Mataafa Otoowwa a lammatta 18 - Mataafa Qulqulloota

Xuuma Mikiyaasi Aki'aapi qara haasaawade

¹ Iyyoosafiti nuqusa Yihuta ete teyanta a kutta isho ulfeena akkadeeyye, hemittanne Aki'aapi olli daltaytume.

² Ka parra lamaya kammaayye, Aki'aapi kaassatta'e, Semaariyaapa aane. Aki'aapi ka isha isho orra isha olli co'e, kahirra isho xormada lekaya qale; ka sekkammaayye akka aano ka Raamooti a keleaadi torpoe akka isha oowsado kode.

³ Aki'aapi nuqusase a Isira'eeli ka Iyyoosafiti nuqusa Yihuta kaassade ka kide, “Hela Raamooti a keleaadi torpa'e, i'ana olli tuulta?” Iyyoosafiti ka ishi kide, “Ana isho ke an takkaneey, orriyyo kan orraaayti minaay, orannoosen oppa ino ishin qudaawwen caanna.”

⁴ Ma xoori, Iyyoosafiti inuqusa Isira'eeliti kide, “Paayyota nessa Waaqa kaassado.”

⁵ Nuqusase a Isira'eeli ka xuumampaya dippa afur ollopa hale ka ishootta kaassade ka kide, “Hela Raamooti a kele'aadi torpa'e in tuulam moon an tuulo?” Ishootta ka isha oorshen ka kidene, “Waaqa harkaaytippa'e isheetta daashaay, tuule.”

⁶ Iyyoosafiti xoori i'ishi' kide, “Xuumampayta Waaqa an kaassanno a pila are in co?”

⁷ Nuqusa Isira'eeli ka Iyyoosafiti' kide, “Amma nefo nama an qudan nessa Waaqa kaassanno takka ca ma, qootiyyo desa qoota wa neeqa diisheey a paxaara haasawanni in kinnin malla, in isha needda; isha nefo Mikkiyaasi inna Yimla. Iyyoosafiti ka isha' kide, “Nuqusa asse kideeta isha parpaaccisni in kitto!”

⁸ Nuqusase a Isira'eeli ka saarraadi oppa takka hale ka ishi' kide, “Aane ka Mikkiyaasi inna Yimla jarjartan hale.”

⁹ Sitiiyyi nuqusa Isira'eeli isho Iyyoosafiti nuqusa Yihuta mehaddaasso a nuqussa'e kalsaden ka awtaasene xarra Samaariya tura ca oppa'e, sufaanewwaasso qara' qaa'en; xuumampayasene piisa ka ishootta tura' xuuma haasawanni.

¹⁰ Sitiiyyi Seteqiyaasi inna Kenaa'inna ka kaassa sipla kode ka kide, “Waaqa ikiini, ‘Haka Sooriyaata pirammitto'e, senenne ishootta tottoomta.’”

¹¹ Xuumampaya a taakane piisa ka xuuma oli pahoow haasawanni ka kiini, “Nuquso! Waaqa harkaaytippa'e Raamooti a keleaadi kataay, aane torpe ka pute.”

¹² Erkamampaytase Mikiyaasi hala aane ka Mikiyaasi' kide, “Tin, xuumampaya a taakane piisa afaa takkane kodaden ka akka nuqusa puto xuuma haasawniiy, afaatti xaaysho kamma in dapnin ka wa nuqusa xasanna'ew haasawado!”

¹³ Mikiyaasi xoori ikide, “Maxxa Waaqatinnin xaxanni, anti wa Waaqiyyo ana' kide pattan haasawada.”

¹⁴ Ete eeyye kayeeyye, nuqusa ka Mikiyaasi kaassade ka kide, “Mikkiyaasi; hela Raamooti a kele'aadipa in tuulam mon alle'en diisha?” Isha ka oorshe ka ishi' kide, “Ishootta harkaayti oppa'e daasameneey, aana ka puta!”

¹⁵ Nuqusa ka ishi' kide, “Akka' maxxa Waaqatin dukaata ana' haasawatto ka wa pila ana a' haasawannini'i, meeqaannen ke xaxacciisa?”

¹⁶ Sekkammaayye Mikiyaasi ka ishi kide, “A Isira'eeleta akkima kahirra sikmaya dape mina irrowwa qara pasten akke; Waaqa ka kide, ‘Sene orra saarra in qapnini'iy, a pisanti tikkaasso opa nakaytan kalen.’”

¹⁷ Nuqusa Isira'eeli ka Iyyoosafiti kide, “Ke an kiine, qootiyyo desa xuuma neeqa diisheey a paxaara haasawanni in co?”

¹⁸ Kammadesa Mikiyaasi ka kide, “Semmalla orri, nessa Waaqa dakkaysado! a Waaqa sufaanaadi qara kuti'e, xela moonta piisa ka akkitta isho pittittan isha kapa qa'aden akke;

¹⁹ Waaqa ka kide, ‘Aki'aapi nuqusa Isira'eeli akka Raamooti a keleaadi torpeeta tuulo ka eeyye to'o'e, ayno isha sassapada?’ Takka ka we takkan kide, a pila ka wa pila kide.

²⁰ Piraampira qaraayye, hapura takka ka sooke ka fuula Waaqa tura qa'ade ka ishi kide, ‘Ana isha sassapada.’ Waaqa ka isha kaassade ka kide, ‘Atta sassapatta?’

²¹ Isha ka kide, ‘In aana ka afa xuumampayaadi piisa oppa'e, hapura darada kodda.’ Waaqa ka ishi kide, ‘Asseeyye aane ka isha sassapado, i'olkela ke teytaay!’

²² Semmalla tin Waaqa afa xuumampayoosen xaayti oppa'e hapura darada xaaye; ha Waaqa pateetta ke qara ajaje.”

²³ Sekkammaayye Seteqiyaasi inna Kenaa'inna ka Mikiyaasi kapopa heeqqe ka kandishe ka ishi kide, “Hapuroose a Waaqa ayshoppanne ana kapan tarpe ka asse ke haasawade?”

²⁴ Mikiyaasi ka ishi kide, “Kuyyaata ishi kaata karopa dekatta kullinittooyye, awse upnaatta.”

²⁵ Sekkammaayye nuqusa Isira'eeli ka ajaje ka kide, “Mikiyaasi qeeda ka Amooni mukissampaytase a katama isho Iyyo'aasi innasene a nuqusa kapopan kala.

²⁶ Ka ishootta kida, ‘Nuqusa ikiini: namoose tika hida karopa kalsha, ka hakan nakaytan kallo kara'e, laaqqota a kokte isho pisha maliiyyi we takkan nefo ishi in daashan.’”

²⁷ Mikiyaasi ka kide, “Oton asu ke nakaytan kalaayye, Waaqa ana oppanne in haasawanne.” Ka kamma kide, “Ishina samayteeyye, leloose xayyo matte qapnaada!”

Akka Aki'aapi raamooti a keleaadi kara to'e

²⁸ Sekkammaayye nuqusa Isira'eeli Aki'aapi isho Iyyoosafiti nuqusa a Yihuta ka Raamooti a keleaadi opa tuulen.

²⁹ Nuqusa Isira'eeli ka Iyyoosafiti kide, “Anti nama pila pahanatta'en mehaddaayyo pursadaay, atti xoori mehaddaatti a nuqusa kalsaado.” Nuqusa Isira'eeli ka oori nama pila pahanaatta'e mehaddaadi pursade ka orannaseneti tuule.

³⁰ Sitiiyyi nuqusa a Sooriya saarrasene xaadi a sarakella'e ajaje ka kide, “A shakkado taaki a kuttado nama takka nefo oli in torpan ma nuqusa Isira'eeli'iw torpa.”

³¹ Ajajampayasene a sarakella ete Iyyoosafiti akkeneeyye, idikaden ka kidene, “Sede ishan nuqusa Isira'eeli” Ka kapa muren; Iyyoosafiti ka ullupe, Waaqa ka isha qaarqaare; ka isha qaraayye ishootta tiitayshe.

³² Ajajampayasene a sarakella ka akkima isha nuqusa Isira'eeli in koddinnini upnaaden ka alle kamma tiitaawen.

³³ A koddito ma xela a Sooriya oppaayye takka ka paanta tupadesa pokke ka nuqusa Isira'eelitiiyyi qeppeellitta a sipla kessaadi oppan teye. Nuqusa ka namase sarakellaadi qullooti kide, “Inqarameey, orannaappa alle anan sooke.”

³⁴ Orana ka kuyyaase kumma ollin kokkonaade; nuqusa Isira'eeli ka fuula xela Sooriya tura'e, haka kalaakalaawnittooti sarakellaadi kara shene; ka ete letta dumteeyye to'e.