Mataafa Otoowwa a lammatta 19 - Mataafa Qulqulloota

Akkampaytase Iyyu akka Iyyoosafiti fukke

¹ Iyyoosafiti nuqusa a Yihuta ete tikase xaadi a mankisteeta Yursaalami kara kitto opa nakaytan kaleeyye,

² akkampaytase Iyyu inna Hanaani isha turopa aane ka ishi kide, “Hela atti ukkuttowwa qaarqaarayti ka isasene Waaqa needdanna jaalattaayti ipaxaari? Semmalla miira Waaqa'e ke qara de'a.

³ A koddito ma qoota olaahiyya killootase asheeraati kodame alle piitoppa patisse ka Waaqa fadeeta'e, karittaayti harmisatte malla, paxaarumta ke kapa teyade.”

Iyyoosafiti akka taanynyada shuume

⁴ Iyyoosafiti ka Yursaalami kara kuti'e ka Persaapehi paayyatte haka piitase a Efreemi a kunkunnawwa oppa o''oore ka aane ka samaytoppopa kulle ka Waaqa aappadaassoti opa ishootta tiitayshe.

⁵ Ka piitase karaayye katamadda a kawwattan kapa qorrame a Yihuta piisa kara'e, taanynyada shuume.

⁶ Ka ishootta kide, “Ishina oto farannittaneeyye, qoota nama in koddinin ka Waaqase awta firteeta daannittan piisaayye ishin olli co xasassa ishin parpaaccisnitto malla, a kuttati tooytada.

⁷ Amma nefo, Waaqa fuureta a ishin kara caatto; firteeta qindandesa quu'eta ka qatayma kodeeta isho noodota teyyatta qoota Waaqa Poqallaanno kapa in kinnin malla, isi tooytaattaan farata.”

⁸ Nuqusase Iyyoosafiti Yursaalami karaayye oto seera Waaqa qepooyye taaki samaytoppaayye shiishsha xaana deexa'e Lawaata ka qeesewwa isho toolla Isira'eeli oppaayye mattiyya lamaya shuume. Ishootta ka Yursaalami kara kallaanni.

⁹ Ka ishootta ajaje ka kide, “Waaqa fuuretan ka amanuma isho karittaayshin piisanne, isha koda koda;

¹⁰ hellaasene xaayshin katamaddaappa kala kapaayye, qoota diika tuqeeta taaki a seera ka a ajajadda ka a tanpeeta isho a taantewwaati desa oto deexa qapadan ka ishin kapopa de'aneeyye, akka Waaqa ishin a dapnini'i, ishin isho ishootta qara'e miira Waaqa ka in kaynini'i turanneew ishootta lela. Oton asse kootaneeyye, ishin dapampaya a kodditan.

¹¹ Wa Waaqa mina tooyna piisa qaraayye Amaariya saarase a qeesewwa taanynyassina kodda. Wa nuqusa mina tooynaatinniiw Sepaatiyya inna Isma'eeli isase mukissampayta a Yihuta kodde taanynyassina koddaaw. Lawaata ka saarrassin koddita ka ishina koda koota; kokkonsada ka koda koda! Waaqa ka a wa paxaara koona olli caado!”