Mataafa Otoowwa a lammatta 3 - Mataafa Qulqulloota

¹ Selemooni ka Yursaalami kara'e, irrootase a Mooriya a qara Waaqa aappaaysho Taawwiti tura akkaade qara'e, tikase a qulqulloota a Waaqa qupa paayye. Porose nefo awtasene a Orna a Iyyapuusitta isasene a Taawwiti turan reexe.

² Ka tikoose nefo a nuqusume para afrattatiiyyi leya lammatta oppa kuyyaata lammattati qupa paayye.

³ Selemooni tika qulqulloota a Waaqa qupa'e kiritta a kate, ekkaysuma a xattatinni, derumaadi dikla kunda lehi ka paldumaadi dikla kunda lakki.

⁴ Silayta a xarra tika qulqulloota tura co akkima palduma tika' mina'e, derumtaadi dikla kunda lakki ka moontandela dikla kunda lakki; isha ka tika karanne warqeeta a paliten quda uwwishe.

⁵ Ka kaatasene kutta a tika qulqulloota loshsha pirpiritan sumpe ka warqeeta paliten quda uwwishe ka pahana qoyqoyta ka a sansalaata' quda' kode.

⁶ Ka tikase a qulqulloota daka heraan kokkokan quda sire; warqeese a ishin uwwishe nefo piita Fariwaaymiti deete.

⁷ Qapaya a qaala tika' haana ka qora a xarra ka qussa tika qulqulloota isho dufanadda xarra tura warqeetanne uwwishe ka qussada quda'e, pahana kirupeeli' poje.

⁸ Ka tikase kela'e, kaata qulqullitteeta qulqullowwa' kode; moontandela derumaadi deruma a tika mina'ew dikla kunda lakki, paldumaadi nefo dikla kunda lakki ka kaatosen karanne, warqeeta a palite mekliteeta dippa lehi kaynitton kara uwwishe.

⁹ Ulsuma mismaarraadi a warqeeta nefo sheqileeta kunda keni kayni ka kaatadda a qaran ca nefo warqeetan uwwishe.

¹⁰ Selemooni ka kaatasene a qulqullitteeta qulqullowwa' kara'e, pahanadda a kirupeelewwa lakki kodacciise ka warqeetan quda uwwishe.

¹¹ Xoolla kirupeelewwosen lakki derumaasso nefo olloppa'e, dikla kunda lakki. Deruma xoola kirupeeleta a takkati dikla keni ka paka takkan qussa quda kayni; derumta xoola a paka takkati kan dikla keni ka xoola kirupeeleta a lammatta quda kayni.

¹² Deruma xoola kirupeeleta a lammatta kan dikla keni ka paka takkan qussa quda kayni; derumta xoola paka takkati kan dikla keni ka xoola kirupeeleta a paayyota quda kayniiw.

¹³ Xoolla kirupeelewwosen lakki a olkela paname dikla kunda lakki ka loqqaassotin qaqqa'aden ka fuulaaysho qinda kaata kutta a tika qulqulloota opa oorshen.

¹⁴ Selemooni ka rufta moonta pahato ka a awla ka a tiima isho xaynaata a qora talpa oppa kodamte oppaayye kaarranta dawe ka qara'e pahana kirupeeleta' xaashe.

¹⁵ Selemooni ka tikase a qulqulloota tuudda lakki a derumaasso dikla kunda sessa keni keni kaynaan ka tuuddosen qara'e, kuutadda a derumaasso moontandela dikla keni keni kayna' kode.

¹⁶ Ka nyupura sipla' kode ka kuutadda a qapayasene lakki minan kakkaye ka pahana a dalta roomaani dippa kode ka nyupurasene a sipla quda xata rarraa'ishe.

¹⁷ Ka tuuddasene' qeede ka takka qinda tupatta ka takka qinda qutattatin tikase a qulqulloota tura' qaqqaatishe ka tuuda a qinda tupattatin co maxxa kode ka kide, “Yakiini” Ka a qinda qutattatin cooti maxxa kodeew ka kide, “Po'esi.”