Mataafa Otoowwa a lammatta 20 - Mataafa Qulqulloota

Akka Iyyoosafiti Mo'aapeta isho Amoonata pute

¹ Sekkammaayye Mo'aapeta isho Amoonata Me'unaata lamayteeta isquda qeeden ka Iyyoosafiti torpa de'en.

² Orra ka Iyyoosafiti kapopa de'e ka ishi kide, “Piitase a Etoomi pakateeta a sookittatiiyyi afa disiti kittooyye xela kuttayta ke torpa deeni; ka piita Hasesooni tamaari caan; isheetta nefo Enkeeti kidammi.

³ Iyyoosafiti qoota a kuttati fuure malla fiqaataadi kaassatta'e Waaqopa tiitaawe; ka piita Yihuta piisa kara'e, damta musatta salishe.

⁴ Samayta Yihuta piisa ka qaarqaarsa Waaqa kaassatta'e, ollopa sooke; ka katamadda Yihuta piisa oppaayye Waaqa fada de'e.

⁵ Nuqusa Iyyoosafiti ka fuula tika qulqulloota a Waaqa turaayye haarayase a paapaha oppa xora samayta a Yihuta isho a Yursaalami otantoppa qa'ade;

⁶ ka qinsade ka kide, “Oo Waaqa Waaqa, aappadaannoti, atti a Waaqa a moonte kalonne? A mankistewwa samayta piita mukinno ke; hupna ka ettanissa harkaaytippa caan umma nama ke mina desa oorissa ettaninni in co;

⁷ oo Waaqinno, a samaytaayti a Isira'eeli turaayye a samayta piisseti alle daane ka sanynyeeta Apirihaami a moottaaytiti haka paraparati piisse daashe kenne?

⁸ Ishootta ka oppa kallaaden ka tika a maxxaayti kara halaamo ke qupen; ka kidene,

⁹ ‘Oto atti dapa ino qara murto ka oranna ino qara xa'issooyye taaki erkannaata ka loota ino qara qeettooyye, tikase xaayti a maxxaayti kara halaammo tura'en fuulaayti tura qa'anna ka rakkootinno oppaayye keepa ullupanna; atti ka ino dakayta ka inon pahata.’

¹⁰ Tin are tooye, amma Amoonata ka Mo'aapeta isho samayta a irroota Seyri i'ino ade; ma xoori aappadaanno a xatta a Kipsi kara sookeneeyye, akka Isira'eeleta piitaaysho torpito'e isheetta a faqqanne; ikka alle qara tiitaawen umma ishootta in pirre.

¹¹ Sekapa'e tin laadi piitase a atti lehanda ino daasse oppaayye alle ino daaneta'e ka ino sookissa'e de'en.

¹² Oo Waaqinno! Ino xeloose asse kutta ino torpa deeno minadesa oorissa hupna an qapno umma waan koona an upnooy, hela atti ishootta qara dapa a murto? Ildaanno kepeela tooyanni.”

¹³ Samayta Yihuta piisa ka iskattaaysho ka hellaasso isho nyoqqawwaasso ollinni, fuula Waaqa tura qa'aden.

¹⁴ Sitiiyyi hapura Waaqa ka sanynyeeta Asaafi oppaayye Yahasi'eeli innasene a Sakkaariyaasi a xoroppeela qa'ade qara lekkade. Sakkaariyaasi nefo inna Pannaaya; Pannaaya kan inna Mataaniya, Mataaniya kan inna Yi'eeli a Lewitta.

¹⁵ Yahasi'eeli ka kide, “Nuquso Iyyoosafiti, ka ishina samayta Yihuta isho a Yursaalami kara kala piisantiiyyi, dakkaysada! Waaqa i'ishina kiini, ‘Oranose xayyo a Waaqa diisheey xaayshinanneey, xeloose asse kutta turaayye in fuuran ka in tammaqan!

¹⁶ Parriiyyi ishootta torpa'e opaxata lekkada; ishootta tuullaysuma Siisitiini opeela fayyadan; ishina ka koommayta Yiru'eeli oppaayye piraampira naaba qara'e, ishootta akkitan.

¹⁷ Yihutaata isho Yursaalameteeyyi, a orannoosen torpa ishinanneey, aana ka porraassin qaqqapada ka kokkonaada ka qa'ada; ka putayma Waaqa ishina daanna tooya! In fuuran umma in tammaqan ma parri seeyye ishootta turopa sooka! Waaqa ishin olli caadaay!’”

¹⁸ Sekkammaayye Iyyoosafiti piitopa pi'e ka fuula piitan kaye; samayta Yihuta isho a Yursaalami piisa ka piitopa seehe ka fuula piita kaye ka Waaqa sakatade.

¹⁹ Sanynyeeta Qe'aati isho a Qore oppaayye Lawaata lamayteeta iqa'atte ka nessa kuttan Waaqa Poqalla Isira'eeli kalataysatte.

²⁰ Ka oori parraytaadiiyyi paraappan xa'en ka koommayta Teqo'a opa aanen; ete pora xa'eneeyye, Iyyoosafiti iqa'ade ka ishootta kide, “Samayta a Yihuta isho a Yursaalamitiiyyi, ana dakkaysada! Waaqa Poqallaassin amana! Ikkokkonnaattaneey, ka wa xuumampayaadi kidene dukaysada; i'ishina olkela teytaay!”

²¹ Ka ete samayta olli oorsade kammaayye, sammaarewwa xela turadesa aana ka Waaqa sammara ka qoota qulqulluma ulfeenaaditi desa saarsha ka kida'e, “Waaqa kalataysada, jaalalaadi haka paraparati'i kallaanniiy” kite.

²² Ete dawatta ka saarissa paayyeneeyye, Waaqa ka Amooneta ka Mo'aapeta isho orra irroota Se'iri isasene Yihuta torpa de'e qara'e xela oranna a dekandekatti asade xaashe; ikka putamen.

²³ Xela Amooneta isho a Mo'aapeta ka xela a irroota se'iri pireeta ka patissa xa'e; ka ete xela a irroota Se'iri piren kammaayye, ishootta oli pireneew.

²⁴ Xela Yihuta ete porase a iskelopa koommayta akkinno kayeneeyye ka xelase leka tooynaaneeyye, piitaaw pukkaan immakaade; umma nama takka nefo kela in pahane.

²⁵ Iyyoosaafiti isho xelaadi ka poojeta pootatta aanen; ka pukkadasene oppaayye meeha oranna ka a kalssaannaan a akata kutta isho meeha heraan kokkoka a ishootta haada in ettaninnini poojen; qoota poojeta akata ollin koopte malla, ollopa poha patta'e, kuyyaata sessa ishootta qara qeette.

²⁶ Ka kuyaata afrattatiiyyi naabase a saka isase a turan kara Waaqa kalataysaden karopa xoren; naabose ka haka awweti seminan “Naaba saka.” kidammi,

²⁷ qoota Waaqa nyaapaaysho qara ishootta xasayshe malla, samayta a Yihuta isho a Yursaalami piisa Iyyoosafiti kamma'e qate ka xasa kuttan Yursaalamipa tiitaawe.

²⁸ Ka ete Yursaalami kayeneeyye, pekena ka kehayta isho kaasa dawetaanne tika qulqulloota a Waaqa opa aanen.

²⁹ Akkima Waaqa Isira'eeli turaayye nyaapaaysho torpe, mankistewwa a dakaye piisa karopa Waaqa fuureta ka kalte.

³⁰ Qoota Waaqaadi qinda piisaayye desa Iyyoosafiti nessishe malla, mankisteetaadi ka nakayta akkatte.

Xelta Iyyoosafiti akkima dikkatte

³¹ Iyyoosafiti ka Yihuta qara nuqusume; a nuqusumooyye paraadi kunda sessa keni; ikka Yursaalami kuti'e ka para kunda lakki keni mukshe. Aayyaasso Asuupa kidammi; isheetta enenta Shiilihi.

³² Iyyoosafiti saanta aappaaysho a Asa oppanne aane umma qaraayye in maqqine; ka fuula Waaqa tura wa paxaara kode.

³³ Ma xoori ikki'i porrasene a sakatatta kunkunnawwa qara ca piisa in panne; umma samayta karittaadi Waaqa aappadaassoti qara'e ata in xaayanne.

³⁴ Xelta nuqusase a Iyyoosafitiiyyi, paayyote paayyatte haka piraampiraati'i, wa a ata hase mataaffa a torra a nuqussa Isira'eeli, a Iyyu inna Hanaani taafe qara'e taafamen.

³⁵ Sekkammaayye Iyyoosafiti ka Akasiyaasi nuqusase a Isira'eeli isase a kodaadi akata neeqi olli ulata a olli kaleeta kodade.

³⁶ Ka markapadda a nakata kodatta piisaden; ka markapaddoosin Esiyoon- kapiiri kara kodaden.

³⁷ Eli'eseri inna Totaawwa Mareshittase ka Iyyoosafiti qara xuuma haasawade ka kide, “Qoota Akasiyaasi olli ulata kodatte malla, Waaqa alle'e kodaayti nyapalsha.” Markapaddasene piisa ka qeqqepen ka nakata aaneeta malaalen.