Selemooni ka porase a kalisoota a sipla poora a derumaadi dikla kunda lakki, paldumaadi ka dikla kunda lakki ka moontandela dikla kudan kayno kodacciise.

² Ka sipla liilshen oppaayye mirka kutta a xoorraawe' kode; derumaadi, kamaaredesa kamaaropa dikla kudan, paldumaadi kan dikla ken, tiitawwaataadi ka dikla kunda sessa kaye.

³ Kaamaara a afa kelandesa tiitawwaata a mirkoose kutta qudaayye dikla takka mina'e pahana a xorma kudan kudani ca; xormadosen nefo mirkose kutta quda'e jirfa lakki'i sipla liilsame oppa kodamen.

⁴ Mirkose kutta nefo tulta xorma kudanka lakki qara'e kutiishen. Ishootta oppaayye xorma sessa qinda qutatta opa tooyanni, sessa qinda dumaata opa tooyanin, sessa qinda tupatta opa tooyanni, sessaaw qinda piirtota opa tooyanni. Mirkose kutta nefo tultaaysho qara'e xaayame. Fuulaaysho piisa mirkose kuttaayye lakopaaw tooyanni.

⁵ Korduma a mirkoose kuttati laabbota takka kayni; kamaaraadi ka akka siineta' mina'e, minaxata qeppe ka pisa kaashshina' paha. Mirkoose kutta nefo pisha kura a paadoosi kuma sessa oppa kayni.

⁶ Ka akkimose mina'ew mirkada oppa' pisha jaqadane kudan kodacciise ka ken qinda tupattatin xaaye ka ken qinda qutattatin xaaye. Mirkadoosen kara'e, wa kalisoota kupannitto' dehanna'e jaqammi. Mirka kutta xoori qeesewwa kara' jaqanni.

⁷ Selemooni ka taanteta a koda a ishi daasamte mina'e, wa ipsa qara' xaaynaane kudan warqeetoppa kodacciise ka tika qulqulloota kela'e, ken qinda tupattatin xaaye ka ken qinda qutattatin xaaye.

⁸ Ka tarabbeesa kudan kodacciisew ka tika qulqulloota kela'e, ken qinda tupattatin xaaye ka ken qinda qutattatin xaaye ka qorewwa a warqeeta' dippa takka kodacciiseew.

⁹ Ka paapaha qeesewwa' kodacciise ka paapaha kutta kodacciiseew ka asseew xarrada a paapahaddoseniti kodacciise ka sipla pooran quda uwwishe.

¹⁰ Ka mirkase kutta tika qulqullootati qinda tupattatin qinda piirtota opa qeppeelliteeyye qinda akkittatin xaaye.

¹¹ Huraami ka tistewwa ka wa apittan hooddinaane isho qorewwa kode. Ka meeha tika qulqulloota kara kodaan kodammo nuqusase Selemooni' kode ka dikkishe. Mehaddoosen a kode nefo:

¹² tuuda lakki ka tuuddosen qaraayye kuuta pahana saahinna qapo lakki ka pahana saahinnoosen lakki tuudda qara ca sira'e, nyupura sipla tiitawwaata lakki lakki

¹³ ka nyupuroosen a sipla tiitawwaata lakki lakki kodde ka tuudda qara ca sira'e matta tiitawwaata' mina'e, pahana dalta roomaani tiitawwaata lakki lakki kode; tiitawwaase a nyupura sipla a lakki lakki olloppa'e, dalta roomaani dippa afuri.

¹⁴ Ka mirka kudan a kela kanaannawwa qapo a kara pisha jaqannaane;

¹⁵ ka mirkase kutta isho pahana xorma kudanka lakki a kelaayye ca;

¹⁶ ka tistewwa ka paallawwa apitta ka qaptowwa isho meeha a asse pappaho kode. Mehaddoosen a Huraami akka koda tika qulqulloota a Waaqa qara nakayo'e Selemooni kode piisa, sipla poora a quda shohame oppaaw kode.

¹⁷ Nuqusase Selemooni mehaddoosen piisa koda'e, naaba Yurtaanoositiiyyi otanta Suukooti isho a Sertaanitiiyyi pora oppa piita okta' kitto a kara siplalla liilinnaan oppa'e kodacciise.

¹⁸ Selemooni mehaddosen a kodacciise qoota akata koopen malla, hiila sipla poora a mehaddoosen oppa kodamene in upnaysamme.

¹⁹ Akkimoose mina'ew Selemooni ka mehadda tika qulqulloota a Waaqa kela kodaan kodan kodacciise. Ishootta nefo: pora a kalisoota a warqeeta ka tarabbeesa a qara' laaqqota kalisoota' xaaynaan

²⁰ ka taanteta ishi' daasamte mina'e, wa a qara ipsa la'annaane a warqeeta palite oppa koden ka qulqullitteeta qulqullowwa tura xaaynaan ka kurraasewwaadi ollinni.

²¹ Sira pahana a pisa qapa a warqeetoppa kodene ka kurraasewwa isho wa a qara apitta libbinnaane,

²² ka wa ipsaan libbinnaane ka qorewwa a paatan fiinaane ka jilfada isho wa a kara tankarta qayyannaane ka akkimoose' mina'ew, dufanadda a xarra tika ishshaarritta a kaata qulqullitteeta qulqullowwa isho a tika qulqulloota, warqeeta a palite oppa kodamen.