Mataafa Otoowwa a lammatta 16 - Mataafa Qulqulloota

yihutaata isho Isira'eeleta akka oli torpite

¹ A Aasa nuqusume para kunda sessa lehattatiiyyi, Paa'isha nuqusa Isira'eeli Yihutaata torpe ka akka piita nuqusa Aasa karaayye nama in sooknin taaki in kullinini'i, Raama kapa kawwatta dawe.

² Aasa ka tika meeha a tika qulqulloota a Waaqa isho a mankisteetaadi karaayye sipla dakara isho warqeeta qeede ka Penhataati nuqusase a Sooriya isase Tamaasqo kara' kuti'e ka mukinnooti erke.

³ Ka Penhataati' kide, “Tin daassata sipla dakara isho a warqeeta'en ke erkini; akka xatta aappinno isho aappaayshin olli' kalen mina'e ana isho ke olli kallaaw; atti nefo akka ana qara alle ooro'e, olli kalaytase a Paa'isha nuqusa Isira'eeli olli qapto alle' diishe.”

⁴ Penhataati ka afoosen a nuqusase a Aasa teyyade ka akka katamadda Isira'eeli torpane'e, saarraadi a xela oranna erke. Ishootta ka katamadda a Iyooni ka a Taani ka a Apel-peti-maa'ika kidamma isho katamaddasene meeha kara' xaaynaane a Niftaalemi piisa puten ka qara piren.

⁵ Paa'isha ete sede dakayeeyye, katamasene a Raama kapa'e kawwatta daweeta alle' diishe ka kodase qaatishe.

⁶ Nuqusase Aasa ka samayta Yihuta piisan de'e; ishootta ka Raama karaayye dakaddasene ka qorasene a Paa'isha kodaan koona alle' haaden; Aasa ka katamadda Kepaa'i isho a Misibbaatin qupe.

Xuumampaytase Hanaani

⁷ Sitiiyyi akkampaytase Hanaani ka Aasa nuqusa a Yihuta kapopa de'e ka ishi' kide, “Atti qoota Waaqa kapaayye nuqusa Sooriya kippatte malla, xela nuqusa Sooriya iharkaaytippa alle' qahe.

⁸ Xela Toobbiya isho a Liipiya, xela kokokkoka a sarakelladda isho fartada lekaya qaponne? A koddito ma qoota Waaqa kippatte malla, isha akka atti ishootta putto'e kode.

⁹ Orra karittaaysho piisan isha kippanno kokkonnassa'e ilda Waaqa piita piisa qara akkini. Atti qoota eepuma koote malla arepadesa oranna ke qara in oolan.”

¹⁰ Seminan Aasa ka akkampaytase qara' miiroode ka qoota akata miirode malla tika hida karopa isha kalshe ka sitiiyyi orra takka takka qara' miiddota kutta' kode.

Nuqusuma Aasa akka dikkade

¹¹ Xelta nuqusase a Aasaayye, paayyote paayyatte haka piraampirati'i wa kodde piisa mataaffa torra a nuqussa a Yihuta isho a Isira'eeli qara'e taafamen.

¹² Aasa a nuqusumeeyye para kunda sessa sakalattatiiyyi, paaqa loqqaatinni akata paaqe, kadi punu surumtoose isha qara' jarteeyye, qorsa a harmoota'e fade diisheey, Waaqa qara qaarqaarsa in kaassanne.

¹³ Aasa ka a nuqusumeeyye para kunda afuri takkattaatiiyyi to'e.

¹⁴ Ka Shabbaadi qimaamewwa isho shittoota a harmoota kootetin immaken ka qara isha mukkishen ka katama Taawwiti karaayye hawlase' xaadi a shiloppa xefacciise kara'e, isha mooken ka ulfeenadi'i apitta kuttayta opayshen.