Mataafa Otoowwa a lammatta 17 - Mataafa Qulqulloota

Iyyoosafiti nuqusa Yihuta

¹ Innaadi Iyyoosafiti ka pakka aappaaysho a Aasa oppa' nuqusume ka oranna Isira'eeli tura'e, xelaadi a oranna kokkonnayshe.

² Ka katamadda a Yihuta a kawwattan kapa qorrame piisa kara'e, xela oranna xaaye ka akkimoose mina'ew piita Yihuta isho katamaddasene a Efreemi a aappaaysho xatta qapade oppa'e, waartiya xela oranna' xaayeew.

³ Qoota innuman saantase a oppan aappaaysho Taawwiti aane oppan anne malla, Waaqa Iyyoosafiti olli caade; umma isha killanna a pa'ali in kaassanne.

⁴ Ma xoori saantase neeqa a Isira'eeli kapaayye saanta Waaqa aappaayshoti'i fade ka ajajaddaadi kamma aane.

⁵ Waaqa ka harkaadippa'e, mankisteetaadi kokkonnayshe; samayta Yihuta piisa ka daassatan ishi' de'e. Sede qaran xaate'e ikka ulfeena kutta akkade ka taajura kodde.

⁶ Karittaadi ka saanta Waaqa qara kokkonnaade, ikka Yihuta karaayye porrasene a sakatatta kunkunnawwa qara ca isho olaahiyya killootase asheerati kodame alle' pashshe.

⁷ Iyyoosafiti a nuqusumeeyye para sessattatiiyyi, akka katamadda Yihuta kara kollishane'e saarraadi Penihaayli ka Aptiyu ka Sakkaariyaasi ka Natina'eeli isho Mikkiyaasi erke.

⁸ Ishootta qudaayye Lawaata lamayteeta ka kittaaw; Maxxadaasso nefo Shemaa'iyya ka Netaaniya ka Sepaatiyya ka Asaaheli ka Shemiiramooti ka Yihonataani ka Atooniiya ka Toobbiya isho Topaadooniiya. Ishootta olliiyyiiw qeesewwa Eliishamaa'i isho Yihoraami kidamma'e ca.

⁹ Ishootta ka mataafase a seera Waaqa qapaden ka Yihuta piisa kara' kollissa'e, katamadda a Yihuta piisa oppa a'aanen ka orra kollishen.

Akkima Iyyoosafiti teyanta' koope

¹⁰ Qoota Waaqa mankistewwa a Yihuta kapandesa ca piisa qara' fuura kate malla, ishootta Iyyoosafiti in torpine.

¹¹ Filisteemetoppa orra deemo ka daassawwaan ishi' de'e ka dakara pirreeta kuli ishi kappare. Orra Arapa ka xelloota a kahirra oppa laahadda kuma tappa ka dippa tappa ka qolpaya kuma tappa ka dippa tappaan ishi' de'e.

¹² Iyyoosafiti ka qaropa kokkonnaattaanneew aane ka Yihuta kara'e, katamadda a kara' meeha xaaynaane isho mishshikewwa tikka, a kawwattan dawame' qupe.

¹³ Ka katamadda a Yihuta karaayye meeha oranna isho a kalaata kuttayta qapa; ka xela oranna pare kuttayta Yursaalami kara' xaaye.

¹⁴ Ishootta nefoow akka toollaasso taafamen qara'e: Yihuta kara a saarra shaalaqadda ajajno ka Atina kidammo ka xelaadi a oranna nama kuma dippa sessa;

¹⁵ ishootta kamma'ew ajajampaytase Yehohanaani ka xelaadi a oranna nama kuma dippa lakki ka kunda sette;

¹⁶ sekamma'e isase heennaadin koda Waaqati isi daashe Amaasiya inna Sikiri ka xelaadi a oranna nama kuma dippa lakki;

¹⁷ ka Piniyaameta oppaayye xormase a oranna Eliiyataa'i ka xelaadi a oranna a kontaleeta isho paanta qapade, nama kuma dippa lakki;

¹⁸ ka kamma'ew Yehosapaati ka xelaadi a oranna a harmisade nama kuma dippa kunda sette;

¹⁹ Sene tooy, xelase a oranna a katamadda a Yihuta a kawwattan kapa qorraame kara' xaayame maliiyyi orra a nuqusa kela koda kode.