Mataafa Otoowwa a lammatta 15 - Mataafa Qulqulloota

Aasa isho samaytaadi akka Waaqa olli kodayteeta kodaden

¹ Hapura Waaqa ka Asariyaasi inna Odeedi qara' lekkade.

² Isha ka Aasa turopa sooke ka ishi' kide, “Atti Aasa ka samayta Yihuta isho a Piniyaamiiyyi anopa dakkaysada; oton Waaqa olli kinnaannittaneeyye, isha ishin olli kinnaada; oton isha' faanittaneeyye, i'isha teytan. Ma xoori oton alle isha diissaneeyye, isha alle ishin diisha.

³ Isira'eeli parra lekaya Waaqa dukaata mali kallaatte ka seera isho qeesitta isheetta kollisho in qapnin.

⁴ Ma xoori ete rakkadeneeyye, Waaqa Poqallaasso opa tiitaawen ka isha faden; isha ka ishootta teyyade.

⁵ Etoosenetiiyyi orra piitaddaappa kalo piisa qoota rakkoota kutta qara co malla, nakaytan pora aaneta koddini in kitto.

⁶ Qoota Waaqa rakkoota lekayteetan ishootta payyahinno malla, mankisteeta takka mankisteeta a pila'e torpini, katama takkan ka katama a pila torpini.

⁷ Ma ishina' qoota yaalaayshin kela tookta akkatten malla, kokkonsada ka in nukkullaadan.”

⁸ Aasa ete afoosen a xuumampaytase a Asariyaasi inna Odeedi haasawade' dakayeeyye, ikokkonnaade ka piita Yihuta isho a Piniyaami pisa oppaayye ka kunkunnawwa a Efreemi qara katamaddasene a qara pirene oppaayye killowwasene jippame alle' pashshe ka poqase a kalissota a Waaqa isase silayta xarra a tika qulqulloota a Waaqatiiyyi fuula tura co harmishe.

⁹ Kaffa a Efreemi ka a Minaase isho a Simooni oppaayye samayta Isira'eeli kuttayta akkima Waaqa Poqalla Aasa olli co qoota akke ka de'e ka piita Yihuta kara' kallaanno malla, Aasa ka ishootta ka samayta a Yihuta isho a Piniyaami piisa akka Yursaalamipa xorane' kode.

¹⁰ Ishootta ka a Aasa nuqusumeeyye para kudanka kenattati leya sessatta oppaayye Yursaalami karopa ollopa de'en.

¹¹ Ka horeetase a turan poojene oppaayye xaraaffa dippa tappa ka kahirra isho tela kuma tappa kalisoota Waaqati' qalen.

¹² Ka akka Waaqa Poqalla aappadaassoti karittaaysho piisan ka isi piisan fadane'e, kodayteeta kodaden.

¹³ Ka nama Waaqa Poqalla Isira'eeli' faanin in kinnin a shakka taaki a kutta taaki diirta taaki iskatta piisa akka alle ishshamo'e olli' kalen.

¹⁴ Ka turumpa ka kaasa daweetan ka uuyata isho ililittan Waaqa tura' xaxa kalen.

¹⁵ Samayta Yihuta piisa qoota karittaadi piisan xaxade malla ixasoode ka karittaadi piisan Waaqa fade, isha ka ishootta teyaade ka qinda piisan ishootta' nessuma daashe.

¹⁶ Aasa ka okkootaaysho Ma'ika qoota killootase jippamte a asheeraati waakka qayte malla, okkooyyuma a nuqusuma qara alle isheetta shaare ka waakkasene oppa quure ka naaba Qedrooni kara apittan kupe.

¹⁷ Kadi punu Aasa Isira'eeli piisa karaayye porrasene a sakatatta kunkunnawwa qara ca in patinniniiyyi, parra a kallaade piisa karaayye, karittaadi piisanne Waaqa' piddame.

¹⁸ Ka sipla dakara ka warqeeta isho meeha ika lekayta isase a turan aappaaysho isho isha koda Waaqati xawwi reexxene tika qulqulloota a Waaqa karopa kalshe.

¹⁹ A Aasa nuqusume haka para kunda sessa kenattati'i, orana takka nefo in kinnaanne.