Mataafa Otoowwa a lammatta 21 - Mataafa Qulqulloota

¹ Iyyoosaafiti ka to'e; ka turkasene a aappadaassoti katama Taawwiti kara ca oppa mookame; innaadi Iyyoraami ka pakkaadi oppa nuqusume.

² Hella opa Iyyoraami a diira a Iyyoosafiti xaaye, Asariyaasi ka Yihi'eeli ka Sakkaariyaasi ka Asaariya ka Mika'eeli isho shefaatiya kidammi; sene piisa hellaa a Iyyoosafiti a nuqusa Isira'eeli.

³ Aappaaysho ka ishootta sipla dakara ka warqeeta ka meeha a heraan kokkoka kuttayta isho katamadda a Yihuta a kawwattan kapa qorrame ishootta daashe. Ma xoori Iyyoraami qootan innaadi a kuuta kodde malla, mankisteeta ishi'i daashe.

Iyyoraami nuqusa Yihuta

⁴ Iyyoraami ete mankisteetase a aappaayshoti qapade ka kokkonnaysadeeyye, saarra Isira'eeli lamaya isho hellaasso piisa koraatetan leyshe.

⁵ Iyyoraami a nuqusumooyye paraadi kunda sessa lakki; ka Yursaalami kuti'e ka para sette mukshe.

⁶ Isha qoota enenta Aki'aapi heme malla, akka sanynyeeta Aki'aapi mina'ewwe saantase neeqa a nuqussa Isira'eeli oppan aane; ka fuula Waaqa tura wa neeqa kode.

⁷ A koddito ma kodayteetase a Waaqa Taawwiti olli kodade malla, Waaqa sanynyeeta Taawwiti qitissa in faane; ipsa haka paraparati libbini in kinnini'i Taawwiti isho sanynyeetaadi opassa'e kippeeta daahseey.

⁸ Sapana Iyyoraamiyyi, Etoomi Yihuta qara'e xaate ka mankisteetaadi qaatisatte.

⁹ Iyyooraami ka saarraadi a xelaadi oranna isho sarakellaadi piisa qeede ka eyyepa tuule; Etoometa ka isha isho ajajampaya a sarakellaadi piisa kapa murte. Isha xoori halkeetteeyye xa'e ka isasene isha kapa mure oppan mitte ka qahe.

¹⁰ Etoometa ka haka awweti'i Yihutaata falqa qudaaw kitta. Iyyoraami qoota Waaqase a aappadaassoti alle diishe malla, Lipina ka sitiiyyiw isha qara tiyya' xaateew.

¹¹ Sedemaliiyyiiw Iyyooraami kunkunnawwa a Yihuta qara'e porra a sakatatta kode ka samayta Yursaalami piisa akka aano ka eeyye killoota sakatado kode; ka seden Yihutaata saanta Waaqa qara maqqishe.

¹² Taptaappeta ka xuumampaytase Eeliyaasi kapa Iyyoraami deete ka kiini, “Waaqa aappaayshina a Taawwiti ike kiini, ‘Atti saanta aappaayshina a Iyyoosaafiti taaki a Aasa a nuqusa Yihuta oppanne a anne;

¹³ ma xoori saanta a nuqussa a Isira'eeli opanne ante ka akkima sanynyeeta Aki'aapi akka Isira'eeleta piisa killanna sakatatto koote mina'e; atti nefo asseewwe akka samayta Yihuta isho a Yursaalami killanna sakatado koote; ka hellaassin a ollin dalatene a qalpeetan ke kapa aaka isho sanynyeeta aappaayshina lesse ka pirte.

¹⁴ Semmalla Waaqa samaytaayti ka iskattaayti ka hellaatti isho wa a qapta piisa erkannaata kokkokatin pira.

¹⁵ Atti nefo haka marqinaatti ke kara lakopa sooknaane'e paaqa marqina a kuyyaata mina qaropadesaaw ke deenon paaqta.’”

¹⁶ Waaqa ka Filisteemeta isho Arapaata a Toobbiya kapa kalto akka Iyyooraami qara xaato kode.

¹⁷ Ikka Yihuta qara xaate ka torpite ka meeha a tika mankisteeta kara co piisa ka hellaadi a diira isho iskattaadi piisa poojte; umma innaadi a kamma oorshe Akasiyaasi mali hellaadi oppa nama takka nefo in hasne.

¹⁸ Sede piisa kammaayye, Waaqa ka paaqa marqina a dina in qapnin Iyyoraami qara qeede.

¹⁹ Ikka surumse oppa jare ka para lammattati piraampira qaraayye marqina ka kara sooken ikka surumta kokkokatin to'e; umma samayta akkima nuqussa isha turan kallaade ulfeessaa'e apitta opanno mina'e isha in opanne.

²⁰ Iyyoraami a nuqusumooyye paraadi kunda sessa lakki; ikka Yursaalami kuti'e ka para sette mukshe. Ete to'e xoori opa isha in nyarrahane. Umma katama Taawwiti kara'e, hawlaame diisheey turka nuqussa oppa in hawlamme.