Mataafa Otoowwa a lammatta 2 - Mataafa Qulqulloota

Harmisatta tikase a qulqulloota qupa' kodame

¹ Selemooni ka akka ulfeena maxxa Waaqati'i tika qulqulloota qupan ka isha nefo'e tika mankisteeta qupane ajaje.

² Ka orra paata haado nama kuma kunda tappa ka a kunkunnawwa qara daka faato nama kuma kunda sette isho a kodoose kodacciisa nama kuma sessa ka dippa lehi koda qaropa erke.

³ Ka Kiraami nuqusa Tiroositi erkana erke ka kide, “Xatta xelta a aappinno Taawwiti tika mankisteeta a kara' kallaado qupannooyye, akkima ishi qora a talta erkite mina'e, asseew ana' erkeew.

⁴ Anti amma akkan ulfeena maxxa Waaqa Poqallaayyoti tika qulqulloota qupo in dikanni. Tikase nefo akka kela tankarta alaawnitto fuulaadi tura' qayyayshan ka laaqqota xawwi reexxamte kuyyaata piisa isha tura' dehayshan ka akkimoose mina'ew kalakala ka teykanteeyye ka sampatadda isho xa'atimadda leya qaraayye ka xayso nessumadda a Waaqa Poqallaanno a upnaysame piisa oppaayye akka kela kalisoota kupannitto ishi' dehayshane'e ishi eeppisan qapa. Ini ka samayta Isira'eeliti'i taanteta a parapara' koddita.

⁵ Waaqinno qoota Waaqadda pila' piisa qara qapo malla, tika an ishi qupno nefo a kutta'e koddita.

⁶ Ma xoori moonta isho moontada a moonta qaropeela ca isha kayni in caaneey, ayno ishi tika qulqulloota qupa ettansha? Anti tika oppa isha tura tankarta qayyannaanen qupa diisheey, anti an ayno ka Waaqa tika qulqulloota qupa ettansha?

⁷ Semmalla atti harmitta a warqeeta ka a dakara pirreeta ka a sipla ka a sipla poora tuma ka pojeeta saho ka a rufta awla ka a tiima isho a moonta pahato dawa saho ka sira ika lekayta koda saho takka ana' erke. Ishakka harmootase' xayyo a aappinno Taawwiti harmishe olliiyyi Yihuta isho Yursaalami karaayye koda kodo takka ana' erke.

⁸ Akkima orraayti qora quura saho in upaay, Lipaanoosiiyyi qoyra talta ka a pirpirta isho a sendeleeta ana' erke; orriyyo nefo orraayti olli koda koda.

⁹ Tika qulqulloota an qupno qoota a kutta ka orra qawwannitto koddeeta isheeta parpaaccisnitto malla, qora kutta'e ana' qobbeessaneey.

¹⁰ Kalaata orrose xaayti qora quurrooti'i, daamma kappa kura qorosi kuma kunda lakki ka daamma poorta kura qoroosi kuma kunda lakki ka taadeta awayneeta kura padoosi kuma kunda lakki isho sayteeta kura padoosi kuma kunda lakkin ke erka.”

¹¹ Kiraami nuqusa Tiroosi ka nuqusase Selemooni'i taptaappetan nessa erke ka kide, “Qoota Waaqa samaytaadi jaalanno malla, ishootta qara ke nuqusumshe.”

¹² Ka kammaddesa kideewwe, “Waaqa Poqalla Isira'eeli isase piita ka moonta uume ka nuqusase Taawwiti'i ookaya inna a paata qapatta ka haasa mitteeta saha ka a Waaqa tika qulqulloota qupa ka issi tika mankisteeta qupa' daashe, a eeppisamo!

¹³ Anti nefo Huurami'api harmitta a upna kutta' qapon ke' erkini;

¹⁴ aayyaasso Taanitteeta, aappaaysho nefo Tiroositta; isha nama warqeeta ka sipla dakara ka sipla isho sipla poora tuma kollade ka daka ka qora laaja saha ka akkimoose mina'ew rufta awla ka a moonta pahato ka a tiima isho xaynaata a qora talpa oppa kodamte kuli dawa saha. Isha harmitta sira ika lekaya koda saho ka akeeka ishi' daasame nefo kodaan akkinno. Isha harmootaayti isho harmoota a aappaayshina a poqallaayyo a Taawwiti olliiyyi koda koda.

¹⁵ Semmalla atti poqallaayyo, kippeetase a' daasse qara'e kalaata a kappa ka a poorta ka sayteeta ekerta isho a taadeta wayneeta kodampayaseneti erke.

¹⁶ Ino nefoow, qora a' heenta piisan irrowwa Lipaanoosi qara ke' quurra ka ollopa hiina ka pakateeta qara dakkina ka kunpaappe Iyyobepa ke lekkinna; atti ka Yursaalamipa haadattaay.”

Qupeeta tika qulqulloota akka paayyatte

¹⁷ Selemooni ka akkima turan aappaaysho Taawwiti' kode mina'e, xaykitta a Isira'eeli kara kalo piisa ollopa dike; ikka kuma dippa kunda keni sessa ka dippa lehi kayen.

¹⁸ Ka ishootta oppaayye nama kuma kunda tappa haadampaya' kode ka nama kuma kunda sette a irrowwa qara daka faannaati kode ka akka ishootta qara tooyan ka kodacciisane'e, nama kuma sessa ka dippa lehi kite.